HI April 14, 1989, a ndzi fambisa minhlangano edorobeni ra Maumere, eXihlaleni xa Flores, loko vatirhelamfumo va nghena endlwini kutani va ndzi khoma swin’we ni vanhu van’wana vanharhu.

Valanguteri va khotso ra kwalaho va hi sindzise ku losa mujeko. Loko hi ala, a va hi ba kutani va hi yimisa kwalomu ka masiku ya ntlhanu edyambyini leri vavulaka. Nivusiku a hi rhurhumela eka tifulorho ta switokisi leswitsongo leswi a hi pfaleriwe eka swona, leswi thyakeke, hi karhele ni ku tlhela hi va ni switlhavi eka timbanga ta hina. Mulanguteri wa khotso u hi byele hi ku phindhaphindha leswaku hi landzula ripfumelo ra hina, kambe hi hlamule hi ku: “A hi nge losi mujeko, kukondza hi fa.” Ku fana ni Vakreste va ntsandzavahlayi va nkarhi lowu nga hundza, i lunghelo eka hina ku “xaniseka hikwalaho ka ku lulama.”​—1 Pet. 3:14.