HI 1948, mina ni nsati wa mina Paula ni n’wana wa hina wa nhwanyana hi sungule ku ya eminhlanganweni ya Timbhoni ta Yehovha eBlanco Arriba. A hi boheka ku famba 40 wa tikhilomitara ku ya ni ku vuya, kambe ku hava siku ni rin’we leri hi nga tshama hi xwa eminhlanganweni. Hi January 3, 1949, mina na Paula hi khuvuriwile.

Endzhaku ka tin’hweti ta tsevu van’wana evandlheni va khomiwile kutani va gweviwa ku tshama tin’hweti tinharhu ekhotsweni. A hi boheka ku etlela ehansi naswona a hi nyikiwa mabanana mambisi na tiya kan’we hi siku. Loko hi ntshunxiwa ekhotsweni, vatirhela-mfumo va hi xungetile, va ehleketa leswaku hi ta tshika ku chumayela. Kambe loko hi tlhelela ekaya, hi sungule ku tlhela hi ya eminhlanganweni ni ku chumayela exihundleni. Tanihi leswi vatirhela-mfumo a va tshama va hi veke tihlo, a hi hlangana emakaya ya vamakwerhu, emapurasini ya kofi kumbe emapurasini. Ematshan’weni ya leswaku hi khomela minhlangano endhawini yin’we, loko hi gimeta minhlangano a hi tivisiwa ndhawu leyi hi  nga ta khoma minhlangano leyi landzelaka eka yona. Loko hi ya eku chumayeleni, a hi famba hi un’we un’we; a hi ambala swiambalo swa ntirho naswona a hi nga yi tirhisi minkandziyiso kumbe Bibele. Nilokoswiritano, exikarhi ka 1949 na 1959, ndzi pfaleriwe eka makhotso yo hambana-hambana ku ringana ka nkombo laha eka rin’we ra wona ndzi pfaleriweke tin’hweti tinharhu ku ya eka tsevu.

A ndzi fanele ndzi tshama ndzi xalamukile swinene hikuva van’wana va lava a va ndzi xanisa a ku ri maxaka ya mina. Hambileswi a ndzi etlela etintshaveni ni le mapurasini leswaku ndzi papalata ku khomiwa, minkarhi yin’wana a ndzi khomiwa. Endzhaku ko khomiwa ro sungula, ndzi yisiwe ekhotsweni ra La Victoria le Ciudad Trujillo, laha a ku ri ni vabohiwa va 50 ku ya eka 60 exitokisini. Kwalaho a hi kuma swakudya kambirhi hi siku, nimixo a hi dya mukapu kasi nimadyambu a hi dya rhayisi yitsongo ni tinyawa. Timbhoni hinkwato a ti chumayela vabohiwa-kulobye naswona a ti khoma minhlangano nkarhi ni nkarhi leyi a yi fambisiwa hi ku bula hi tindzimana ta Bibele leti ti ti nhlokohateke ni ku hlamusela mintokoto ya le nsin’wini ya hina.

Loko ndzi khomiwa ro hetelela, socha rin’wana ri ndzi be nhloko ni timbambu hi le ndzhaku ka xibamu. Hambileswi ni sweswi ndzi twaka ku vava hikwalaho ko biwa ni ku khomiwa hi ndlela yo biha, kambe miringo yoleyo yi tiyise ripfumelo, ku tiyisela ni ku tiyimisela ka mina ku tirhela Yehovha.

Sweswi ndzi ni malembe ya 96 naswona ndzi nandza wa vutirheli evandlheni. Hambileswi ndzi nga kotiki ku famba mpfhuka wo leha, ndzi tshama emahlweni ka yindlu ya mina kutani ndzi chumayela vanhu hinkwavo lava hundzaka hi ndlela. Ntshembo wa Mfumo a hi norho eka mina. I wa xiviri naswona ndzi ni malembe yo tlula 60 ndzi ri karhi ndzi chumayela hi wona. Misava leyintshwa i ya xiviri eka mina hilaha a swi ri hakona loko ndzi twa rungula ra Mfumo ro sungula. *