Mi save laikim ol samting God i wokim kirap long taim mi liklik yet. Planti taim famili bilong mi i save go raun long ol naispela bikbus na gutpela raunwara i stap long taun bilong mipela long Jyväskylä, long Sentral Finlan. Mi man bilong laikim tru ol animal. Taim mi liklik, mi save holimpasim olgeta pusi na dok mi lukim! Taim mi kamap bikpela, mi no amamas long lukim ol man i mekim nogut long ol animal. I no longtaim, mi joinim wanpela lain i sapotim raits bilong ol animal, na mi bungim ol narapela man i gat wankain tingting olsem mi.

Mipela i save kempein strong long raits bilong ol animal. Mipela i givim aut ol infomesen na stretim rot bilong ol man long protes na straik long ol stua bilong salim skin bilong animal na ol laboritori we i save testim marasin samting long ol animal. Na tu, mipela i kamapim wanpela nupela oganaisesen bilong lukautim ol animal. Mipela i save strong tru long mekim ol samting long helpim ol animal, na planti taim ol bikman i no save amamas long mipela. Planti taim liklik ol i bin arestim mi na kotim mi.

Mi strong long helpim ol animal, na tu, mi bel hevi long lukim ol narapela hevi i kamap long graun. Bihain mi insait long planti oganaisesen, na mi insait tu long Amnesty International na Greenpeace. Mi lusim olgeta strong bilong mi long helpim wok bilong ol. Mi save tok strong long raits bilong ol rabisman, ol man i stap hangre, na ol man i no gat rot bilong helpim ol yet.

Isi isi mi luksave olsem mi no inap stretim pasin bilong ol man. Maski ol oganaisesen i stretim sampela liklik hevi, tasol ol bikpela hevi i go nogut moa. I kain olsem wanpela samting nogut i pasim tingting bilong ol man na ol i no bisi moa. Mi pilim olsem mi no gat strong long mekim wanpela samting.

Mi bel hevi olsem mi no inap helpim ol narapela, olsem na mi kirap long tingim  God na Baibel. Bipo mi bin stadi long Baibel wantaim ol Witnes Bilong Jehova. Tru, mi bin amamas long ol Witnes i mekim gutpela pasin long mi na i laik helpim mi, tasol mi no redi long senisim laip bilong mi. Tasol long nau, ol samting i senis.

Mi kisim Baibel bilong mi na stat long ritim. Mi pilim olsem Baibel i mekim gut bel bilong mi. Mi luksave long planti tok bilong Baibel i skulim yumi long lukautim gut ol animal. Olsem, Sindaun 12:10 i tok: “Ol stretpela man i save marimari long ol animal bilong ol, na lukautim ol gut.” Mi save tu olsem God i no as bilong ol hevi i stap long dispela graun. Tasol ol hevi bilong yumi i go bikpela, long wanem, ol man i no bihainim tok bilong em. Mi kirap nogut long kisim save long pasin laikim bilong Jehova na pasin bilong em long i no les kwik.—Song 103:8-14.

Long dispela taim mi painim wanpela fom bilong kisim buk Tru Tru Baibel i Tok Wanem? na mi pulimapim na salim i go. I no longtaim tupela marit Witnes i kam long haus bilong mi na i laik stadi wantaim mi long Baibel, na mi orait long dispela. Na tu, mi kirap long go long ol miting Kristen long Haus Kingdom. Dispela i mekim na mi laikim ol tok mi lainim long Baibel.

Mi amamas olsem ol save mi kisim long Baibel i helpim mi long mekim planti senis. Mi lusim pasin bilong smok na dring planti. Mi senisim bilas na mi lusim pasin bilong tok nogut. Na mi lain long daun long ol bikman. (Rom 13:1) Mi lusim tu pasin pamuk em wanpela pasin mi hatwok long bosim mi yet long en.

Mi hatwok long senisim tingting mi gat long ol oganaisesen bilong lukautim raits bilong ol man na ol animal. Mi no mekim dispela senis wantu. Pastaim mi pilim olsem sapos mi lusim dispela ol oganaisesen, i olsem mi givim baksait long ol. Tasol mi amamas long save olsem Kingdom Bilong God tasol inap stretim ol hevi bilong dispela graun. Olsem na mi wokim disisen long sapotim dispela Kingdom na helpim ol narapela long kisim save long en.—Matyu 6:33.

Mi save mekim ol samting i agensim gavman na long tingting mi save skelim ol man i go long tupela lain—gutpela lain na lain nogut—na mi redi long mekim nogut long ol lain nogut. Tasol mi tenkyu olsem Baibel i helpim mi na mi no gat moa pasin bilong heitim tru ol narapela. Mi wok long lain long kisim pasin bilong laikim olgeta man. (Matyu 5:44) Wanpela rot mi soim pasin laikim long ol narapela em long rot bilong autim gutnius bilong Kingdom. Mi amamas long lukim hau dispela gutpela wok i kamapim bel isi na amamas, na i helpim ol man long bilip olsem i gat gutpela samting bai kamap bihain.

Mi kisim bel isi long rot bilong lusim ol samting long han bilong Jehova. Mi bilip olsem Krieta bilong yumi bai i no larim ol man nogut long bagarapim ol animal na ol gutpela man, na tu, em bai i no larim ol man i bagarapim gutpela graun bilong yumi. Long rot bilong Kingdom Bilong em, klostu nau em bai stretim olgeta samting ol man i bin bagarapim. (Aisaia 11:1-9) Mi amamas tru long kisim save long ol dispela tok i tru, na tu, long helpim ol narapela long bilip long en. Mi pilim olsem mi no gat wok long stretim pasin bilong ol man.