Loko Olivia la tshamaka eAustralia a ha ri exikolweni xa le hansi, u rhambe mudyondzisi wakwe eXitsundzuxweni. Lembe ni lembe ku ringana malembe ya nhungu, Olivia u ye emahlweni a rhamba mudyondzisi wakwe. Eku heteleleni hi 2016, mudyondzisi wakwe u n’wi bele riqingho a n’wi byela leswaku a nga swi tsakela ku va kona. U vule leswaku u titwe a  hlawulekile hi leswi Olivia a a n’wi rhamba lembe ni lembe. Kutani mudyondzisi loyi u yile eXitsundzuxweni, swin’we ni nuna wakwe. Leswi nuna wakwe a a tirha eka huvo ya doroba rolero u fike a tsundzuka nkarhi lowu Holo ya Mfumo a yi akiwa ha wona. U byele vamakwerhu leswaku u tsakisiwe hi ndlela leyi tsima ro aka Holo ya Mfumo a ri hleleke ha yona. Mudyondzisi loyi swin’we ni nuna wakwe va tiphinile swinene lerova va ve van’wana va vanhu vo hetelela ku famba.

Jacintu ni nsati wakwe va tshama eTimor-Leste. Tanihi Makhatoliki lama hisekaka a va hlundzukile loko n’wana wa buti wa Jacintu a va Mbhoni ya Yehovha naswona a nga ha gandzeli ni va ndyangu wa ka vona. Leswi a va lava ku n’wi kombisa leswaku u le ka vugandzeri lebyi hoxeke, Jacintu u teke xiboho xo hlaya buku leyi nge Xana Bibele Yi Dyondzisa Yini Hakunene? Xikongomelo xakwe a ku ri leswaku a kuma tidyondzo ta mavunwa. Endzhakunyana u byele nsati wakwe a ku: “Ndzi yi hlayile buku. Kambe a ndzi kumanga nchumu.”

Nsati wakwe u hlamule a ku: “U fanele u nga yi hlayanga kahle. Tlhela u yi hlaya u nga jahanga.”

Jacintu u tlhele a yi hlaya hiloko a byela nsati wakwe a ku: “A ku na nchumu.” U tlhele a ku: “Hinkwaswo swi sekeriwe eBibeleni. Hambileswi yi swi vulaka malunghana ni ku gandzela lava feke swi huma eBibeleni.”

Nsati wakwe u te: “Tlhela u yi hlaya ra vunharhu, kambe sweswi khwatihata ndzimana yin’wana ni yin’wana—yi hlaye hi vukheta. Xi kona lexi hoxeke.”

 Jacintu u hlaye buku leyi hi vukheta, a khwatihata ndzimana yin’wana ni yin’wana. Endzhaku ka loko a yi hlaye ra vunharhu u te: “Hinkwaswo ka swona i ntiyiso! N’wana wa buti a a tiyisile.” Sweswi Jacintu u dyondza Bibele ni Timbhoni ta Yehovha.

Makwerhu wa xisati la nga phayona la tshamaka eGuam, u endzele wansati un’wana wa Mupohnpeia ivi a n’wi komba vhidiyo leyi nge Ha Yini U Fanele U Dyondza Bibele? Makwerhu wa xisati u n’wi byele leswaku u ta tlhela a vuya. Hambileswi a tlheleleke minkarhi yo tala, a nga n’wi kumi wansati loyi ekaya. Loko siku rin’wana a kume xinhwanyatana xa wansati loyi ekaya, makwerhu u xi kombe vhidiyo leyi nga eka ntlhandlamano wa tivhidiyo leti nge Vana Munghana Wa Yehovha. Xinhwanyatana lexi xi yi tsakerile swinene. Enkarhini lowu landzeleke loko makwerhu  a tlhelela, mana wa xona a ri kona ekaya naswona u ri tsakerile rungula ra Bibele. Kahlekahle xinhwanyatana lexi a xi byele mana wa xona leswaku va fanele va ya ekerekeni ya wansati loyi a nga xi komba vhidiyo. Leswi swi endle leswaku mana wa xona a tsakela. Va fambiseriwe dyondzo ya Bibele naswona ku hleriwe leswaku va ya emahlweni na yona.

Terence la nga mulanguteri wa muganga, u fambe ni nsati wakwe Stella leswaku va ya eInakor, ku nga nsimu leyi nga aviwangiki ePapua New Guinea. Terence u ri: “Loko ha ha etlele nimixo wa siku ro sungula hi ri kwalaho, hi twe ku gongondziwa enyangweni. Vanhu vo tala  a va hi rindzile ehandle, kutani hi sungule ku va chumayela ku sukela hi awara ya tsevu ku fikela ninhlikanhi. Hi tshike ku chumayela leswaku hi ta hlamba, loko hi heta hi kume leswaku ku ni vanhu vo tala lava a va hi rindzile. Kutani hi tlhele hi sungula ku chumayela ku sukela nindzhenga ku fikela nivusiku.” Hi siku leri landzeleke, vatekani lava va teke xiboho xo famba ka ha ri mixo leswaku va ya endhawini yin’wana. Vanhu vo tala va tlhele va ya endhawini leyi a va hirhe eka yona, kambe a va va kumanga. Terence u ri: “Loko va xiye leswaku a hi kona va fambe va hi lava ivi va hi kuma. Nakambe hi tlhele hi chumayela ku fikela ninhlikanhi. Loko hi tlhelela endhawini leyi a hi hirhe eka yona, hi kume leswaku ku ni ntlawa wun’wana lowu a wu hi rindzile. Siku ni siku a ku endleka nchumu lowu fanaka. Vanhu va kwalaho a va ‘fana ni tinyimpfu leti nga riki na murisi.’”—Mat. 9:36.

Agnès la nga phayona leri tshamaka eNew Caledonia, a a fanele a ya eka muongori hikwalaho ka leswi voko rakwe a ri vava. Loko a ri karhi a ongola Agnès, u n’wi byele leswaku u vona vanhu vo tala va ri karhi va xaniseka kutani wa tivutisa loko Xikwembu xi ri ni tihanyi. Agnès u nkhense Yehovha embilwini hi leswi a kumeke nkarhi wo n’wi yimelela. Kutani u kombe muongori wakwe xiphephana lexi nge Xana Ku Xaniseka Ku Ta Kala Ku Hela? ni ku tlhela a n’wi hlayela Nhlavutelo 21:3, 4.

Muongori u te: “A ndzi tiyiseki loko ndzimana leyi u yi hlayeke yi ri kona eBibeleni ya mina tanihi leswi yi nga na Tievhangeli ntsena.” Hi ku xiya leswaku Agnès i Mbhoni ya Yehovha, u n’wi byele leswaku u tshame a hlangana ni Timbhoni endhawini leyi a humaka eka yona eChile.

 Agnès u nambe a tsundzuka xiviko xa rhavi ra le Chile lexi kombiweke eka JW Broadcasting. Eka riendzo rakwe leri landzeleke, u fambe ni tablet yakwe ivi a komba muongori wakwe vhidiyo ya xiviko lexi. Muongori a khumbekile swinene loko a vona Bethele ni Holo ya Tinhlengeletano swa le Chile. Endzhakunyana, Agnès u te: “Hi lowu nchumu wun’wana lowu ndzi lavaka ku ku nyika wona, ku nga Bibele leyi heleleke leswaku u ta kota ku hlaya tsalwa ra Nhlavutelo 21:3, 4 leri ndzi ku hlayeleke rona vhiki leri nga hundza!” Muongori loyi a tsakile swinene hiloko a angarha Agnès kutani a ku: “Ndza ti nkhensa swinene tinyiko leti timbirhi to tsakisa!”

Eka riendzo leri landzeleke Agnès u n’wi yisele buku leyi nge Xana Bibele Yi Dyondzisa Yini Hakunene? ni ku tlhela a n’wi hlamusela xivangelo lexi endlaka leswaku ku va ni ku xaniseka emisaveni. Muongori u n’wi byele leswaku u ta suka eNew Caledonia a ya eku wiseni eChile kutani u ta famba ni buku leyi leswaku a ta yi hlaya hinkwayo.