Yeremiya 38:1-28
38 Xefatiya n’wana wa Matani, Gedaliya n’wana wa Paxahuru, Yukala+ n’wana wa Xelemiya na Paxahuru+ n’wana wa Malikiya va twa marito lawa Yeremiya a a ma byela vanhu hinkwavo a ku:
2 “Yehovha u ri, ‘Loyi a salaka emutini lowu u ta dlayiwa hi banga, ndlala ni ntungu.*+ Kambe loyi a tinyiketaka* eka Vakalidiya u ta ya emahlweni a hanya naswona u ta ponisa vutomi byakwe.’+
3 Yehovha u ri, ‘Entiyisweni muti lowu wu ta nyiketiwa eka masocha ya hosi ya le Babilona, yi ta wu teka.’”+
4 Tihosana ti byela hosi ti ku: “Hi kombela leswaku wanuna loyi a dlayiwa+ hikuva u heta masocha lama saleke emutini lowu matimba, ku katsa ni vanhu hinkwavo hi ku va byela marito lawa. Hikuva wanuna loyi u lava leswaku vanhu va nga vi na ku rhula kambe va weriwa hi khombo.”
5 Hosi Sedekiyasi a ku: “U le mavokweni ya n’wina hikuva a xi kona lexi hosi yi nga xi endlaka leswaku yi mi sivela.”
6 Hiloko tihosana ti teka Yeremiya ti n’wi hoxa exihlobyeni xa Malikiya n’wana wa hosi, lexi a xi ri eXivaveni* xa Murindzi.+ Ti rhelerisa Yeremiya hi tintambhu. Kambe a ku nga ri na mati exihlobyeni, a ku ri ni ndzhope kutani Yeremiya a mbombomela endzhopeni.
7 Ebedi-meleke+ loyi a a ri Muetiyopiya, mutirhi wa le hubyeni endlwini ya hosi, u twe leswaku Yeremiya u hoxiwe exihlobyeni. Hosi a yi tshame eGedeni ya Benjamini,+
8 hiloko Ebedi-meleke a huma endlwini ya hosi, a fika a vulavula ni hosi a ku:
9 “Hosi yanga, leswi vavanuna lava va swi endleke eka muprofeta Yeremiya swi bihe ngopfu! Va n’wi lahlele exihlobyeni naswona u ta fela kwalaho hikwalaho ka ndlala, hikuva a ka ha ri na xinkwa emutini.”+
10 Hosi yi lerisa Ebedi-meleke loyi a a ri Muetiyopiya yi ku: “Teka vavanuna va 30 laha mi ya humesa muprofeta Yeremiya exihlobyeni a nga si fa.”
11 Ebedi-meleke a teka vavanuna kutani a nghena endlwini ya hosi ekamareni leri nga le hansi ka ndhawu leyi ku vekiwaka xuma eka yona,+ va teka switlakati va swi rhelerisa eka Yeremiya exihlobyeni hi tintambhu.
12 Ebedi-meleke loyi a a ri Muetiyopiya a byela Yeremiya a ku: “Ndzi kombela u nghenisa switlakati emakeheleni* ya wena leswaku tintambhu ti nga ku tsemi.” Yeremiya a endla tano,
13 hiloko va koka Yeremiya hi tintambhu va n’wi humesa exihlobyeni. Kutani Yeremiya a ya emahlweni a tshama eXivaveni xa Murindzi.+
14 Hosi Sedekiyasi a rhumela vanhu leswaku va ya vitana muprofeta Yeremiya leswaku a ta eka yena enyangweni ya vunharhu, leyi nga endlwini ya Yehovha, kutani hosi yi byela Yeremiya yi ku: “Ndzi lava ku ku vutisa swin’wana. U nga ndzi fihleli nchumu.”
15 Yeremiya a hlamula Sedekiyasi a ku: “Loko ndzo ku byela, u ta ndzi dlaya. Kasi loko ndzo ku tsundzuxa, a wu nge ndzi yingisi.”
16 Hosi Sedekiyasi a hlambanyela Yeremiya va ri vambirhi a ku: “Leswi Yehovha a hanyaka, ku nga loyi a hi nyikeke vutomi lebyi, a ndzi nge ku dlayi naswona a ndzi nge ku nyiketi eka vanhu lava, lava lavaka ku ku dlaya.”
17 Yeremiya a byela Sedekiyasi a ku: “Yehovha Xikwembu xa mavuthu, Xikwembu xa Israyele u ri, ‘Loko wo tinyiketa* eka tihosana ta hosi ya le Babilona, u ta ponisa vutomi bya wena naswona muti lowu a wu nge hisiwi hi ndzilo ni ndyangu wa wena a wu nge dlayiwi.+
18 Kambe loko wo ka u nga tinyiketi* eka tihosana ta hosi ya le Babilona, muti lowu wu ta nyiketiwa eka Vakalidiya naswona va ta wu hisa hi ndzilo,+ a wu nge va balekeli.’”+
19 Hosi Sedekiyasi a byela Yeremiya a ku: “Ndzi chava Vayuda lava balekeleke eka Vakalidiya, hikuva loko ndzo nyiketiwa eka vona, va nga ha ndzi khoma hi ndlela ya tihanyi.”
20 Kambe Yeremiya a ku: “A wu nge nyiketiwi eka vona. Ndzi kombela u yingisa rito ra Yehovha leri ndzi ku byelaka rona, kutani swi ta ku fambela kahle naswona u ta ya emahlweni u hanya.
21 Kambe loko u ala ku tinyiketa* eka vona, Yehovha u ndzi paluxele leswi:
22 Yingisa, vavasati hinkwavo lava saleke endlwini ya hosi ya le Yuda va karhi va tisiwa eka tihosana ta hosi ya le Babilona+ naswona va ri,‘Vavanuna lava u va tshembaka va ku kanganyisile va tlhela va ku hlula.+
Va mbombomerise nenge wa wena endzhopeni.
Sweswi va tlherile.’
23 Vasati va wena hinkwavo ni vana va wena va majaha va va yisa eka Vakalidiya naswona wena a wu nge va balekeli kambe hosi ya le Babilona+ yi ta ku khoma naswona muti lowu wu ta hisiwa hi ndzilo hikwalaho ka wena.”+
24 Sedekiyasi a byela Yeremiya a ku: “U nga byeli munhu hi mhaka leyi leswaku u nga fi.
25 Loko tihosana to swi twa leswaku ndzi vulavule na wena ivi ti ta eka wena ti ku, ‘Hi kombela u hi byela leswi u swi byeleke hosi. U nga hi tumbeteli nchumu, a hi nge ku dlayi.+ Xana hosi yi ku byele yini?’
26 u fanele u ti hlamula u ku, ‘A ndzi kombela hosi leswaku yi nga ndzi tlheriseli endlwini ya Yonatani leswaku ndzi ya fela kona.’”+
27 Hi ku famba ka nkarhi tihosana hinkwato ti ta eka Yeremiya ti n’wi vutisa. U ti byele hinkwaswo leswi hosi yi n’wi leriseke leswaku a swi vula. Hiloko ti nga ha vuli swin’wana hikuva a nga kona loyi a tweke bulo ra vona.
28 Yeremiya u tshame eXivaveni xa Murindzi+ ku fikela siku leri muti wa Yerusalema wu tekiweke ha rona; a ha ri kwalaho loko muti wa Yerusalema wu tekiwa.+
Tinhlamuselo ta le hansi
^ Kumbe “vuvabyi.”
^ Hi Xiheveru, “yaka.”
^ Vona Tinhlamuselo.
^ Kumbe “emakhwapeni.”
^ Hi Xiheveru, “ya.”
^ Hi Xiheveru, “yi.”
^ Hi Xiheveru, “ya.”