Mama i karim mi long Baku, Asebaijan, na mi namba 2 bilong tupela pikinini. Papa bilong mi em Muslim, na mama em meri Juda. Papamama i laikim tru narapela narapela, olsem na ol i rispektim bilip bilong narapela. Olsem, mama i save rispektim papa taim em i tambu long kaikai long ol bikpela de bilong Ramadan, na papa i mekim wankain pasin taim mama i mekim Pasova. Mipela i gat buk bilong ol Muslim em Koran, na buk bilong ol Juda em Tora, na tu, mipela i gat Baibel.

Mi tingim mi yet olsem wanpela Muslim. Mi bilip olsem God i stap, tasol mi gat sampela askim. Olsem, ‘Bilong wanem God i wokim ol man? Na i gat wanem as na ol man i save karim pen na hevi inap long ol i dai na bihain ol i kisim pen inap oltaim oltaim long helpaia?’ Ol man i tok olgeta samting i kamap em laik bilong God. Olsem na mi ting, ‘God i as bilong ol hevi na em i amamas taim ol man i karim ol pen na hevi?’

Taim mi gat 12-pela krismas, mi kirap long mekim beten namas, em 5-pela beten ol Muslim i save mekim long olgeta de. Long dispela taim, papa i salim mi na susa bilong mi i go long skul bilong ol Juda. Ol i skulim mipela long ol bilip bilong Tora na tok Hibru. Paslain long skul i kirap mipela i save beten bikos em pasin bilong ol Juda. Olsem na long moning mi save mekim beten namas long haus, na bihain mi insait long ol beten bilong ol Juda long skul.

Mi gat bikpela laik long painim bekim bilong ol askim bilong mi. Planti taim mi askim ol rabai long skul olsem: “Wai God i bin wokim ol man? God i gat wanem tingting long papa bilong mi? Papa bilong mi i gutpela man, olsem na wai God i ting em i man nogut? Wai God i wokim em?” Ol tok bilong ol i no bekim ol askim bilong mi.

Long 2002, mi lusim pasin bilong bilip long God. Mipela i lusim ples na go sindaun long Jemani, na wanpela wik bihain, papa i kisim sik strok na em i hap indai. Inap planti yia mi bin beten long famili bilong  mi i ken gat gutpela helt na ol i ken stap gut. Mi bilip olsem God i Gat Olgeta Strong, em wanpela tasol inap givim laip long man na daunim dai, olsem na long olgeta de mi beten long God i ken helpim papa bilong mi long stap laip. Mi tingting, ‘God bai harim beten bilong mi, long wanem, em liklik samting tasol.’ Mi bilip tru olsem God bai harim beten bilong mi, tasol papa bilong mi i dai.

Mi bel hevi tru na mi pilim olsem God i no tingim mi. Mi tingting, ‘Ating beten bilong mi i no stret, o God i no stap tru.’ Mi tingting planti na mi lusim pasin bilong mekim beten namas. Tok ol narapela lotu i skulim mi long en i no stret, olsem na mi pilim olsem God i no stap tru.

Sikspela mun bihain, ol Witnes Bilong Jehova i kam long haus bilong mipela. Mipela i no laikim ol lotu Kristen, olsem na long gutpela pasin mi na susa bilong mi i laik soim ol olsem bilip bilong ol i kranki. Mipela i askim ol: “Bilong wanem ol Kristen i lotuim Jisas, kruse, Maria, na ol narapela imis, tasol Tenpela Lo i tambuim dispela pasin?” Long rot bilong Baibel, ol Witnes i helpim mipela long luksave olsem i tambu long ol Kristen tru i lotuim ol imis. Na tu, mipela i kisim save olsem yumi mas beten long God wanpela tasol. Mi kirap nogut long save long dispela.

Orait nau mipela i askim ol: “Olsem wanem long bilip bilong God Triwan? Sapos Jisas em i God, olsem wanem em inap stap long graun na ol man i kilim em i dai?” Ol i yusim Baibel long bekim ol dispela askim bilong mipela. Ol i tok, Jisas i no God i Gat Olgeta Strong, na tu, em i no wankain olsem God. Ol Witnes i tok ol dispela tok bilong Baibel i as na ol i no bilip long God Triwan. Mi kirap nogut long ol tok bilong ol na mi tingting, ‘Dispela lain em ol narapela kain Kristen tru.’

Tasol mi laik save long as na ol man i save dai, na wai God i larim pen na hevi i stap. Ol Witnes i soim mi buk Save i Bringim Man Long Laip Oltaim, a dispela buk i gat ol sapta i bekim ol askim bilong mi. Kirap long dispela taim stret dispela tupela Witnes i stadi long Baibel wantaim mi.

Long olgeta stadi mipela i mekim, mi kisim ol bekim bilong ol askim bilong mi long Baibel. Mi kisim save olsem nem bilong God em Jehova. (Song 83:18) Nambawan pasin bilong em, em pasin laikim. (1 Jon 4:8) God i givim laip olsem presen long ol man. Na tu, mi kisim save olsem God i larim pasin nogut i stap, tasol em i heitim tru dispela pasin, olsem na klostu nau em bai pinisim olgeta dispela pasin. Mi kisim save olsem pasin bikhet bilong Adam na Iv i as bilong olgeta hevi bilong ol man. (Rom 5:12) Wanpela bilong ol dispela hevi em dai we i save painim ol man em yumi laikim tru. Kain hevi olsem i kamap taim papa bilong mi i dai. Tasol long nupela taim bai kamap bihain, God bai pinisim ol hevi bilong sik na dai na ol manmeri i dai pinis ol bai kirap bek.—Aposel 24:15.

Ol tok i tru bilong Baibel i bekim ol askim bilong mi. Olsem na mi kirap gen long bilip long God. Taim mi wok long save gut long ol Witnes Bilong Jehova, mi kisim save olsem ol i insait long wanpela bikpela lain brata i stap long olgeta hap bilong graun. Mi kirap nogut long lukim olsem pasin wanbel na pasin laikim i stap namel long ol. (Jon 13:34, 35) Save mi kisim long Jehova i kirapim mi long mekim wok bilong em, olsem na long Janueri 8, 2005 mi kisim baptais olsem wanpela Witnes Bilong Jehova.

Ol tok i tru bilong Baibel i helpim mi long senisim tingting na i stap bilong mi na bai mi ken i stap gut. Mi kisim save long ol gutpela tok i stap long Baibel na dispela i mekim mi stap bel isi. Mi amamas, long wanem, mi bilip na wet long lukim gen papa bilong mi taim em i kirap bek long nupela taim olsem Baibel i tok promis long en.—Jon 5:28, 29.

Inap 6-pela yia nau mi marit long Jonathan, em man i stap aninit long God. Mitupela i kisim save olsem tok i tru bilong God i klia tru na yumi inap kisim gut ol tok bilong en, na dispela i olsem wanpela gutpela presen. Olsem na mipela i amamas long kamapim bilip bilong mipela long ol arapela na tokim ol long gutpela samting mipela i wet long en. Long nau mi save olsem ol Witnes Bilong Jehova i Kristen tru.