Ku khensa swi endla leswaku evukatini swilo swi famba kahle. Vatekani vo tala a va va khensi vanghana va vona va vukati hikwalaho ka leswi va nga ti xiyiki timfanelo letinene leti va nga na tona. Eka buku leyi nge, Emotional Infidelity, mutsundzuxi un’wana wa ta vukati u xiye leswaku vatekani vo tala lava yaka eka yena “hakanyingi va vilerisiwa hi swilo leswi vanghana va vona va vukati va nga swi endliki ku tlula leswi va swi endlaka. Va ndzi byela hi swilo leswi va lavaka leswaku swi cinciwa, ku nga ri swilo leswi va lavaka leswaku swi hambeta swi va kona. Xihoxo lexi vatekani volavo va xi endlaka i ku tsandzeka ku kombisana ku khensa.”

Xana wena ni nkataku mi nga xi papalata njhani xiphiqo xo fana ni lexi?

Ku khensa swi nga endla leswaku ku va ni ntsako evukatini. Loko nuna kumbe nsati a xiya timfanelo letinene eka munghana wakwe wa vukati, swi endla leswaku rirhandzu ra vona ri tiya swinene. Loko vatekani va khensana, swi endla leswaku va nga vi na ntshikilelo lowukulu ni loko va langutana ni swiphiqo.

Eka vavasati lava tekiweke. Buku leyi nge, Emotional Infidelity, yi vula leswaku, “vavasati vo tala a va wu xiyi ntshikilelo lowu vanuna va vona va langutanaka na wona loko swi ta emhakeni ya ku khathalela ndyangu.” Ematikweni man’wana, ntshikilelo wu nga ha va kona hambiloko nuna ni nsati va tirha havambirhi.

Eka vavanuna lava tekeke. Hakanyingi, vavanuna a va ma tlangeli matshalatshala lawa vasati va vona va ma endlaka yo khathalela ndyangu, ku nga ha va ku ri ku tirha, ku kurisa vana hambi ku ri ku endla mintirho ya le kaya. Fiona, * loyi a nga ni malembe manharhu a nghenele vukati, u ri: “Hinkwerhu ha endla swihoxo, kambe loko ndzo tshuka ndzi endle xihoxo, ndzi titwa nandzu. Kambe loko nuna wa mina a ndzi bumabumela hikwalaho ka mintirho leyi ndzi yi endleke ekaya, ndza swi xiya leswaku wa ha ndzi rhandza ku nga khathariseki swihoxo swa mina. Ndza swi xiya leswaku nuna wa mina wa ndzi seketela kutani sweswo swi ndzi endla ndzi tsaka!”

Kambe, loko wansati kumbe wanuna a twa onge matshalatshala yakwe a ma tekeriwi enhlokweni, sweswo swi nga hoxa vukati bya vona ekhombyeni. Valerie, u ri: “Loko nkataku a ku endla u titwa u nga ri wa nkoka, swi nga ha ku endla u sungula ku rhandza un’wana loyi a ku endlaka u titwa u ri wa nkoka.”

Vana ni vuxiyaxiya. Eka vhiki leri landzelaka, xiya timfanelo letinene eka nkataku. Tlhela u xiya swilo leswinene leswi a swi endlaka leswi a wu nga swi xiyi khale, leswi endlaka leswaku vukati bya n’wina byi famba kahle. Loko vhiki ri hela, tsala (1) timfanelo leti u ti rhandzeke eka nkataku ni (2) swilo leswi a swi endleke leswi pfuneke ndyangu hinkwawo.—Nsinya wa nawu wa le Bibeleni: Vafilipiya 4:8.

Hikokwalaho ka yini swi ri swa nkoka ku va ni vuxiyaxiya? Nsati loyi a vuriwaka Erika, u ri: “Loko se u ri ni malembe yo hlayanyana u nghenele vukati, u nga ha sungula ku ka u nga ha swi tekeli enhlokweni swilo leswinene leswi nkataku a swi endlaka. U tshika ku xiya timfanelo letinene leti a nga na tona kutani u sungula ku dzikisa mianakanyo eka swilo leswi a nga swi endleki.”

Tivutise: ‘Xana ndzi ma teka njhani matshalatshala lawa munghana wa mina wa vukati a ma endlaka?’ Hi xikombiso, loko nuna wa wena a lunghise swo karhi ekaya, xana a wu n’wi khensi hi leswi u tibyelaka leswaku i vutihlamuleri byakwe ku endla mintirho yo tano? Loko u ri wanuna, xana wa ma tlangela matshalatshala ya nsati wa wena yo kurisa vana, kumbe u tibyelaka leswaku a swi bohi ku n’wi khensa hikwalaho ka leswi ku nga vutihlamuleri byakwe? Swi endle mukhuva ku xiya swilo hinkwaswo leswinene, leswi nkataku a swi endlaka, ku nga ha va swilo leswikulu kumbe leswitsongo, kutani u n’wi khensa hikwalaho ka matshalatshala lawa a ma endleke yo tiyisa vukati bya n’wina.—Nsinya wa nawu wa le Bibeleni: Varhoma 12:10.

Khensa swi huma embilwini. Bibele a yi vuli leswaku hi va lava khensaka ntsena kambe yi ri: “Tikombeni mi ri ni ku nkhensa.” (Vakolosa 3:15) Hikokwalaho, swi endle mukhuva ku khensa nkataku. Wanuna loyi a vuriwaka James, u ri: “Loko ndzi endla swilo kutani nsati wa mina a ndzi khensa, swi endla ndzi tikarhatela ku va nuna lonene ni ku endla leswaku vukati bya hina byi famba kahle.”—Nsinya wa nawu wa le Bibeleni: Vakolosa 4:6.

Loko vatekani va tshamela ku khensana, sweswo swi endla leswaku vukati bya vona byi tiya. Michael, u ri: “Ndzi tshemba leswaku vukati byo tala a byi nga ta hahluka loko vatekani va dzikisa mianakanyo ya vona eka timfanelo letinene leti ha un’we wa vona a nga na tona. Loko vo tshuka va langutane ni swiphiqo, a va nge hatliseli ku dlaya vukati hikuva va ta tsundzuka swilo leswinene leswi va endlelaneke swonae.”