Planti man i ting Satan i makim ol laik nogut na em i no wanpela man tru. Tasol Baibel i tok wanem long dispela? Sapos Satan i makim ol laik nogut, bilong wanem Baibel i stori olsem Satan i toktok wantaim Jisas Krais na God i Gat Olgeta Strong? Yumi ken skelim ol dispela stori.

Taim Jisas i kirap long mekim wok autim tok long graun, 3-pela taim Satan i traim em. Namba 1 traim, Satan i fosim Jisas long yusim strong God i givim long em long inapim laik bilong em long kaikai. Namba 2 traim, Satan i tokim Jisas olsem sapos em i pikinini bilong God, orait em i mas kalap i go daun na bai ol ensel i ken seivim em. Na namba 3 traim, Satan i tokim Jisas olsem sapos em i lotu long em, em bai givim olgeta kingdom bilong graun long Jisas. Tasol Jisas i sakim dispela 3-pela traim, na em i kamapim ol skripsa bilong Baibel taim em i bekim tok long Satan.—Matyu 4:1-11; Luk 4:1-13.

Jisas i toktok wantaim husat? Yu ting em i toktok long laik nogut i stap long bel bilong em yet? Baibel i tok long Jisas olsem, “olgeta traim i save kamap long yumi, ol i bin kamap long em tu, tasol em i no gat sin.” (Hibru 4:15) Na tu, Baibel i tok: “Em i no bin mekim sin, na i no gat wanpela tok giaman i bin kamap long maus bilong en.” (1 Pita 2:22) Jisas i stap gut long God, i nogat wanpela taim em i bin bihainim laik bilong em yet. I klia tru olsem Jisas i no toktok long laik nogut i stap long bel bilong em, nogat, em i toktok long wanpela man tru.

Dispela stori i kamapim klia olsem Satan em man i stap tru.

• Tingim, Satan i tok long givim olgeta kingdom bilong graun long Jisas sapos em i brukim skru na lotu long em. (Matyu 4:8, 9) Sapos Satan i no man tru, orait i no gat as long Jisas i mas sakim em. Na tu, Jisas i luksave olsem Satan i bosim olgeta gavman bilong graun.

• Bihain long Jisas i sakim Satan, em i “lusim em na wetim narapela taim.” (Luk 4:13) Dispela i soim olsem Satan em man tru na em i wok strong long pulim ol man long lusim bilip bilong ol.

• Na tu, bihain long Satan i lusim Jisas, “ol ensel i kam na helpim” em. (Matyu 4:11) Yu ting ol dispela ensel husat i strongim na helpim Jisas em ol spirit tru? Yes, ol dispela ensel em ol spirit tru, olsem na i gat as na yumi ken bilip olsem Satan tu i wanpela spirit.

Long stori bilong Jop, Baibel i kamapim olsem tupela taim Satan i bin toktok wantaim God. Dispela stori i kamapim klia olsem Jop i stap gut long God, olsem na Em i tok amamas long Jop. Tasol Satan i sutim tok long Jop olsem God i mekim gut long em, olsem na em i stap gut long God. Taim Satan i sutim dispela tok, i olsem em i tok God i no save long as na Jop i lotuim em. Jehova i larim Satan i mekim na Jop i bungim planti hevi. Olsem na Jop i lusim mani kago bilong em, ol pikinini bilong em i dai, na tu, em i kisim bikpela sik. a Maski ol dispela hevi i painim Jop, em i stap gut long God na dispela i soim olsem Satan em man bilong giaman. Olsem na God i blesim Jop.—Jop 1:6-12; 2:1-7.

Baibel i stori olsem God i toktok wantaim Satan, olsem na yu ting i stret long ting olsem Jehova i toktok long wanpela laik nogut i stap long bel bilong em? Baibel i tok: “Pasin bilong God i gutpela tru na i stret olgeta.” (2 Samuel 22:31) Na tu, Baibel i tok: “God Jehova, em i God i Gat Olgeta Strong, em i holi, em i holi, em i holi.” (Revelesen 4:8) Dispela tok holi i makim samting i klin olgeta. Jehova em i holi, olsem na em i no inap tingting long mekim pasin nogut.

Sampela man i ting Jop i no man i stap tru, na ol i tok dispela stori em wanpela tok bokis tasol. Yu ting dispela tok i stret? Ol narapela ves long Baibel i kamapim klia olsem Jop em man tru husat i stap long bipo. Olsem, Jems 5:7-11 i kirapim ol Kristen long bihainim pasin bilong Jop long sanap strong na karim ol hevi, na taim ol i mekim olsem Jehova bai blesim ol. Olsem na dispela skripsa i helpim yumi long luksave olsem Jop em wanpela man i stap tru long bipo na Satan i kamapim ol hevi long em. Na tu, long Esekiel 14:14, 20, Baibel i stori long Jop wantaim ol narapela bilipman olsem Noa na Daniel. Olsem Noa na Daniel, Jop em wanpela man i stap tru long bipo na em i gat strongpela bilip. So yumi ken ting olsem Satan, em man husat i birua na mekim nogut long Jop, em tu em wanpela man i stap tru.

Baibel i kamapim klia olsem Satan em wanpela spirit i stap tru. Ating bai yu tok, ‘Satan inap mekim sampela samting bilong nogutim mi na famili bilong mi?’

Tingim olsem wanpela lain raskol i kam long taun yu stap long en. Ating pasin raskol bai i go bikpela, na tu, pasin bilong ol man bai go nogut moa. Orait tingim, kain samting olsem i bin kamap: Satan na ol spirit nogut bilong em i bikhet na sakim tok bilong God, olsem na God i rausim ol i kam daun long graun. Dispela i kamapim wanem ol hevi long graun? Tingim ol stori yu harim long redio na lukim long TV samting:

• Ol gavman na oganaisesen long graun i traim long stopim pasin bilong pait na bagarapim narapela, tasol ol i no inap long mekim olsem.

• Ol muvi na ol vidio gem samting i soim ol wok bilong ol spirit nogut, na dispela i mekim na planti papamama i tingting planti.

• Ol man i traim kain kain rot long lukautim graun, tasol win na wara samting long graun i wok long bagarap.

• Pasin bilong ol man i go nogut moa, na dispela inap kamapim bikpela hevi.

Skelim tok bilong Baibel long man husat i as bilong olgeta pen na hevi, em i tok: “Na ol i tromoi dispela traipela snek i go daun, em dispela snek bilong bipo yet, ol i kolim em Devil na Satan. Em man i save giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em. . . . Yu graun na yu solwara, yupela lukaut, long wanem, Satan i kam daun pinis long yupela, na em i belhat nogut tru, em i save em i gat sotpela taim tasol bilong i stap.” (Revelesen 12:9, 12) Planti man i ritim Baibel, na dispela i helpim ol long luksave olsem Satan em wanpela spirit tru, na em i kontrolim olgeta man long dispela graun.

Olsem wanem yu inap sakim Satan? Neks atikol bai stori long sampela gutpela rot bilong helpim yu long mekim olsem.