“GOD em i wanpela Spirit,” olsem na ol man i no inap lukim em. (Jon 4:24) Tasol Baibel i tok sampela man i bin lukim God. (Hibru 11:27) Hau ol i lukim God? Yu ting yu inap lukim dispela “God ol man i no inap lukim”?—Kolosi 1:15.

Tingim wanpela man husat i bon olsem aipas. Yu ting dispela i pasim em long kisim save long ol samting em i no inap lukim? Yumi ken tok nogat. Man i aipas inap yusim ol narapela hap bilong bodi long kisim save long ol man na ol wok ol i mekim. Wanpela aipas man i tok: “Maski man i aipas, em inap piksaim long tingting ol samting i luk olsem wanem.”

Long wankain pasin, yu no inap lukim God long ai, tasol yu inap lukim God long ai bilong “bel.” (Efesus 1:18) Skelim 3-pela rot yu inap mekim olsem.

Man i aipas inap harim ol nois na em inap tatsim ol samting, na dispela i helpim em long save long ol samting em i no inap lukim. Olsem tasol, yu inap lukim ol samting God i bin wokim na dispela bai helpim yu long save long dispela God em yu no inap lukim. Baibel i tok: “Kirap long taim God i wokim olgeta samting na i kam inap long nau, ol man i lukim ol samting God i bin wokim na long dispela rot ol inap save long ol pasin bilong en i stap hait.”—Rom 1:20.

Olsem, tingim graun bilong yumi. God i wokim gut graun na bai yumi ken stap amamas long en. Taim yumi pilim win, o pilim hat bilong san, kaikai wanpela naispela prut, o harim krai bilong ol pisin, ol kain samting olsem i save mekim yumi amamas. Olgeta dispela samting i kamapim klia olsem Krieta bilong yumi i tingim yumi, em i gat pasin isi, na em i save givim yumi ol gutpela presen.

Yu inap kisim wanem save long God taim yu lukim olgeta samting long yunives? Ol samting i stap antap i kamapim bikpela strong bilong God. Long nau ol wok painimaut bilong saiens i soim olsem yunives i wok long i go bikpela insait long sotpela haptaim! Long nait taim yu lukluk long skai, tingim dispela askim: Husat i as bilong bikpela strong i mekim na yunives i go bikpela insait long sotpela haptaim tasol? Baibel i tokim yumi olsem Krieta i gat “olgeta strong.” (Aisaia 40:26) Ol samting God i bin wokim i kamapim klia olsem em “God I Gat Olgeta Strong,” na em i “gat bikpela strong.”—Jop 37:23.

Wanpela mama i gat tupela pikinini husat i no inap lukluk gut, em i tok: “Pasin bilong tokim ol [aipas] long ol samting yu lukim em i bikpela samting long helpim ol long kisim save. Taim yupela i raun, tokim ol long olgeta samting yu lukim na harim. I olsem yu stap ai bilong ol.” Olsem tasol, maski “i no gat wanpela man i bin lukim God long wanpela taim,” Pikinini Bilong God, em Jisas, “i stap klostu long bros bilong Papa, em i bin stori gut long yumi long Papa.” (Jon 1:18) Jisas em i namba 1 samting God i bin wokim na em i Pikinini tru bilong God, olsem na em i soim yumi long God. Em i nambawan gutpela rot bilong kisim save long God em yumi no inap lukim.

Skelim sampela tok Jisas, em man husat i stap wantaim Papa bilong em inap planti milion yia i mekim long God:

• God i save wok oltaim. “Papa bilong mi i wok i stap i kam inap long nau.”—Jon 5:17.

• God i save long ol samting yumi nidim. “Papa bilong yupela, em i save long ol samting yupela i nidim paslain long yupela i askim em.”—Matyu 6:8.

• God i save lukautim yumi. “Papa i stap long heven . . . i save mekim san bilong en i kam antap long ol man nogut na ol gutpela man, na em i save mekim ren i kam daun long ol stretpela man na ol man i no mekim stretpela pasin.”—Matyu 5:45.

•  God i save tingim yumi olgeta wan wan. “Ol man i save salim tupela liklik pisin long koin i gat liklik pe. Tasol i no gat wanpela bilong ol dispela liklik pisin i save pundaun long graun na Papa bilong yupela i no save long dispela. Em i kaunim pinis olgeta gras long het bilong yupela. Olsem na yupela i no ken pret. Yupela i winim tru ol dispela liklik pisin.”—Matyu 10:29-31.

Ol man i aipas inap save long ol samting, tasol tingting ol i gat long wanpela samting i no wankain long ol man husat inap lukluk. Man i aipas inap tingim sedo olsem wanpela ples em lait bilong san i no strong long en, na i no olsem ples i tudak bikos i nogat lait bilong san. Wankain olsem man i aipas i no inap lukim sedo na lait, save bilong yumi i no inap helpim yumi long kliagut long Jehova, nogat. Em as na Jehova i salim wanpela man husat inap kamapim olgeta pasin bilong Em.

Dispela man em Jisas. (Filipai 2:7) Jisas i stori long Papa bilong em, na tu, em i kamapim ol pasin bilong Papa. Disaipel bilong Jisas, Filip i askim em olsem: “Bikpela, soim Papa long mipela.” Jisas i tok: “Man i lukim mi, em i lukim Papa.” (Jon 14:8, 9) Ol pasin bilong Jisas i helpim yumi long kisim wanem save long Papa bilong em?

Jisas i gat pasin isi, pasin daun, na i no hatwok long ol man i toktok wantaim em. (Matyu 11:28-30) Planti man i laikim Jisas bikos em i gat ol gutpela pasin. Jisas i save pilim hevi bilong ol man, na tu, em i save amamas taim ol man i amamas. (Luk 10:17, 21; Jon 11:32-35) Taim yu ritim ol stori bilong Jisas long Baibel, piksaim long tingting ol samting i kamap na tingim olsem yu tu i stap long dispela taim. Sapos yu tingim tingim long bel ol pasin Jisas i mekim long ol man taim em i stap long graun, dispela bai helpim yu long save long ol gutpela pasin bilong God na yu inap go klostu long Em.

Wanpela meri bilong raitim buk i stori long hau ol aipas i save yusim ai bilong tingting long kliagut long ol samting ol i no inap lukim. Em i tok: “Man o meri i aipas i save bungim olgeta liklik infomesen long rot bilong tatsim na smelim ol samting, na harim ol nois, na dispela i helpim em long kliagut long ol samting.” Long wankain pasin, taim yu lukim ol samting God i bin wokim, ritim ol tok Jisas i mekim long Papa bilong em, na skelim olsem wanem Jisas i kamapim ol pasin bilong God, yu inap luksave long ol gutpela pasin bilong Jehova na i olsem yu lukim wanpela naispela piksa. Dispela bai helpim yu long lukim God olsem man i stap tru.

Jop i bin lukim God olsem man i stap tru. Pastaim em i bin mekim wanpela tok, tasol em i “no klia olgeta long as bilong en.” (Jop 42:3) Tasol bihain long em i skelim gut olgeta samting God i bin wokim, Jop i tok: “Mi bin harim tok bilong ol man tasol na mi kisim save long yu. Tasol nau mi lukim yu stret long ai bilong mi yet.”—Jop 42:5.

Wankain samting inap painim yu. “Sapos yu wok strong long kisim save long laik bilong em, orait bai em i larim yu i save gut long em.” (1 Stori 28:9) Ol Witnes Bilong Jehova bai amamas long helpim yu long kisim save long dispela God em yu no inap lukim.