TA RIVALA
Asia
Asia i tikonkulu leri nga ni vaaki vo tala swinene emisaveni. Vaakatiko va le Chayina ni le Indiya va tele lerova va lava ku endla hafu ya vanhu lava nga kona emisaveni. I swiphiqo swihi leswi matiko ya le Asia ma langutanaka na swona loko swi ta emhakeni ya ku dyondzisa ni ku sirhelela vaakatiko va wona?
Dyondzo Yi Sirhelela Vana
Vativi va nawu va le Chayina va ri: “Vana va le khombyeni lerikulu ra ku va va xanisiwa loko vatswari va nga va dyondzisi hi timhaka ta masangu va ha ri vatsongo.” Eka malembe ya mune lama hundzeke, vachuchisi le Chayina va tenge milandzu ya 8 000 ya vanhu lava hehliwaka hi ku xanisa vana hi ta masangu. Profesa wa nawu wa le Yunivhesiti ya Normal eBeijing u vula leswaku vana “va hlaseleka hi ku olova hikuva a va swi koti ku tisirhelela. Dyondzo i xilotlelo lexi sirhelelaka eka ku xanisiwa hi timhaka ta masangu.”
LESWI BIBELE YI SWI VULAKA: Vatswari lava nga ni vutlhari va dyondzisa vana va vona ndlela leyi va nga tisirhelelaka ha yona “eka munhu la vulavulaka swilo leswi humeke endleleni.”—Swivuriso 2:1, 10-12.
Nhlayo Ya Vanhu Lava Feke Endzhaku Ka Xidzedze
Hi ku ya hi nkambisiso wun’wana, hi xiringaniso ku fa ka swinhwanyetana swa kwalomu ka 15 elembeni leri landzeleka endzhaku ka xidzedze lexikulu ePhillipines, ku nga nhlayo leyikulu loko yi pimanisiwa ni ya munhu un’we loyi ku vikiwaka leswaku u dlayiwa hi xidzedze hi xoxe. Swi nga endleka leswaku swivangelo swi katsa ku pfumaleka ka mintirho endzhaku ka xidzedze, mali leyi lavekaka leswaku va tlhela va aka hi vuntshwa ni ndlela leyi tincece ta vanhwanyana ti khathaleriwaka ha yona loko swi ta eka swakudya ni swa rihanyo.
LESWI BIBELE YI SWI VULAKA: ‘Pambulela la nga ni ndlala xinkwa xa wena, nghenisa loyi a xanisekaka, loyi a nga riki na kaya endlwini ya wena, loko wo tshuka u vona munhu a nga ambalanga, u n’wi funengeta.’—Esaya 58:7.
Ku Tidlaya Ka Vadyuhari eKorea Dzonga
Vanhu vo tlula kotara lava tidlayeke eKorea Dzonga hi 2011 i vanhu va malembe ya 65 ku ya ehenhla. Valavisisi van’wana va sola ku cinca ka ndlela leyi vadyuhari va khathaleriwaka ha yona ni swiphiqo swa timali—kwalomu ka 50 wa tiphesente ta vadyuhari eKorea Dzonga va hanya evuswetini lebyikulu. Sweswi nhlayo leyi nga ehansi ka hafu ya vanhu va le Korea Dzonga yi ehleketa leswaku vana va fanele ku khathalela vatswari va vona lava dyuhaleke.
LESWI BIBELE YI SWI VULAKA: “Xixima tata wa wena ni mana wa wena.”—Vaefesa 6:2.
