Painim Bel Isi Bilong Krismas
“Em isi long insait tru long olkain samting i kamap long Krismas. Ol pasin bilong holide i kamap olsem ol samting yumi mas mekim na yumi no lusim bikpela haptaim wantaim ol famili na pren bilong yumi. Sampela taim yumi no kisim ol amamas em yumi mas kisim long kain taim olsem, long wanem, ol hatwok yumi mekim i pasim yumi.”—BRAD HENRY, BIPO GAVANA BILONG OKLAHOMA [AMERIKA], DISEMBA 23, 2008.
KLOSTU long taim bilong Krismas, ol singsing, ol muvi, na ol TV program i save kirapim tingting bilong ol man long kisim amamas na malolo, em bel isi bilong Krismas. Yu ting wanem samting i mas i stap olsem nambawan bikpela samting long Krismas? Yu ting em taim bilong
Tingim Jisas Krais?
Kisim amamas long givim ol samting?
Helpim ol taranguman?
Lusim haptaim wantaim famili?
Kamapim bel isi?
Olsem tok bilong Gavana Henry i kamapim, planti man husat i insait long Krismas ol i hatwok long mekim ol dispela samting i stap antap long taim bilong Krismas. Planti taim Krismas inap givim hatwok long ol man, mekim ol i taiet tru, na bikpela samting moa em taim bilong ol bisnis long salim ol samting. Yu ting dispela i mekim na i hatwok long kisim amamas bilong Krismas?
Baibel i kirapim yumi olgeta long tingim Jisas Krais, amamas long givim ol samting, helpim ol taranguman, na lusim haptaim wantaim ol famili bilong yumi. Na i skulim yumi tu long olsem wanem yumi ken stap wanbel wantaim ol arapela. Olsem na ol dispela atikol i no inap stori long as na sampela i no selebretim Krismas, a tasol em bai stori long ol dispela askim:
Sampela i pilim olsem i gat wanem as na ol i mas selebretim Krismas?
Bilong wanem i hatwok long kisim amamas em planti man i gat laik long kisim long taim bilong Krismas?
Wanem ol stiatok bilong Baibel i bin helpim planti milion man long painim samting i gutpela moa winim Krismas?
a Bilong save long ol tok bilong Baibel i stap olsem as na sampela man i no selebretim Krismas, lukim atikol “Ol Man i Askim—Bilong Wanem Sampela Man i No Save Selebretim Krismas?” .
