I no longtaim mi insait long spot jimnastiks na eksasais bilong strongim bodi. Bihain, mi kamapim wanpela klinik bilong helpim ol man husat i laik eksasais bilong strongim bodi long San Leandro, California, long Amerika. Na tu, mi wok wantaim ol lain i save helpim ol man long kamap ol masolman. Wanpela bilong ol dispela man mipela i helpim i bin winim nambawan prais, em ol i kolim Mr. America. Tasol dispela wok i no helpim mi long kisim save long Baibel.

Wanpela pren long klinik i luksave olsem mi gat laik long kisim save long Baibel, olsem na em i tok long mi mas bungim wanpela man em i save long en. Long neks moning, wanpela Witnes Bilong Jehova i kam long haus bilong mi. Mipela i stori inap 4-pela aua, na em i yusim Baibel long bekim ol askim bilong mi. Mi askim em long kam bek long apinun, na mipela i stori long Baibel i go inap long biknait. Mi amamas tru long ol tok mi lainim, olsem na mi askim em sapos i orait long mi go wantaim em long neks de na lukim pasin bilong ol long autim tok. Mi kirap nogut long lukim olsem em i yusim Baibel long bekim ol askim bilong ol man. Long dispela taim stret mi pasim tok long bel olsem mi tu mi laik mekim dispela wok!

Olsem na mi lusim bisnis bilong mi na long olgeta de mi autim tok wantaim dispela painia. Dispela tok painia em nem bilong ol Witnes Bilong Jehova husat i save autim tok fultaim. Long Me 1948, mi kisim baptais long kibung i kamap long wanpela stediam (Cow Palace Arena) long San Francisco, California. Sampela mun bihain mi kamap wanpela painia.

Bihain mi askim ol Witnes long visitim mama bilong mi. Em i laikim ol tok em i harim, olsem na i no longtaim na em i kamap wanpela Witnes Bilong Jehova. Maski famili bilong em i birua long em, inap planti yia em i stap gut long God i go inap long taim em i dai. Tasol ol narapela insait long famili bilong mipela i no kamap Witnes.

Long 1950, mi go stap long Grand Junction, Colorado, na mi bungim Billie. Em i bon long 1928, na em i go bikpela long taim bilong bikpela hevi bilong mani. Taim Billie i liklik meri yet, olgeta nait mama bilong em Minnie i save ritim Baibel long em long lait bilong lam kerosin. Na long taim Billie i gat 4-pela krismas em inap long rit na em i save gut long planti stori bilong Baibel. Long 1948 samting, mama bilong em i stadi long Baibel wantaim ol Witnes, na em i kisim save olsem hel i no ples bilong kisim pen long bikpaia, nogat, em ples matmat bilong ol man i dai pinis. (Saveman 9:4, 5, 10) Bihain mama na papa bilong Billie i kamap Witnes.

Long 1949, Billie i pinisim skul long kolis long Boston na em i kirap stadi long Baibel. Em inap kamap tisa, tasol em i mekim disisen long dediketim laip bilong  em long God. Long 1950, em i baptais long kibung intenesenel bilong ol Witnes Bilong Jehova long Yankee Stediam, New York. Bihain liklik, mitupela Billie i marit na kirap mekim wok autim tok fultaim.

Mipela i kirap mekim dispela wok long Eugene, Oregon, na mipela i painim ol gutpela pren long dispela hap. Long 1953, mipela i go sindaun long Grants Pass, Oregon bilong helpim wanpela liklik kongrigesen long dispela hap. Bihain long dispela yia, ol brata i singautim mi na Billie long i go long namba 23 klas bilong Skul Gileat, em skul bilong ol Witnes long kamap misineri. Dispela skul i stap klostu long South Lansing, New York, klostu 400 kilomita long hap not wes bilong New York City.

Long Disemba 1954, mitupela Billie i kalap long wanpela liklik balus bilong i go long Brasil, em faivpela mun bihain long mipela i grediuet long Skul Gileat. Balus i ron wanpela aua na bihain wanpela ensin bilong en i bagarap, tasol mipela i go kamap gut long Bemuda. Bihain narapela hevi i kamap gen long balus, olsem na mipela i go long Kuba. Dispela i mekim na mipela i raun inap 36 aua olgeta, olsem na mipela i taiet tru taim mipela i kamap long brens ofis bilong ol Witnes Bilong Jehova long Rio de Janeiro, Brasil.

Mi na Billie i stap liklik taim tasol long hap, na ol i salim mipela na tupela arapela misineri i go long Bauru, São Paulo, bilong stap long wanpela nupela haus misineri. Winim 50,000 manmeri i stap long dispela siti, na mipela ol fes Witnes long i go stap long hap.

Mipela i kirap autim tok long ol man long haus bilong ol, tasol i no longtaim wanpela Katolik pris i birua long mipela. Em i save bihainim mipela na tokim ol man long no ken harim tok bilong mipela. Tasol insait long sampela wik, wanpela bikpela famili em mipela i save stadi wantaim ol i kisim baptais. I no longtaim na sampela manmeri moa i kirap stadi.

Wanpela wanblut bilong dispela famili husat i kisim baptais i stap olsem presiden bilong wanpela klap em planti man i save long en. Olsem na mi stretim rot bilong mekim kibung long dispela klap. Tasol pris i strong long ol i no ken sainim kontrak bilong mipela i ken mekim kibung, olsem na presiden i bung wantaim ol lain bilong klap na em i tokim ol, “Sapos yupela i no sainim kontrak, mi bai risain long wok!” Ol i tok orait long mipela i ken mekim kibung long dispela hap.

Long 1956, ol i invaitim mipela long go long kibung distrik long Santos, São Paulo. Klostu 40 Witnes long kongrigesen bilong mipela i kalap long tren bilong i go long kibung. Taim mipela i kam bek long Bauru, mi kisim wanpela pas. Dispela pas i tokaut long nupela asainmen bilong mi olsem wasman raun bilong go lukim ol kongrigesen bilong ol Witnes Bilong Jehova. Inap olsem 25 yia mipela i mekim dispela wok long Brasil, na mipela i raun long klostu olgeta hap bilong dispela kantri.

Long dispela taim, i hatwok long raun long ol ples. Mipela i raun long klostu olgeta hap long bas, tren, wilka, baisikol, na sampela taim mipela i mas wokabaut. Fes siti mipela i go long en em Jaú, long São Paulo. Long dispela hap pris i tok pait wantaim mipela.

Em i tok: “Yupela i no ken autim tok long ol sipsip bilong mi!”

Mipela i tokim em: “Ol dispela manmeri i no bilong yu. Ol i bilong God.”

Mipela i stretim rot long soim piksa The New World Society in Action i stori long wok autim tok i kamap long olgeta hap, tasol pris i bungim sampela lain bilong kam pait long mipela. Kwiktaim mipela i toksave long ol polis. Taim pris wantaim ol wanlotu bilong em i kam long ples mipela i bung long en, ol polisman i sanap na poinim gan long ol, olsem na ol i no mekim wanpela samting. Olgeta manmeri i amamas tru long lukim dispela piksa mipela i bin soim.

 Pasin bilong birua long lotu i stap long klostu olgeta hap mipela i autim tok long en. Olsem, mipela i bungim 2-pela painia long Brusque, klostu long Blumenau, Santa Catarina. Long dispela hap, ol man i save birua tru long ol, tasol ol i sanap strong na ol i no givap na gutpela samting i kamap. Long nau, winim 50 yia bihain, i gat 60 kongrigesen i stap long dispela hap, na i gat naispela Haus Kibung long biktaun Itajaí.

Wanpela gutpela samting i kamap long wok wasman raun em olsem, mipela inap helpim ol wanwok Witnes long redim ol bikpela kibung. Long 1970 samting, mi kisim wok olsem wasman bilong kibung i bin kamap long Morumbi Stediam. Mipela i toksave long inap olsem wan handret kongrigesen long ol hap klostu long salim tenpela manmeri long wan wan kongrigesen bilong klinim stediam long nait paslain long kibung.

Taim ol lain bilong pilai soka i lusim stediam long dispela nait, sampela i tok bilas olsem: “Lukim ol dispela meri i holim brum na ol samting bilong mopim plua.” Tasol ol bratasista i wok i go inap long biknait na stediam i klin tru! Maneja bilong stediam i kirap nogut na em i tok, “Yupela ol Witnes i bin mekim dispela wok insait long sampela aua, tasol ol wokman bilong mi bai mekim kain wok olsem insait long wanpela wik olgeta!”

Long 1980, papa bilong mi i dai, na bihain liklik mi na Billie i go bek long Amerika bilong lukautim mama bilong mi husat i stap long Fremont, California. Mipela i save klinim ol haus long nait bilong kisim mani bilong sapotim mipela long mekim yet wok painia. Na tu, mipela i helpim ol lain Potugal long kisim save long Baibel dispela hap. Bihain, mipela i go sindaun long San Joaquin Valley em ples i stap klostu, na mipela i raun long Sacramento i go inap long Bakersfield bilong painim ol manmeri i save mekim tok Potugal. Nau i gat olsem 10-pela kongrigesen bilong tokples Potugal long California.

Mama bilong mi i dai long 1995, olsem na mipela i go stap long Florida na lukautim papa bilong Billie i go inap long taim em i dai. Mama bilong Billie i dai long 1975. Long yia 2000, mipela i lusim Florida na go sindaun long saut wes Colorado na mipela i mekim yet wok autim tok fultaim long ol asples lain bilong Amerika em lain Navajo na Ute. Tasol sori tru, Billie i dai long Februeri 2014.

Mi amamas tru olsem mi bin bungim wanpela Witnes Bilong Jehova winim 65 yia i go pinis na em i bekim ol askim bilong mi long rot bilong Baibel! Na mi amamas moa yet olsem mi bin stadi na dispela i helpim mi long kliagut long ol tok bilong Baibel. Dispela save mi kisim i opim rot long mi ken mekim wok bilong God inap planti yia, na mi kisim ol gutpela blesing.