Vakorinto Wo Sungula 7:1-40
7 Loko ku ri timhaka leti mi ndzi tsaleleke ha tona ndzi nga ku, swa antswa leswaku wanuna a nga n’wi khumbi* wansati;
2 kambe hikwalaho ka ku andza ka ku tikhoma ko biha hi swa masangu,* wanuna un’wana ni un’wana a a ve ni nsati wakwe+ ni wansati un’wana ni un’wana a a ve ni nuna wakwe.+
3 Wanuna a a nyike nsati wakwe mfanelo yakwe ni wansati a a endle hilaha ku fanaka eka nuna wakwe.+
4 Wansati a hi yena a lawulaka miri wa yena kambe wu lawuriwa hi nuna wakwe; hilaha ku fanaka ni wanuna a hi yena a lawulaka miri wa yena kambe wu lawuriwa hi nsati wakwe.
5 Mi nga tsonani, handle ka loko mi lo pfumelelana hi vumbirhi bya n’wina ku ringana nkarhi wo karhi leswaku mi ta tinyika nkarhi wo khongela kutani mi tlhela mi hlangana, leswaku Sathana a nga tshameli ku mi ringa hikwalaho ka ku tsandzeka ku tikhoma.
6 Hambiswiritano, mi nga endla leswi ndzi swi vuleke kambe a hi nawu.
7 Kambe ndzi navela leswaku vanhu hinkwavo va fana na mina. Nilokoswiritano, un’wana ni un’wana u ni nyiko+ yakwe leyi humaka eka Xikwembu, hi yona mhaka ku nga ni lava nghenelaka vukati ni lava nga byi ngheneliki.
8 Kutani ndzi byela lava nga tekangiki kumbe ku tekiwa ni tinoni leswaku swa antswa loko va tshama va ri voxe ku fana na mina.+
9 Kambe loko va nga swi koti ku tikhoma, a va teke kumbe va tekiwa hikuva swa antswa ku va va teka kumbe va tekiwa ku ri ni ku hisiwa hi ku navela.+
10 Vanhu lava tekaneke ndzi va nyika swiletelo, ku nga ri mina kambe i Hosi, leswaku wansati a nga hambani ni nuna wakwe.+
11 Kambe loko a hambana na yena, a a tshame a nga tekiwi kumbe a tlhela a vuyelelana ni nuna wakwe; naswona wanuna a nga fanelanga a tshika nsati wakwe.+
12 Kambe eka van’wana, mina, ku nga ri Hosi, ndzi ri:+ Loko makwerhu a ri ni nsati loyi a nga riki mupfumeri kambe nsati yoloye a tiyimisele ku tshama na yena, a nga n’wi tshiki;
13 naswona loko wansati a ri ni nuna loyi a nga riki mupfumeri, kambe nuna yoloye a tiyimisele ku tshama na yena, a nga n’wi tshiki nuna wakwe.
14 Hikuva wanuna loyi a nga riki mupfumeri u kwetsimisiwa hikwalaho ka nsati wakwe naswona wansati loyi a nga riki mupfumeri u kwetsimisiwa hikwalaho ka nuna wakwe loyi a nga mupfumeri; loko swi nga ri tano, vana va n’wina a va ta va lava nga basangiki, kambe sweswi va kwetsima.
15 Kambe loko loyi a nga riki mupfumeri a hlawula ku hambana na yena, a a hambane na yena; makwerhu wa xinuna kumbe wa xisati a nga boheki eka swiyimo swo tano, kambe Xikwembu xi mi vitanele eku rhuleni.+
16 Hikuva wena wansati u swi tivisa ku yini, kumbexana u ta ponisa nuna wa wena?+ Kumbe, wena wanuna u swi tivisa ku yini, kumbexana u ta ponisa nsati wa wena?
17 Nilokoswiritano, un’wana ni un’wana a a hanye hilaha Yehovha* a n’wi nyikeke hakona, a a fambe hilaha Xikwembu xi n’wi vitaneke hakona.+ Nawu lowu ndzi wu nyika mavandlha hinkwawo.
18 Xana ku ni munhu loyi a vitaniweke a yimbile?+ A a tshamise sweswo. Xana ku ni munhu loyi a vitaniweke a nga yimbanga? A nga yimbi.+
19 Ku yimba a hi nchumu ni ku ka u nga yimbi a hi nchumu;+ leswi nga swa nkoka i ku hlayisa swileriso swa Xikwembu.+
20 Munhu a a tshame eka xiyimo xin’wana ni xin’wana lexi a vitaniweke a ri eka xona.+
21 Xana u vitaniwe u ri hlonga? Sweswo swi nga ku karhati;+ kambe loko swi koteka ku va u tshunxeka, endla tano.
22 Hikuva un’wana ni un’wana loyi a vitaneriweke eHosini a ri hlonga, i munhu wa Hosi loyi a tshunxiweke;+ hilaha ku fanaka loyi a vitaniweke a ri munhu loyi a tshunxekeke i hlonga ra Kreste.
23 Mi xaviwe hi nxavo;+ tshikani ku va mahlonga ya vanhu.
24 Vamakwerhu, munhu a a tshame eka xiyimo xin’wana ni xin’wana lexi a vitaniweke a ri eka xona emahlweni ka Xikwembu.
25 Loko swi ta eka lava nga si tshamaka va teka kumbe ku tekiwa a ndzi na xona xileriso lexi humaka eka Hosi, kambe ndzi vula mavonelo ya mina+ tanihi loyi a kombiweke tintswalo hi Hosi leswaku ndzi va loyi a tshembekaka.
26 Hikwalaho, ndzi ehleketa leswaku i swinene ku va munhu a tshamisa sweswo hikuva hi hanya emikarhini yo tika.
27 Xana u ni nsati? U nga n’wi tshiki.+ Xana a wu na nsati? U nga n’wi lavi.
28 Kambe loko u nghenela vukati, u ta va u nga endli xidyoho. Naswona loko munhu loyi a nga tekangiki kumbe ku tekiwa a nghenela vukati u ta va a nga endli xidyoho. Hambiswiritano, lava tekaka ni ku tekiwa va ta va ni nhlomulo enyameni. Kambe ndzi ringeta ku mi sirhelela.
29 Ku tlula kwalaho vamakwerhu, ndzi ri, nkarhi lowu saleke wu komile.+ Ku sukela sweswi, lava tekeke a va endle onge a va tekanga,
30 lava rilaka a va endle onge a va rili, lava tsakeke a va endle onge a va tsakanga, lava xavaka a va endle onge a va na nchumu
31 ni lava tirhisaka misava leyi va nga yi tirhisi hi xitalo; hikuva xiyimo xa misava leyi xa cinca.
32 Kunene, ndzi lava leswaku mi nga vileli. Wanuna loyi a nga tekangiki u vilela hi swilo swa Hosi, hi ndlela leyi a nga tsakisaka Hosi ha yona.
33 Kambe wanuna loyi a tekeke u vilela hi swilo swa misava,+ hi ndlela leyi a nga n’wi tsakisaka ha yona nsati wakwe
34 naswona wa kavanyeteka. Ku tlula kwalaho, wansati loyi a nga tekiwangiki kumbe nhwana, u vilela hi swilo swa Hosi+ leswaku a kwetsima emirini ni le moyeni wakwe. Kambe wansati loyi a tekiweke u vilela hi swilo swa misava, hi ndlela leyi a nga n’wi tsakisaka ha yona nuna wakwe.
35 Leswi ndzi swi vulela ku mi pfuna, ku nga ri ku mi sivela.* Kambe ndzi mi byelela leswaku mi ta kota ku endla leswi faneleke ni ku tirhela Hosi nkarhi hinkwawo mi nga kavanyetiwi hi nchumu.
36 Kambe loko munhu loyi a nga tekangiki kumbe ku tekiwa a nga swi koti ku lawula ndlela leyi a navelaka ha yona timhaka ta masangu naswona se a kule ku ringana, leswi a faneleke a swi endla hi leswi: A endle leswi a swi rhandzaka; a nga dyohi. A a teke kumbe a tekiwa.+
37 Kambe loko munhu a tiyimiserile embilwini yakwe naswona a vona swi nga bohi ku teka kumbe ku tekiwa, a tlhela a kota ku lawula ku navela kakwe, naswona a endle xiboho embilwini yakwe leswaku u ta tshama a nga tekanga kumbe ku tekiwa, u ta va a endla kahle.+
38 Kutani ni loyi a tekaka kumbe ku tekiwa u endla kahle, kambe loyi a tshamaka a ri yexe u endla kahle ngopfu.+
39 Wansati u boheka ku tshama ni nuna wakwe loko nuna wakwe a ha hanya.+ Kambe loko nuna wakwe a fa, u tshunxekile ku tekana ni loyi a n’wi lavaka kambe a ku ve eHosini ntsena.+
40 Kambe hi ku ya hi vonelo ra mina, wa tsaka swinene loko a tshamisa sweswo; kahlekahle ndzi ehleketa leswaku na mina ndzi na wona moya wa Xikwembu.
Tinhlamuselo ta le hansi
^ Ku nga ku endla timhaka ta masangu ni.
^ I vunyingi bya rito ra Xigriki por·nei′a. Vona Tinhlamuselo.
^ Vona Xiengetelo A5.
^ Hi Xigriki, “ku mi rhiya hi ntlhamu.”
