Loko maphayona mambirhi ma byeriwe ku nghena endlwini yin’wana eKenya, ma hlamarisiwe hi ku vona wanuna la nga ni xivumbeko lexitsongo swinene a etlele emubedweni. A a ri ni miri lowutsongo swinene ni mavoko yo koma. Loko ma ri karhi ma n’wi byela hi xitshembiso xa Xikwembu xa leswaku “la khutaka u ta tlula kukota mhunti,” wanuna loyi u n’wayiterile swinene.—Esa. 35:6.

Maphayona wolawo ma kume leswaku Onesmus, loyi sweswi a nga ehansinyana ka malembe ya 40, u velekiwe a ri ni vuvabyi bya marhambu lebyi vuriwaka osteogenesis imperfecta kumbe brittle bone. Marhambu ya yena a ma nga tiyanga—lerova ntshikilelonyana wutsongo a wu ta endla leswaku ma tshoveka. Leswi ku nga riki na vutshunguri bya vuvabyi lebyi, Onesmus a a ehleketa leswaku u ta heta vutomi bya yena hinkwabyo a ri ni switlhavi naswona a famba hi xitulu xa lava lamaleke.

Onesmus u pfumele ku dyondzeriwa Bibele. Hambiswiritano, mana wakwe u arile leswaku a ya emihlanganweni ya Vukreste, a vula leswaku a nga ha vaviseka naswona swi nga ha n’wi vangela switlhavi leswi engetelekeke. Hikwalaho, vamakwerhu a va n’wi rhekhodela minhlangano hinkwayo kutani a yi yingisela a ri ekaya. Endzhaku ko dyondzeriwa tin’hweti ta ntlhanu, Onesmus u endle xiboho xo ya eminhlanganweni ku nga khathariseki makhombo lawa a swi ta endleka a langutana na wona.

Xana ku ya eminhlanganweni ya Vukreste swi nyanyise switlhavi swa Onesmus? Vuyelo bya kona byi ve lebyinene. Onesmus u ri: “Switlhavi leswi a ndzi tshama ndzi ri na swona a swi hunguteka hi nkarhi wa minhlangano.” A a ehleketa leswaku ntshembo wakwe lowuntshwa hi wona a wu endla leswaku a titwa a antswa. Mana wakwe u vone ku cinca ka vumunhu bya n’wana wakwe naswona a a tsakile swinene lerova na yena u pfumerile ku dyondzeriwa Bibele. A a tala ku vula a ku: “Ku tirhela Xikwembu swi tshungula jaha ra mina.”

Swi nga si ya kwihi, Onesmus u ve muhuweleri la nga khuvuriwangiki. Hi ku famba ka nkarhi, u khuvuriwile naswona sweswi i nandza wa vutirheli. Hambileswi milenge ni voko lerin’wana rakwe swi nga tirhiki, u navela ku endla hinkwaswo leswi nga ematimbeni yakwe leswaku a tirhela Yehovha. A a lava ku va phayona ra nkarhinyana, kambe a a kanakana ku byi teka. Ha yini? Hikuva a a swi tiva leswaku u ta boheka ku titshega hi munhu un’wana leswaku a n’wi susumeta hi xitulu xa lava lamaleke. Loko a byele Vakreste-kulobye hi xiphiqo lexi, va tshembise leswaku va ta n’wi pfuna. Va swi endlile sweswo, hiloko a kota ku va phayona ra nkarhinyana.

Leswi nakambe Onesmus a a lava ku va phayona ra nkarhi hinkwawo, u ve ni xiphiqo lexi fanaka. Hambiswiritano, siku rin’wana ndzimana ya siku yi n’wi nyike xikhutazo lexi a a xi lava. Ndzimana ya kona a ku ri Pisalema 34:8 leyi nge: “Nantswani mi vona leswaku Yehovha hi lonene.” Endzhaku ko anakanyisisa hi tsalwa rero, Onesmus u endle xiboho xo va phayona ra nkarhi hinkwawo. Sweswi u chumayela masiku ya mune evhikini naswona u ni swichudeni swo hlayanyana swa Bibele leswi endlaka nhluvuko lowunene hi tlhelo ra moya. Hi 2010, u ye eka Xikolo Xa Ntirho Wa Vuphayona. Onesmus a a tsake ngopfu loko un’wana wa vamakwerhu vambirhi lava n’wi endzeleke ro sungula ku ri yena mudyondzisi wakwe!

Vatswari va Onesmus se va file, kambe vamakwerhu va le vandlheni va khathalela swilaveko swakwe swa siku ni siku. U tsakela mikateko hinkwayo leyi a tiphinaka ha yona sweswi naswona u ri langutele hi mahlo-ngati siku leri “[ku nga taka ku nga vi na] munhu la tshamaka kona la nga ta ku: ‘Ndza vabya.’”—Esa. 33:24.