GOYA ri huma enkeleni wa rona exivindzini xa le kwandzasini nivusiku, kutani ri yima ri rhala-rhala ri tlhela ri yingisela. Hiloko ri sungula ku nyandlamela ri tsemakanya endhawini leyi nga sava.

Hi xitshuketa, goya leri ra tlula ri ya bvanyangeta kondlo leri a ri nga ehleketanga nchumu. Endzhaku ka sweswo, ri ya emahlweni ni ku hlota vusiku hinkwabyo leswaku ri tikhomela swihadyana swo tala. Loko ri khome swo tala ku tlula mpimo, leswi salaka ra swi celela. Ri tlhelela enkeleni wa rona hi matakuxa naswona a swi talanga ku ri vona ninhlikanhi. Xiya swilo swin’wana leswi tsakisaka hi goya leri:

• Tindleve ta magoya lawa leti twaka ngopfu ti ma pfuna ku kuma swihadyana leswi ma swi hlotaka, hambiloko swi ri ehansi ka misava

• Goya ra matsune ri rilela ehenhla loko ri lava ra nkati. Leswi goya ra nkati ri twaka swinene ri kota ku twa mpfumawulo wolowo ri ri ekule ngopfu

• Voya lebyi kumekaka eka marhuva ya goya leri byi endla leswaku ri nga mbombomeli esaveni naswona byi endla leswaku marhuva ya rona ma nga twi ku hisa swinene kumbe ku titimela

•  Endzeni ka ndleve ya rona ha yin’we ku ni voya byo basa lebyi fumbaneke lebyi ri sirhelelaka eka swiribyana leswi biwaka hi moya

• Swa tika ku landzelela marhuva ya goya leri hikuva ma funengetiwe hi voya lebyi endlaka leswaku ku nga vonaki kahle laha ri kandziyeke kona

• Goya leri ri nga kota ku hanya hi mati lawa ri ma kumaka eka swihadyana leswi ri swi dlayeke

• Sava ra le Kwandzasini ra Kara-Kum ri nga hisa ku fika eka 80 wa tidigri. Minkarhi yin’wana moya wa kona wu titimela wu fika eka -25 wa tidigri