MASKI sin i stap long skin, strong bilong dispela graun, na Satan, ol i strong tru long pulim yumi, yumi inap sakim strong bilong ol! Olsem wanem yumi inap mekim olsem? Long rot bilong i go klostu moa long God na long bihainim ol stiatok bilong em long Baibel. Tingim tupela eksampel.

STIATOK BILONG BAIBEL: “Yupela i no ken wokabaut moa long wankain pasin olsem ol man bilong dispela taim.”—Rom 12:2.

Samting i bin kamap tru: Guilherme em wanpela bisnisman long Brasil. Em i tokaut olsem i no isi long mekim onest pasin. Em i tok: “Em i isi long wanpela bisnisman i kisim pasin bilong i no onest, ating em i mekim olsem bilong inapim mak bilong kampani o bilong bisnis i ken stap gut yet. Planti manmeri i tingim pasin bilong givim na kisim grismani olsem wanpela nomol samting tasol. Taim yu kirapim wanpela nupela bisnis na yu gat wok long tromoi planti mani, long kain taim olsem bai i hatwok long mekim onest pasin.”

 Maski i olsem, Guilherme i sanap strong na sakim ol samting i putim presa long em long mekim pasin giaman. Em i tok: “Yu inap mekim onest pasin, maski yu wok bisnis wantaim ol man i orait tasol long brukim sampela lo bilong wok bisnis. Yu mas strong long bihainim ol stretpela pasin. Baibel i bin helpim mi long luksave long ol gutpela samting em pasin bilong onest i save kamapim. Man i mekim onest pasin bai maus bilong bel bilong en i stap klin, em bai i stap bel isi, na em bai rispek long em yet. Em bai i stap olsem gutpela piksa long ol arapela i stap wantaim em.”

STIATOK BILONG BAIBEL: “Ol man i strong long kisim planti mani, ol bai pundaun long traim na ol bai pundaun long trap na ol bai i gat ol laik nogut na bihainim longlong tingting. Na long dispela rot ol bai bagarap. Pasin bilong laikim tumas mani em i as bilong olgeta kain pasin nogut.”—1 Timoti 6:9, 10.

Samting i bin kamap tru: André em i papa bilong wanpela kampani i save putim ol sekiuriti sistem. Wanpela kampani em i save mekim wok bilong ol em wanpela bikpela soka klap. Wanpela taim, bihain long wanpela bikpela soka gem, André i go long ofis bilong dispela klap na givim pepa i soim ol wok em i bin mekim. Lain bilong lukautim mani i wok yet long kaunim mani ol i bin kisim long ol tiket ol i bin salim. Ol i wok i go leit tru, olsem na supavaisa i hariap long peim ol man i bin mekim wok, na em i peim tu André.

André i tok: “Taim mi wok long i go long haus, mi luksave olsem supavaisa i givim planti mani moa long mi winim mani stret em i mas givim. Mi save olsem ating em bai i no inap save long husat tru i kisim dispela ekstra mani. Tasol mi save tu olsem dispela tarangu man i mas givim mani bilong em yet bilong bekim mani i sot! Olsem na mi go bek. Maski planti manmeri tru i watsim gem i stap, mi go namel long ol na givim bek dispela ekstra mani. Supavaisa i kirap nogut tru. I no gat wanpela man i bin givim bek kain mani olsem.”

André i tok moa olsem: “Dispela onest pasin i bin mekim na supavaisa i rispek tru long mi. Sampela yia i go pinis na olgeta narapela kampani em bipo ol i save saplaim ol samting long dispela soka klap ol i no stap moa, mi wanpela tasol i holim yet kontrak bilong wok wantaim dispela klap. Mi amamas tru olsem taim mi bihainim ol stretpela lo bilong Baibel, dispela i mekim na mi kisim gutnem.”

Yumi amamas tru long save olsem long rot bilong helpim i kam long God, yumi inap sakim ol pasin nogut bilong nau. Tasol hatwok bilong wan wan man yet i no inap rausim pasin korapsen olgeta, nogat. As bilong pasin korapsen i strong tru na ol sinman yet i no inap pinisim long strong bilong ol yet. Yu ting dispela i makim olsem pasin korapsen bai i no inap pinis? Laspela atikol bilong ol dispela stori bai kamapim ol gutpela bekim em Baibel i givim.