Ku herisiwa ka ndlala emisaveni a swi titsheganga hi mpimo wa swakudya leswi tshoveriwaka emasin’wini. Ku pimanyetiwa leswaku sweswi van’wamapurasi va tshovela swakudya leswi nga wundlaka vanhu va 12 wa tibiliyoni, kasi sweswi ku ni vanhu va nkombo wa tibiliyoni emisaveni hinkwayo. Kambe swiphiqo swa ku kayivela ka swakudya swi vangiwa hileswi vanhu va lavaka mpindzulo, va nga swi aviki hi ndlela leyi faneleke naswona va swi tlangisaka.

Vatirhi lava nga ni vutshila lava endlaka kwalomu ka 24 wa tiphesente lava tirhaka hi swa timali va vula leswaku “va nga endla vukanganyisi kumbe swilo leswi nga riki enawini leswaku va humelela evuton’wini.” Kasi lava endlaka 16 wa tiphesente va vula leswaku va nga endla vugevenga “loko vo ka va nga khomiwi.”

Le Argentina, vadyondzisi vanharhu eka va ntlhanu va kombela masiku yo wisa entirhweni hikwalaho ka ntshikilelo kumbe madzolonga lama nga kona eswikolweni leswi va dyondzisaka eka swona.

Ku nga ri khale vanhu lava tshamaka voxe le Korea Dzonga va ta andza swinene ku tlula lava tshamaka tanihi ndyangu.

Ku ehleketiwa leswaku madoroba mambirhi eka manharhu ya le Chayina ma ta tsandzeka ku fikelela milawu leyintshwa ya hulumendhe leyi fambisanaka ni ku basisiwa ka moya leyi nga ta sungula ku tirha hi 2016. Ku engetela kwalaho, mati yo nwa lama kumiwaka ehansi ka misava ma tekiwa “ma thyake ku tlula mpimo.”