KWALOMU ka malembe ya khume lama hundzeke, Gregorio na Marilou, mpatswa lowu tekaneke lowu nga ni malembe ya va-30, a va phayona eManila, loko hi hala tlhelo va ri karhi va tirha ntirho wo tihanyisa wa nkarhi hinkwawo. A swi nga olovi, kambe va swi kotile. Hi ku famba ka nkarhi, Marilou u tlakusiwile leswaku a va mininjhere ebangi leyi a a tirha eka yona. U ri: “Mintirho leyi a hi yi tirha yi endle leswaku hi hanya vutomi bya vulovolovo.” Kahle kahle, swilo a swi wu fambela khwatsi mpatswa lowu hi tlhelo ra timali, lerova wu kale wu endla xiboho xo aka yindlu leyi a wu yi lava endhawini yin’wana ya xiyimo xa le henhla evuxeni bya Manila, laha a ku ri tikhilomitara ta 19 ku ya kona. Wu hirhe khamphani leswaku yi aka yindlu leyi, wu tlhela wu hlela ku yi hakela n’hweti na n’hweti ku nga si hela malembe ya khume.

Marilou u ri: “Ntirho wa mina lowuntshwa a wu ndzi dyela nkarhi wo tala wu tlhela wu ndzi siya ndzi karhele lerova a ndzi nga ha yi hisekeli mintirho ya Vukreste. A ndzi vona onge ndzi kanganyisa Yehovha.” Wa hlamusela: “A ndzi nga ha swi koti ku tirhela Yehovha hilaha a ndzi tinyiketele ku n’wi tirhela hakona.” Leswi xiyimo xexo a xi nga va tsakisi, siku rin’wana Gregorio na Marilou va tshame ehansi va bula hi ndlela leyi a va hanya ha yona. Gregorio u ri: “A hi lava ku endla ku cinca kambe a hi nga  swi tivi kahle leswi a hi fanele hi swi endla. Hi bule hi ndlela leyi hi nga tirhisaka vutomi bya hina ha yona hi xitalo leswaku hi tirhela Yehovha, ngopfu-ngopfu leswi a hi nga ri na vana. Hi khongele eka Yehovha leswaku a hi kongomisa.”

Hi nkarhi wolowo, va twe tinkulumo to tala leti a ti nyikeriwa leti a ti vulavula hi ku tirha laha ku nga ni xilaveko lexikulu xa vahuweleri va Mfumo. Gregorio u ri: “Hi swi vonile leswaku Yehovha a a hlamula swikhongelo swa hina hi tinkulumo teto.” Mpatswa lowu wu hambete wu khongelela ku va ni ripfumelo leri engetelekeke leswaku wu ta va ni xivindzi xo endla swiboho leswinene. Xihinga lexikulu a ku ri yindlu ya wona leyi a ya ha ri eku akiweni. Se a wu yi hakelele ku ringana malembe manharhu. Xana a wu ta endla yini? Marilou u ri: “Loko a ho tshika kontraka yoleyo, a hi ta lahlekeriwa hi mali hinkwayo leyi a hi yi hakerile—mali ya kona a yi tele swinene. Kambe hi swi teke tanihi nkarhi wo hlawula ku rhangisa ku rhandza ka Yehovha kumbe ku navela ka hina.” Leswi a wu anakanya hi marito ya muapostola Pawulo yo ‘lahlekeriwa hi swilo hinkwaswo,’ wu herise tsima ro aka, wu tshika ntirho, wu xavisa nhundzu yin’wana ya wona ivi wu rhurhela eximutanini lexi nga exihlaleni xa Palawan, kwalomu ka tikhilomitara ta 480 edzongeni wa Manila.—Filp. 3:8.

Loko Gregorio na Marilou va nga si rhurha, va ringete ku tilunghiselela ku hanya vutomi byo olova, kambe a va nga swi xiyi leswaku vutomi bya vona a byi ta va bya xiyimo xa le hansi swinene, ku kondza va fika endhawini leyi a va ta tshama eka yona. Marilou u ri: “A hi tsemeke nhlana, a ku nga ri na gezi kumbe swilo leswi a swi endla leswaku vutomi byi olova. Ematshan’weni yo sweka rhayisi hi ku tirhisa nchumu lowu endleriweke ku sweka yona, a hi boheka ku rhanga hi pandzela tihunyi ivi hi sweka hi ndzilo. A ndzi pfa ndzi navela ku ya emolweni, ku dya swakudya swa le rhesiturente ni swilo swin’wana swa le dorobeni.” Hambiswiritano, mpatswa lowu a wu tshamela ku tsundzuxana leswaku ha yini wu rhurhele endhawini yoleyo naswona swi nga si ya kwihi, se a wu toloverile. Marilou u ri: “Sweswi ndzi tsakela ku vona ku saseka ka ntumbuluko swin’we ni ku vangama ka tinyeleti nivusiku. Xa nkoka ngopfu, ndzi tsakisiwa hi ku vona ndlela leyi vanhu va tsakaka ha yona loko hi va chumayela. Hi ‘dyondze xihundla’ lexi tisaka ku eneriseka, hi ku tirha endhawini leyi.”—Filp. 4:12.

Gregorio u ri: “Loko hi fika laha, a ku ri ni Timbhoni ta mune ntsena. A ti tsake ngopfu loko ndzi sungula ku nyikela nkulumo ya le rivaleni vhiki na vhiki ni loko ndzi chaya katara ya mina loko ku yimbeleriwa tinsimu ta Mfumo.” Ku nga si hela lembe, mpatswa wolowo wu vone ntlawa wolowo lowutsongo wu kula wu va vandlha leri nga ni vahuweleri va 24. Gregorio u ri: “Ndlela leyi vandlha leri ri hi kombiseke rirhandzu ha yona, yi hi khumbile swinene.” Leswi se wu heteke malembe yo tlula tsevu wu ri karhi wu tirha endhawini yoleyo leyi nga yoxe, wu ri: “A ku na nchumu lexi nga ringanisiwaka ni ntsako lowu tisiwaka hi ku vona vanhu vo tala lavantshwa va va xiphemu xa vandlha. Ku tlula rini na rini, sweswi ha swi xiya leswaku vutomi bya hina byi ni xikongomelo.”

Vamakwerhu va xinuna ni va xisati va kwalomu ka 3 000 va le Philippine, va rhurhele etindhawini leti ku nga ni xilaveko lexikulu xa vahuweleri va Mfumo. Kwalomu ka 500 wa vona i vamakwerhu va xisati lava nga tekiwangiki. Anakanya hi xikombiso xa Karen.

Karen loyi sweswi a nga ni malembe ya le henhlanyana ka 20, u kulele eBaggao le Cagayan. Loko a ha ri emalembeni ya kondlo-a-ndzi-dyi, a a tshamela ku anakanya hi ku tirha hilaha ku engetelekeke entirhweni wakwe wa nsimu. U ri: “A ndzi lava ku tirha laha ku nga ni xilaveko lexikulu xa vahuweleri hi leswi a ndzi swi tiva leswaku nkarhi lowu saleke wu komile naswona vanhu va tinxaka hinkwato va fanele va twa rungula ra Mfumo.” Hambileswi swirho swin’wana swa ndyangu wa ka vona swi n’wi khutazeke ku kuma dyondzo leyi tlakukeke ematshan’weni yo rhurhela endhawini ya le kule a ya chumayela, Karen u khongele eka Yehovha a lava nkongomiso. U tlhele a vulavula ni vamakwerhu lava tirhaka laha ku nga ni xilaveko. Loko a ri ni malembe ya 18, u rhurhele endhawini leyi ku nga 64 wa tikhilomitara ku suka laha a a tshama kona.

Vandlha leritsongo leri Karen a rhurheleke eka rona, ri tirha nsimu endhawini ya tintshava leyi nga le Ribuweni ra Pacific. Karen u ri: “Leswaku hi ya evandlheni lerintshwa loko hi suka eBaggao, a hi famba masiku manharhu, hi gonya tintshava hi tlhela hi rhelela ni ku tsemakanya milambu ku tlula minkarhi ya 30.” U ye emahlweni a ku: “Leswaku ndzi fikelela tidyondzo tin’wana ta Bibele, a ndzi famba tiawara ta tsevu hi milenge, ndzi etlela ekaya ka dyondzo ya mina ivi ndzi pfuka hi siku leri tlhandlamaka ndzi famba tiawara tin’wana ta tsevu hi milenge ndzi tlhelela ekaya.” Xana ku ve ni vuyelo lebyinene? Karen u ya emahlweni a ri karhi a n’wayitela a ku: “Minkarhi yin’wana milenge ya mina ya pandza kambe ndzi kote ku fambisa tidyondzo ta Bibele ta 18. Ndzi ‘nantswile ndzi vona leswaku Yehovha hi lonene’!”—Ps. 34:8.

I yini lexi endleke leswaku Sukhi, la nga tekiwangiki loyi a nga ni malembe ya va-40 la tshamaka eUnited States, a rhurhela ePhilippine? Hi 2011 u ye enhlengeletanweni ya xifundzha laha a ku vulavurisaniwa ni mpatswa lowu tekaneke. Wu hlamusele ndlela leyi wu xaviseke swilo swa wona ha yona leswaku wu ta rhurhela eMexico ku ya pfuneta hi ntirho wo chumayela. Sukhi u ri: “Mbulavurisano wolowo wu endle leswaku ndzi sungula ku anakanya hi tipakani leti a ndzi nga si tshama ndzi ehleketa ha tona.” Loko Sukhi la nga Muindiya a twa leswaku ku laveka mpfuno lowu engetelekeke leswaku ku fikeleriwa vanhu lava tshamaka ePhilippine lava vulavulaka Xipunjabi, u teke xiboho xo ya pfuna endhawini yoleyo. Xana u langutane ni swihinga?

U ri: “A swi ndzi tikela ku tiva leswaku ndzi fanele ndzi xavisa yini ndzi tshika yini. Nakambe endzhaku ko tshama kahle endhawini ya mina n’wini ku ringana malembe ya 13, a ndzi fanele ndzi ya tshama ni maxaka swa xinkarhana. A swi nga olovi, kambe a ku ri ndlela leyinene  yo tilunghiselela ku ya hanya vutomi byo olova.” Hi yihi mintlhontlho leyi a langutaneke na yona endzhaku ko rhurhela ePhilippine? “Leswi a ndzi chava switsotswana naswona ndzi tshamela ku tsundzuka ekaya, a swi ndzi tikela swinene. Ndzi dyondze ku titshega hi Yehovha ku tlula rini na rini!” Xana swi ndzi pfunile? Hi ku n’wayitela Sukhi u te: “Yehovha u ri, ‘Ndzi kombela mi ndzi ringa, mi vona loko ndzi ta ka ndzi nga mi chululeli nkateko.’ Sweswi ndzi vone ku hetiseka ka marito wolawo loko n’wini wa muti un’wana a ndzi vutisile a ku, ‘U ta vuya rini? Ndza ha ri ni swivutiso swo tala.’ Ku kota ku pfuna vanhu lava lavaka ku tiva ntiyiso malunghana na Yehovha swi ndzi tisela ntsako lowukulu ni ku eneriseka.” (Mal. 3:10) Sukhi u ya emahlweni a ku: “Entiyisweni, nchumu lowu a wu tika swinene a ku ri ku endla xiboho xo rhurha. Endzhaku ka loko ndzi xi endlile, a swi hlamarisa ku vona ndlela leyi Yehovha a a khathalela swilaveko swa mina ha yona.”

Sime, makwerhu loyi a nga na nsati loyi sweswi a nga ni malembe ya va-30, u suke ePhilippine a ya etikweni rin’wana eVuxa Xikarhi laha a nga kuma ntirho lowu holelaka swinene. Loko a ri kwalaho, xikhutazo lexi a xi kumeke eka mulanguteri wa xifundzha ni le ka nkulumo leyi nyikeriweke hi xirho xa Huvo leyi Fumaka, xi n’wi susumetele ku rhangisa Yehovha evuton’wini byakwe. Sime u ri: “Kambe ku anakanya hi ku tshika ntirho a swi nga ndzi dyisi byi rhelela.” Hambiswiritano, u tshike ntirho ivi a tlhelela ePhilippine. Namuntlha, Sime ni nsati wakwe Haidee, va tirha le Davao del Sur, edzongeni wa tiko laha ku nga ni xilaveko xa vachumayeri va Mfumo leswaku va hlanganisa nsimu leyikulu. U ri: “Loko ndzi ehleketa hi leswi humeleleke, ndza tsaka swinene hi leswi ndzi koteke ku hlula ku chava ku lahlekeriwa hi ntirho wa mina nileswaku ndzi rhangise Yehovha. A ku na nchumu lexi enerisaka evuton’wini ku tlula ku nyika Yehovha leswinene ngopfu leswi u nga na swona!”

Loko Ramilo na Juliet, mpatswa lowu nga maphayona lowu nga ni malembe ya va-30 wu twa leswaku vandlha leri ku nga tikhilomitara ta 30 ku suka ekaya ra vona ri lava mpfuno, va tinyikerile leswaku va ri pfuna. Hikwalaho vhiki na vhiki, ku nga khathariseki leswaku ri xe njhani, Ramilo na Juliet va famba hi xithuthuthu xa vona va ya eminhlanganweni va tlhela va chumayela mahungu lamanene. Hambileswi ku famba emagondzweni lama nga celeka ni le mabulohweni lama nembelelaka kunene swi nga ntlhontlho, va tsakile hileswi va koteke ku tirha nkarhi lowu engetelekeke entirhweni wa nsimu. Ramilo u ri: “Mina ni nsati wa mina hi fambisa tidyondzo ta Bibele ta 11. Ku tirha laha ku nga ni xilaveko lexikulu swi lava ku titsona swo karhi kambe swi hi endla hi eneriseka swinene.”—1 Kor. 15:58.

Xana u nga tsakela ku dyondza leswi engetelekeke malunghana ni ku tirha laha ku nga ni xilaveko lexikulu xa vahuweleri va Mfumo etikweni ra ka n’wina kumbe etikweni rin’wana? Loko swi ri tano, vulavula ni mulanguteri wa n’wina wa xifundzha u tlhela u hlaya xihloko lexi nge, “Xana U Nga ‘Pelela eMakedoniya’?” eka Vutirheli Bya Hina Bya Mfumo bya August 2011.