LOKO tinjiya ti rhurha ti haha hi ntlawa lowu nga ringanaka “80 wa timiliyoni eka ndhawu leyi ringanaka xikwere khilomitara [0,4 sq mi].” Kambe a ti chayisani loko ti ri karhi ti haha. I yini lexi endlaka ti nga chayisani?

Xiya: Endzhaku ka matihlo ya njiya ku ni swimhondzwana leswi famba-fambaka leswi kotaka ku twa hi ku hatlisa swinene. Loko ti ri kusuhi ni ku chayisana, hi ku hatlisa swimhondzwana sweswo swi tivisa timpapa ni milenge leswaku njiya yi ta teka goza hi xihatla. Entiyisweni, swimhondzana leswi swi tsopeta hi ku hatlisa swinene ku tlula ndlela leyi tihlo ra munhu ri tsopetaka ha yona.

Ndlela leyi matihlo ni swimondzwana swa njiya swi tirhaka ha yona, swi susumetele van’wasayense ku endla michini leyi famba-fambaka leyi lawuriwaka hi khompyuta naswona yi kotaka ku papalata ku chayisa swilo loko yi ri karhi yi famba, ematshan’weni yo tirhisa michini leyi rharhanganeke. Valavisisi va le ku tirhiseni ka endlelo leri ra thekinoloji eka timovha, leswaku ti ta kota ku hatla titwa loko ti lava ku chayisa, leswi swi ta hunguta ku chayisana ka timovha. Profesa Shigang Yue wa le Yunivhesiti ya Lincoln eUnited Kingdom u ri: “Swi tele leswi hi nga swi dyondzaka eka xitsotswana lexitsongo xo tanihi njiya.”

U anakanya yini? Xana swimhondzwana swa njiya leswi kotaka ku twa hi ku hatlisa, swi lo tiendlekela? Kumbe swi lo endliwa?