Inap olsem 400 yia bihain long ol i bin pinisim wok bilong raitim laspela buk bilong Ol Skripsa Hibru bilong Baibel, tok profet bilong Maika i stori long Mesaia i bin kamap tru: Jisas i bon long Betlehem. Inap 30 yia bihain, long 29 C.E., fes hap bilong tok profet bilong Daniel long Mesaia bai i kam i bin kamap tru. Jisas i kisim baptais, na God i makim em long rot bilong holi spirit. Long taim stret, dispela Mesaia o pikinini em ol man i bin wetim inap longtaim pinis, em i bin kamap!

Jisas i kirap mekim wok bilong em long “autim gutnius bilong Kingdom bilong God.” (Luk 8:1) Olsem Baibel i bin tok profet, Jisas i gat ol gutpela pasin, pasin isi, na em i save tingim tru ol narapela. Ol tok em i skulim ol man long en i gutpela na i helpim ol man. Na tu, em i “oraitim olgeta kain sik bilong ol manmeri” na dispela i soim olsem God i stap wantaim em. (Matyu 4:23) Ol man i gat kain kain krismas i kam long Jisas na ol i tok: “Mipela i painim pinis Mesaia”!—Jon 1:41.

Jisas i tok profet olsem paslain liklik long Kingdom bilong em i kirap long bosim olgeta samting, bai i gat taim bilong woa, graun guria, na planti narapela hevi long graun. Olsem na em i kirapim olgeta long “was i stap.”—Mak 13:37.

Jisas em man i gutpela olgeta na oltaim em i save bihainim tok bilong God, tasol i gat ol man i birua long em na bihain ol i bin kilim em i dai. Dai bilong Jisas em gutpela ofa tru bilong baim bek samting Adam na Iv i bin lusim—em laip oltaim long Paradais.

I dai bilong Jisas i truim tok profet, na God i kirapim bek Jisas olsem wanpela strongpela spirit 3-pela de bihain long em i dai, dispela tu i truim tok profet. Bihain Jisas i bin kamap long winim 500 disaipel bilong em. Paslain long em i go long heven, Jisas i givim wok long ol disaipel bilong em long autim gutnius bilong em na long Kingdom bilong em long “olgeta lain man.” (Matyu 28:19) Ol i mekim dispela wok i go inap long wanem mak?

—I kam long Matyu; Mak; Luk; Jon; 1 Korin.