XIYENGE 5
Ndlela Yo Va Ni Ku Rhula Ni Maxaka Ya Wena
“Tiambexeni . . . musa, mianakanyo yo titsongahata, ku rhula, ni ku va ni mbilu yo leha.”—Vakolosa 3:12
Loko vanhu va tekana va sungula ndyangu lowuntshwa. Hambileswi minkarhi hinkwayo u nga ta rhandza ni ku xixima vatswari va wena, kambe sweswi nkataku hi yena munhu wa nkoka eka wena emisaveni. Leswi swi nga ha ma tikela maxaka ya wena man’wana ku swi amukela. Kambe milawu leyi kongomisaka ya le Bibeleni yi nga ku pfuna ku ringanisela, leswaku u va ni ku rhula ni maxaka ya wena loko u ri karhi u tikarhatela ku aka ndyangu wa wena lowuntshwa.
1 TSHAMA U RI NI LANGUTELO LERINENE HI MAXAKA YA WENA
LESWI BIBELE YI SWI VULAKA: “Xixima tata wa wena ni mana wa wena.” (Vaefesa 6:2) Ku nga khathariseki leswaku u ni malembe mangani, minkarhi hinkwayo u fanele u xixima vatswari va wena. Tsundzuka leswaku nkataku na yena u fanele a xixima vatswari va yena. “Rirhandzu a ri na mavondzo,” kutani u nga khunguvanyisiwi hi vuxaka lebyi nkataku a nga na byona na vona.—1 Vakorinto 13:4; Vagalatiya 5:26.
LESWI U NGA SWI ENDLAKA:
-
Papalata marito yo fana ni lama nge, “Va ka n’wina minkarhi hinkwayo va ndzi khomisa tingana” kumbe “Mana wa wena a nga si tshama a swi tsakela leswi ndzi swi endlaka”
-
Ringeta ku vona swilo hilaha nkataku a swi vonaka hakona
2 TIYISA VOKO LOKO SWI FANERILE
LESWI BIBELE YI SWI VULAKA: “Wanuna u ta siya tata wakwe ni mana wakwe naswona u fanele ku namarhela nsati wakwe, kutani va fanele va va nyama yin’we.” (Genesa 2:24) Loko u nghenela vukati, vatswari va wena va nga ha vona onge va ha ri ni vutihlamuleri eka wena naswona va nga ha lava ku nghenelela evukatini bya wena ku tlula ndlela leyi va faneleke va endla ha yona.
Swi le ka wena ni nkataku leswaku mi lava ku va vekela swipimelo swihi kutani mi va byela swona hi ndlela ya rirhandzu. Mi nga ha vulavula na vona hi ku ntshunxeka handle ko va delela. (Swivuriso 15:1) Ku titsongahata, ku va la rhuleke ni ku lehisa mbilu swi ta mi pfuna leswaku mi va ni vuxaka lebyinene ni maxaka ya n’wina naswona mi ya emahlweni “mi lehiselana mbilu hi rirhandzu.”—Vaefesa 4:2.
LESWI U NGA SWI ENDLAKA:
-
Loko u vilerisiwa hi ndlela leyi maxaka ma nghenelelaka ha yona evuton’wini bya n’wina, burisana ni nkataku hi mhaka leyi hi nkarhi lowu faneleke
-
Pfumelelanani leswaku mi ta yi lunghisa njhani mhaka leyi
U Nga Ha Tsakela
XIHONDZO XO RINDZA
Ku Hanyisana Ni Vatswari Va Munghana Wa Wena Wa Vukati
Xana vatswari va wena va tshamela ku nghenelela etimhakeni ta vukati bya wena? Kuma ndlela leyi u nga antswisaka ha yona ni ku papalata ku vanga tshikilelo evukatini bya wena.
