Hi siku ro karhi u endle xihlambanyo u nghenela vukati. Xitshembiso xolexo u xi endleke i xa vutomi hinkwabyo, xa ku va u tshama ni loyi u tekaneke na yena naswona mi lulamisa swiphiqo leswi nga ha humelelaka.

Kambe loko malembe ma ri karhi ma famba, ku holova ku onha rirhandzu ra n’wina. Xana wa ha titwa hilaha a wu titwa hakona loko mi tekana?

Xihlambanyo a hi xiphiqo. Vanhu vo tala namuntlha va chava ku endla xihlambanyo. Van’wana va fanisa xihlambanyo ni bolo ni nketani leyi yi ku bohelelaka eka xiboho lexi nga riki xinene. Kambe teka xihlambanyo ku ri nsoma lowu tiyisaka vukati bya wena. Megan wansati loyi a tekiweke u ri: “Lexi tsakisaka hi xihlambanyo hileswaku, loko wena ni loyi u tekaneke na yena mi holova, a ku na loyi a nga ta famba.” * Loko mi tiyiseka leswaku vukati i xisirhelelo, hambiloko ku pfuka swin’wana,mi kota ku lulamisa swiphiqo.—Hlaya bokisi leri nge “ Xihlambanyo ni Vutshembeki.”

Leswi u faneleke u swi tsundzuka: Loko ku ri ni swiphiqo evukatini bya wena, sweswi i nkarhi wa leswaku u swi lulamisa ku nga ri ku holova hi swona. U nga swi endlisa ku yini swoleswo?

Kambisisa leswi u swi anakanyaka. “Vukati.” Xana loko u anakanya hi byona u titwa u ri ekhotsweni kumbe byi endla u titwa u hlayisekile? Loko minkarhi hinkwayo ku va ni swiphiqo, xana u anakanya hi ku famba? Leswaku u tiyisa xihlambanyo xa wena, i swa nkoka ku teka vukati ku ri xiboho xa hilaha ku nga heriki.—Nawu wa Bibele: Matewu 19:6.

Kambisisa leswi endlekeke evuton’wini bya wena. Ndlela leyi u tekaka xihlambanyo ha yona yi nga vangiwa hi leswi u swi voneke eka vatswari va wena. Lea wansati loyi a tekiweke u ri: “Vatswari va mina va dlaye vukati loko ndza ha ri ntsongo naswona ndza chava leswaku leswi swi va humeleleke, swi nga endleka leswaku swi ndzi endle ndzi teka vukati hi ndlela leyi nga riki yinene.” Tiyiseka leswaku u nga swi kota ku endla vukati bya wena byi tsakisa. A swi vuli leswaku leswi endlekeke eka vatswari va wena swi ta endleka ni le ka wena.—Nawu wa Bibele: Vagalatiya 6:4, 5.

Xiyisisa ndlela leyi u vulavulaka ha yona. Loko wena ni loyi u tekaneke na yena mi nga pfumelelani hi mhaka yo karhi, u nga vuli marito lawa endzhaku u nga ta tisola, yo tanihi lama nge, “ndza ku tshika” kumbe “swa antswa ndzi tikumela munhu un’wana loyi a nga ta ndzi teka ndzi ri wa nkoka.” Marito yo tano, ma onha xihlambanyo hikuva ematshan’weni ya ku lulamisa xiphiqo xa n’wina, ma nyanyisa xiyimo. Ematshan’weni ya ku vula marito yo vava, u nga ha vula u ku: “A hi nge swi koti ku lulamisa mhaka leyi sweswi hikuva hinkwerhu hi hlundzukile.”—Nawu wa Bibele: Swivuriso 12:18.

Kombisa leswaku u endle ‘xihlambanyo.’ Laha u tirhelaka kona etafuleni ra wena, veka xifaniso xa loyi u tekaneke na yena. Vulavula kahle hi vukati bya n’wina. Tivekele pakani ya ku fonela loyi u tekaneke na yena siku ni siku loko mi nga ri swin’we. Minkarhi hinkwayo titolovete ku tirhisa rito “hi” u katsa loyi u tekaneke na yena kumbe u ku “mina ni nsati wa mina” kumbe “mina ni nuna wa mina.” Loko u endla tano u ta swi kombisa eka van’wana ni le ka wena leswaku u endle xihlambanyo eka loyi u tekaneke na yena.

Dyondza eka vatekani lava nga xikombiso lexinene. Languta vatekani lava wupfuke lava lulamisaka swiphiqo hi ndlela leyinene. Va vutise leswaku “va xi teka njhani xihlambanyo naswona sweswo swi va pfune njhani evukatini bya vona.” Bibele yi ri: “Nsimbi yi lotiwa hi nsimbi. Hi ndlela leyi fanaka munhu u lota xikandza xa un’wana.” (Swivuriso 27:17) Anakanya hi tsalwa rero, u lava mpfuno eka lava vukati bya vona byi tsakisaka.