HI Mugqivela, April 25, 2015, ku ve ni ku tsekatseka lokukulu ka misava ka mpimo wa 7, 8 eNepal, ku nga tiko leri taleke hi tintshava leri kumekaka en’walungu wa tiko ra Indiya. Ku tsekatseka koloko ku hlasele ndhawu ya kwalomu ka 80 wa tikhilomitara en’walungu vupeladyambu bya doroba ra Kathmandu. Mhangu yoleyo ya ntumbuluko yi dlaye vanhu vo tlula 8 500 naswona hi yona leyi dlayeke vanhu vo tala swinene ematin’wini ya tiko ra Nepal. Vanhu vo tala swinene va sale va nga ha ri na makaya. Ku ni Timbhoni ta Yehovha ta 2 200 eNepal, naswona to tala ta tona ti khumbekile eka mhangu yoleyo. Eka lava feke a ku katseka Mbhoni yin’we ni vana va yona vambirhi.

Michelle la nga Mbhoni ya Yehovha u ri: “Hi nkarhi wolowo, Timbhoni ta Yehovha to tala, a ti ri eminhlanganweni ya tona ya Vukreste endhawini leyi hlaseriweke swinene hi mhangu. Loko a yi endleke hi nkarhi lowu Timbhoni to tala a ti ri emakaya, to tala ta tona a ti ta va ti file.” Hikokwalaho ka yini lava a va ri emahlanganweni va ponile? Lexi endleke va pona i ndlela leyi tiholo leti va khomelaka minhlangano eka tona ti akiweke ha yona.

Tiholo ta Mfumo leti akiwaka sweswi eNepal, ti akiwe ti tiya leswaku muako wu nga hirimuki hambiloko ko va ni ku tsekatseka ka misava. Man Bahadur, loyi a nga xirho xa ku aka Tiholo ta Mfumo, u ri: “Hi tshamela ku vutisiwa leswaku hikwalaho ka yini Tiholo ta hina ta Mfumo ti akiwa ti ri ni masungulo lama tiyeke. Sweswi se ha byi vona vuyelo bya kona lebyinene!” Endzhaku ka mhangu yoleyo, vanhu va pfumeleriwe ku ya tshama eTiholweni ta Mfumo. Ku nga khathariseki ku tsekatsekanyana ka misava loku a ka ha ya emahlweni, Timbhoni ta Yehovha ni vaakelani va tona, a va sirhelelekile eTiholweni teto.

Hi ku hatlisa lava rhangelaka evandlheni va sungule ku lava swirho swa vandlha leswi a va nga swi tivi leswaku swi kwihi. Babita loyi a nga Mbhoni u te: “Lava rhangelaka a va rhangisa vuhlayiseki bya vandlha ematshan’weni ya vuhlayiseki bya vona. Rirhandzu leri va ri kombiseke ri hi khumbile swinene.” Hi siku leri landzeleke endzhaku ka mhangu yoleyo, swirho swinharhu swa komiti leyi langutelaka ntirho wa Timbhoni ta Yehovha eNepal, swin’we ni valanguteri lava endzelaka mavandlha ya Timbhoni, va sungule ku endzela mavandlha leswaku va ya ma pfuna.

Endzhaku ka masiku ya tsevu, Gary Breaux swin’we ni nghamu yakwe Ruby, lava humaka entsindza wa Timbhoni ta Yehovha eUnited States, va endzele eNepal. Reuben, xirho xa komiti leyi boxiweke laha henhla u te: “Hikwalaho ka ku pfilunganyeka loku a ku ri kona eKathmandu ni ku tsekatsekanyana loku a ku tama ka ha ri kona, a hi nga tiyiseki leswaku Makwerhu Breaux u ta fika. Kambe leswi a tiyimiserile, u swi kotile ku fika! Timbhoni ta kwalaho a ti tsakile swinene loko ti n’wi vona.”

Silas loyi a tirhaka ehofisini ya Timbhoni ya le Nepal, u te: “Hi ku hatlisa endzhaku ka loko riqingho ra hina ri tlhele ri sungula ku tirha, a hi foneriwa vusiku ni nhlikanhi! Timbhonikulorhi emisaveni hinkwayo a ti karhatekile swinene ha hina. Hambileswi tin’wana a ti vulavula tindzimi leti hi nga ti tiviki, kambe a hi swi xiya leswaku ta hi rhandza swinene naswona ti tiyimisele ku hi pfuna.”

 Masiku yo hlayanyana endzhaku ka mhangu yoleyo, Timbhoni ta kwalaho ti yisele vanhu lava a va nga ha ri na makaya swakudya eHolweni ya Mfumo. Ku simekiwe ni Komiti yo Phalala naswona hi ku hatlisa Timbhoni ti sungule ku phalala, ngopfungopfu Timbhoni ta le Bangladesh, Indiya na Japani. Ku nga si hela masiku ma nga ri mangani, madokodela lama humaka eYuropa ma fikile naswona ma tirhise Holo yin’wana ya Mfumo tanihi ndhawu yo tshungulela eka yona. Hi ku hatlisa va sungule ku tshungula vanhu lava vavisekeke, ni ku va pfuna leswaku va kota ku amukela xiyimo.

Loko a vulavula hi ndlela leyi vanhu vo tala a va titwa ha yona, wansati la vuriwaka Uttara u te: “Ku tsekatseka koloko ka misava a ku ri ku kulu swinene naswona a ku tsema nhlana. Kambe endzhaku ka sweswo, hi titwe hi ri ni vun’we swinene ni Vakrestekulorhi.” Mhangu yoleyo yi tiyise ndlela leyi vanhu a va rhandza Yehovha ha yona ni ku tlhela va rhandzana.