God i promisim Abraham olsem dispela pikinini long tok profet bai wanpela tumbuna pikinini bilong Abraham. Long rot bilong dispela pikinini, “olgeta lain pipel long graun” bai kisim blesing. (Stat 22:18) Tumbuna pikinini bilong Abraham, em Jekop, i go sindaun long Isip we famili bilong em i kamap planti na bihain ol i kamap lain Israel bilong dispela taim bipo.

Bihain, long Isip man nogut Fero i mekim lain Israel i wok kalabus inap long God i makim profet Moses long bringim ol i go lusim dispela kantri. Long rot bilong mirakel, Moses i brukim solwara Retsi na bringim ol i go. Bihain long dispela, God i givim ol lo long lain Israel, Tenpela Lo tu i insait long en, bilong stiaim na lukautim ol. Ol dispela lo i makim stret wanem ofa ol i mas mekim bilong God i ken lusim rong bilong ol. Na God i kirapim Moses long tokim lain Israel olsem God bai salim narapela profet i kam long ol. Dispela profet em bai dispela promis pikinini.

Inap 400 yia bihain, God i tok promis long King Devit olsem dispela pikinini em i bin tok profet long en long gaden Iden bai bosim wanpela Kingdom na dispela Kingdom bai stap oltaim oltaim. Dispela man em Mesaia, God i makim em olsem Man Bilong Kisim Bek olgeta man na em bai kamapim bek Paradais long graun.

Long rot bilong Devit na ol narapela profet, isi isi God i kamapim sampela save moa long Mesaia. Ol i tok profet olsem em bai gat pasin daun na gutpela pasin, na aninit long wok bos bilong em bai i no gat hangre, pasin i no stret, na woa. Olgeta manmeri bai stap bel isi wantaim ol narapela na wantaim ol animal tu. Ol samting olsem sik, pen na hevi, na i dai, ol i no insait long samting God i tingting pinis long mekim, olsem na ol bai pinis olgeta, na ol man i dai pinis bai kirap bek na kisim laip long graun.

Long rot bilong profet Maika, God i tok profet olsem Mesaia bai bon long Betlehem, na long rot bilong profet Daniel, God i tok profet olsem bihain ol man bai kilim em i dai. Tasol God bai kirapim bek Mesaia na makim em i kamap King long heven. Na tu, Daniel i tok profet olsem bihain Kingdom Bilong Mesaia bai pinisim tru olgeta gavman. Olsem wanem? Mesaia i bin kam olsem tok profet i makim?

—I kam long Stat sapta 22-50, na tu, Kisim Bek, Lo, 2 Samuel, Song, Aisaia, Daniel, Maika, Sekaraia 9:9.