Kirap bek bilong Jisas i givim strong long ol disaipel bilong em na i kirapim ol long givim bel tru long autim tok. Aposel Pol i raun long olgeta hap bilong Esia Maina na Mediterenian, em i kamapim ol kongrigesen na strongim ol Kristen long sanap strong na karim hevi bilong ol traim i kamap long ol na long ol man i birua long ol. Maski i gat ol dispela hatwok, planti manmeri moa i kamap Kristen.

Bihain ol man i putim Pol long kalabus. Maski i olsem, long ples kalabus yet Pol i raitim pas i go long ol kongrigesen Kristen bilong strongim ol na helpim ol. Em i givim tok lukaut long ol long wanpela bikpela hevi inap kamap—em pasin bilong lusim bilip olsem pasin apostet. Holi spirit bilong God i stiaim Pol na em i tok profet olsem “ol wulf nogut” husat bai “mekim ol tok kranki” bai kamap namel long ol na “pulim ol disaipel i go bihainim ol.”—Aposel 20:29, 30.

Klostu long pinis bilong yia 100 C.E., pasin apostet i bin kirap. Long dispela taim, Jisas husat i kirap bek pinis i givim Jon ol Tok Hait, em piksa bilong ol samting bai kamap bihain. Olsem Jon i tok, ol birua na ol tisa giaman i no inap pasim God long kamapim ol samting em bipo yet God i bin tingting pinis long mekim long graun na long ol manmeri. Ol manmeri bilong “olgeta kantri, na olgeta lain, na olgeta tokples, na olgeta lain pipol” bai harim gutnius bilong Kingdom Bilong God. (Revelesen 14:6) Paradais bai kamap bek gen long graun, na olgeta manmeri husat i mekim laik bilong God ol bai stap long en!

Yu wanbel olsem dispela em i “gutnius”? Sapos olsem, orait kisim sampela save moa long ol tok God i givim long ol manmeri olsem i stap long Baibel, na olsem wanem ol dispela tok inap helpim yu long nau na long bihain tu.

Yu yet inap ritim Baibel long Intenet long www.mt1130.com/tpi. Long dispela Web-sait, yu inap ritim tok bilong buklet Gutpela Nius i Kam Long God! na tu, buk Tru Tru Baibel i Tok Wanem? na planti narapela buk na nius i stori long as na yumi ken trastim Baibel, na olsem wanem yumi ken bihainim ol tok bilong en insait long famili bilong yumi na long laip bilong yumi wan wan. O askim wanpela Witnes Bilong Jehova sapos yu laik kisim sampela save moa.

—I kam long Aposel, Efesus, Filipai, Kolosi, Filemon, 1 Jon, Revelesen.