Jisas i kisim bek ol gutpela manmeri taim em i givim laip bilong em olsem pe bilong baim bek ol man. (Matyu 20:28) Olsem na Baibel i kolim Jisas olsem “seivia bilong ol manmeri.” (1 Jon 4:​14) Na Baibel i tok tu olsem: “I no gat narapela man inap kisim bek yumi, long wanem, i no gat narapela nem long graun em God i makim namel long ol manmeri bilong kisim bek yumi.”​—Aposel 4:​12.

 Jisas i “kisim ples bilong olgeta manmeri na i dai,” em ol manmeri i bilip long em. (Hibru 2:9; Jon 3:​16) Na bihain, “God i kirapim em bek long dai,” na Jisas i go bek long heven olsem wanpela spirit. (Aposel 3:​15) Jisas i stap long heven na “em inap tru long kisim bek ol manmeri husat i kam long God long rot bilong em, long wanem, oltaim em i stap laip bai em i ken beten bilong helpim ol.”​—Hibru 7:​25.

Bilong wanem Jisas i mas beten bilong helpim yumi?

 Yumi olgeta i sin manmeri. (Rom 3:​23) Sin i pasim rot bilong yumi long i go klostu long God, na pe bilong sin em dai. (Rom 6:​23) Tasol Jisas i stap olsem “sapota” bilong ol manmeri i bilip long ofa bilong em long baim bek ol man. (1 Jon 2:1, futnot) Jisas i bin i dai na givim laip bilong em olsem ofa, na long rot bilong dispela ofa, em i save beten long helpim ol manmeri na askim God long harim beten bilong ol na lusim rong bilong ol. (Matyu 1:​21; Rom 8:​34) Ol dispela beten bilong Jisas i stret wantaim laik bilong God, olsem na God i save harim ol dispela beten. God i bin salim Jisas i kam daun long graun bambai em inap “kisim bek ol manmeri long rot bilong em.”​—Jon 3:​17.

Yu ting pasin bilong bilip long Jisas, dispela tasol bai kisim bek yumi?

 Nogat. Maski yumi bilip long Jisas, yumi mas mekim sampela samting moa na bai God inap kisim bek yumi. (Aposel 16:30, 31) Baibel i tok: “Bodi i no gat strong bilong laip i stap long en, em i dai pinis. Olsem tasol, bilip i no kamapim ol gutpela wok, dispela bilip i dai pinis.” (Jems 2:​26) Sapos yumi laik bai God i kisim bek yumi, orait yumi mas:

•   Kisim save long Jisas na Papa bilong em, Jehova.​—Jon 17:3.

•   Kisim pasin bilong bilip long tupela.​—Jon 12:44; 14:1.

•   Soim klia bilip bilong yumi taim yumi bihainim tok bilong tupela. (Luk 6:​46; 1 Jon 2:​17) Jisas i tok maski ol manmeri i kolim em olsem “Bikpela,” dispela i no makim olsem God bai kisim bek olgeta bilong ol, nogat. Jisas i tok olsem God bai kisim bek ol manmeri i “bihainim laik bilong Papa bilong [em] long heven.”​—Matyu 7:​21.

•   Yumi mas mekim yet ol samting i kamapim klia bilip bilong yumi maski yumi bungim hevi. Jisas i kamapim klia dispela taim em i tok: “Man i sanap strong i go inap long pinis, God bai kisim bek em.”​—Matyu 24:13.