EXIKARHI ka tindlela to tala leti endlaka leswaku munhu a kota ku hanya, ndlela yin’wana i vuswikoti bya miri wakwe byo horisa timbanga ni ku pfuxeta tisele leti onhakeke. Sweswo swi endleka hi ku hatlisa loko munhu a vavisekile.

Xiya: Leswaku timbanga ti hola, sweswo swi endleka hi ku pfuniwa hi tisele to tala leti rharhanganeke:

• Ti platelet ti namarhelana ni tisele ti rhendzela mbanga ivi ti endla leswaku ngati yi tiya kutani misiha ya ngati leyi onhakeke yi pfaleka.

• Ku pfimba ku sivela switsongwatsongwana ku tlhela ku humesa thyaka hinkwaro leri vangiweke hi ku vaviseka.

• Endzhaku ka masiku ma nga ri mangani, miri wu sungula ku siva tisele leti vavisekeke hi letintshwa, wu endla leswaku mbanga yi pfaleka yi tlhela yi siva misiha ya ngati leyi onhakeke.

• Eku heteleleni, xilondza xa hola kutani laha ku vavisekeke ku pfaleka.

Hi ku susumetiwa hi vuswikoti lebyi, vakambisisi va ringeta ku endla plasitiki leri nga ta tipfala loko ri boxekile. Ri ta endliwa hi tichupu letitsongo leti fambisanaka leti nga ni tikhemikhali timbirhi leti nga ta mpfempfa loko ro tshuka ri boxeka. Loko tikhemikhali toleto timbirhi ti hlangana, ti vumba jeli leyi halakelaka laha ri boxekeke kona ri pfaleka. Loko jeli yoleyo yi tiya yi endla leswaku plasitiki yoleyo yi pfaleka. Mukambisisi un’wana wa pfumela leswaku nchumu lowu kotaka ku namarhela sweswi wu le ku endliweni, wu ta encenyeta nchumu lowu se wu nga kona eka ntumbuluko.”

U anakanya yini? Xana vuswikoti bya miri wa munhu byo horisa timbanga, byi lo tiendlekela kumbe byi lo endliwa?