LONG Mas 1961, ol saveman i bin painim 400 narapela narapela samting ol man i wokim long kopa em ol i bin karamapim long mat na haitim long keiv. Namel long ol dispela samting i gat kain kain ol kraun, ol stik bilong king, ol tul, ol stik bilong ol bikman o bilong ol profet, na ol samting bilong pait. Dispela samting ol saveman i painim i kirapim tingting bilong ol man i save ritim Baibel long tingim tok bilong Stat 4:22 i tok long Tubalkein olsem “man bilong wokim olkain samting long [kopa] na ain.”

Ol man i gat planti askim long ol dispela samting i kam long we na husat i bin wokim. Dispela samting ol i painim i soim olsem long bipo yet ol man i bin digim kopa long graun, meltim, na wokim ol tul samting long ol ples Baibel i stori long en.

Taim lain Israel i redi long go insait long Graun Bilong Promis, Moses i tokim ol: “Bai yupela i ken painim [kopa] insait long ol maunten” long dispela kantri. (Lo 8:7-9) Ol saveman i bin painim ol main bilong bipo long Israel na Jordan, we ol man i digim na meltim kopa, em ol ples olsem Feinan, Timna, na Khirbat en-Nahas. Yumi kisim wanem save long ol dispela ples?

Graun long hap bilong Feinan na Timna i gat ol hul i no dip we ol man bilong wok long main i digim kopa inap 2,000 yia samting. Long nau tu, ol man inap lukim ol ston em kopa i bin pas long ol na ol i stap nabaut long graun. Ol man bilong wok long main bipo i katim ston wantaim ol ston tul bilong kisim kopa. Taim i no gat kopa moa long ol dispela hap, ol i yusim ol tul ain bilong digim i go insait moa long graun, na ol i mekim ol keiv i go bikpela na wokim rot bilong go insait. Long Buk Jop, yumi ritim stori bilong wok ol i save mekim long kain main olsem. (Jop 28:2-11) Dispela em bikpela wok na i hatwok tru long mekim, olsem na long yia 200 C.E. i go inap 400 C.E., gavman Rom i salim ol kriminal nogut tru na ol narapela kalabusman i go wok long ol kopa main long Feinan.

Planti hip pipia bilong kopa i stap long Khirbat en-Nahas (mining bilong en “Hip Pipia Bilong Kopa”), dispela i soim olsem ol i save meltim planti kopa long dispela hap bilong mekim wok bisnis long en. Ol saveman i ting olsem ol man i bringim i kam ol ston we i gat ain o kopa long en long ol  main i stap klostu olsem Feinan na Timna. Bilong seperetim kopa long ston, ol i save yusim paip we ol i winim long maus o presim long lek bilong winim paia na bai paia i lait bikpela na i hat tru olsem 1,200 digri Selsias inap 8 i go 10 aua. Ol i save kukim 5 kilogram ston i gat kopa na kisim 1 kilogram kopa long en na bihain ol inap yusim long mekim ol narapela narapela samting.

Long maunten Sainai, God Jehova i tok long ol i mas yusim dispela naispela ston bilong wokim haus lotu sel, na bihain ol i yusim long wokim tempel long Jerusalem long seim stail. (Kisim Bek, sapta 27) Ating lain Israel i gat save long wokim ol samting long ain paslain long ol i go long Isip, o ating ol i kisim dispela save taim ol i stap long Isip. Long taim God i bin kisim bek ol, ol i gat save pinis long meltim ol gol na kopa samting na wokim bulmakau gol. Na tu, ol i bin wokim planti samting long kopa em ol i yusim bilong mekim wok long haus lotu sel, olsem ol bikpela dis, ol sospen, ol praipan, ol savol, na ol fok.—Kisim Bek 32:4.

Bihain long ples drai nating, ating long Punon (em nau ol i kolim Feinan), em hap i gat planti kopa long en, ol manmeri i komplein long mana na wara. Jehova i strafim ol na salim ol posin snek i kam kaikaim ol na planti bilong ol i dai. Bihain long lain Israel i tanim bel, Moses i kamap olsem namelman, na Jehova i tokim em long wokim wanpela snek long kopa na hangamapim antap long wanpela longpela pos. Baibel i tok: “Sapos ol snek nogut i kaikaim ol manmeri, orait ol i ken lukluk long snek [kopa] na bai ol i orait gen.”—Namba 21:4-10; 33:43.

King Solomon i bin yusim planti kopa long wokim ol samting bilong bilasim tempel long Jerusalem. Planti bilong ol dispela kopa em papa bilong em Devit i bin kisim taim em i pait na daunim lain Siria. (1 Stori 18:6-8) Solomon i wokim wanpela “bikpela tang wara” long kopa bilong ol pris i ken waswas long en, dispela tang inap holim 66,000 lita wara na hevi bilong en em klostu 30 ton. (1 King 7:23-26, 44-46) Na tu, ol i wokim tupela traipela pos long kopa na ol i sanapim long dua bilong tempel. Longpela bilong ol inap 8 mita na longpela bilong bilas long het bilong pos inap olsem 2.2 mita. Ol pos i gat hul i go daun na wol bilong ol i tik inap 7.5 sentimita, na braitpela bilong ol inap 1.7 mita. (1 King 7:15, 16; 2 Stori 4:17) Tru tumas, yumi kirap nogut long save olsem ol i yusim planti kopa tru long wokim ol dispela samting.

Long taim bilong ol man i bin raitim Baibel, planti man i mekim wok long kopa long olgeta de. Olsem, yumi ritim stori long ol i yusim kopa long wokim ol samting bilong pait, ol hankap, ol musik instramen, na ol dua. (1 Samuel 17:5, 6; 2 King 25:7; 1 Stori 15:19; Song 107:16) Jisas i stori long “kopa” mani bilong putim long paus, na aposel Pol i stori long “Aleksander, em man bilong wokim ol samting long kopa.”—Matyu 10:9; 2 Timoti 4:14.

Ol saveman i gat planti askim long hau na i gat planti kopa tru long taim bilong ol man i bin raitim Baibel, na tu, ol i no save husat i papa tru bilong ol dispela planti samting ol i painim em ol i kolim Nahal Mishmar. Tasol i gat ol tok i tru i stap na Baibel i strongim dispela tok olsem graun em lain Israel i kisim em i “gutpela kantri tru . . . na bai [ol] i ken painim [kopa] insait long ol maunten.”—Lo 8:7-9.