HI HANYA emisaveni leyi nga ni vukhongeri byo tala byo hambana-hambana. Ndzavisiso wun’wana lowu endliweke sweswinyana wu kombisa leswaku emisaveni hinkwayo ku ni vukhongeri bya 19 lebyi seketeriwaka hi vanhu vo tala swin’we ni bya 10 000 lebyi swirho swa byona swi nga tatiki ni xandla. Vukhongeri lebyi byo tala byo hambana-hambana byi endla leswaku vanhu va kota ku tihlawulela lebyi va lavaka byona. Kutani xana swi na mhaka leswaku u hlawula vukhongeri byihi?

Vanhu van’wana va vula leswaku vukhongeri byo hambana-hambana byi fana ni magondzo yo hambana-hambana lama yaka entshaveni yin’we. Eka vona a hi swa nkoka leswaku u hlawula vukhongeri byihi tanihi leswi magondzo hinkwawo ma yaka endhawini yin’we. Va vula leswaku ku ni Xikwembu xin’we xa Matimba Hinkwawo, kutani vukhongeri hinkwabyo bya amukeleka eka xona.

Xana Yesu Kreste, un’wana wa vadyondzisi va vukhongeri lava xiximekaka ematin’wini, u vule yini hi mhaka leyi? U byele vadyondzisiwa vakwe a ku: “Nghenani hi nyangwa leyo khuma.” Ha yini? “Hikuva gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona; kambe nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.”—Matewu 7:13, 14.

Xana hakunene Yesu a a vula leswaku vukhongeri byin’wana byi yisa “endzovisweni”? Kumbexana a a vula leswaku lava nga pfumeriki eka Xikwembu va le gondzweni leri anameke, kasi lava pfumelaka eka Xikwembu—swi nga khathariseki leswaku va le ka vukhongeri byihi—va le gondzweni ro khuma leri yisaka evuton’wini?

Endzhakunyana ka loko Yesu a vule leswaku ku ni magondzo mambirhi ntsena, u te: “Tivoneleni vaprofeta va mavunwa lava taka va ambale nguvu ya nyimpfu, kambe endzeni va ri timhisi leti kakatlulaka.” (Matewu 7:15) U tlhele a ku: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni.” (Matewu 7:21) Loko munhu  a vitaniwa muprofeta kumbe a vula leswaku Yesu i “Hosi” yakwe, swa twisiseka ku vula leswaku munhu yoloye i munhu wa vukhongeri. Hikwalaho, swi le rivaleni leswaku Yesu a a lemukisa vanhu leswaku a hi vukhongeri hinkwabyo lebyi amukelekaka eka Xikwembu naswona a hi vadyondzisi hinkwavo va vukhongeri lava va faneleke va tshembiwa.

Tanihi leswi ku nga riki tindlela hinkwato to khongela leti amukelekaka eka Xikwembu, kutani u nga ri kumisa ku yini gondzo ro khuma leri yisaka evuton’wini exikarhi ka magondzo yo tala lama nga kona? Xiya xikombiso lexi: A hi nge u lahleka edorobeni lerikulu. Kutani u kombela mpfuno. Ivi munhu loyi u n’wi vutisaka a ku byela leswaku u kongoma evuxeni. Kutani un’wana a ku byela leswaku u kongoma evupela-dyambu. Kambe un’wana a ringanyeta leswaku u hlawula gondzo leri u vonaka leswaku ri lulamile. Ivi eku heteleleni, munhu un’wana a humesa mepe lowu tshembekaka kutani a ku komba gondzo leri ku nga rona. Xisweswo a ku nyika mepe leswaku u ta languta eka wona loko u ri karhi u famba. Xana a wu nga ta va ni ntshembo wa leswaku u ta fika laha u yaka kona?

Hilaha ku fanaka, loko swi ta emhakeni yo hlawula vukhongeri lebyi amukelekaka eka Xikwembu, hi fanele hi lava nkongomiso eka mepe lowu tshembekaka. Xana wu kona mepe wolowo? Ina, wu kona. Mepe wolowo i Bibele, leyi vulaka leswi: “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni.”—2 Timotiya 3:16.

Swi nga ha endleka leswaku u na byona hi ririmi ra wena vuhundzuluxeri bya Bibele lebyi u nga byi tirhisaka tanihi mepe. Vakandziyisi va magazini lowu, ku nga Timbhoni ta Yehovha, ti humese vuhundzuluxeri lebyi tshembekaka bya Bibele lebyi vuriwaka Vuhundzuluxeri Bya Misava Leyintshwa Bya Matsalwa Yo Kwetsima. Hambiswiritano, loko u nga ri Mbhoni ya Yehovha u nga ha tsakela ku tirhisa vuhundzuluxeri byin’wana loko u lava ku vona leswaku hi byihi vukhongeri lebyi amukelekaka eka Xikwembu ni lebyi nga amukelekiki. Hikokwalaho, eka swihloko leswi landzelaka ku tshahiwe Tibibele to hlayanyana leti vukhongeri byo tala byi ti xiximaka swinene.

Loko u ri karhi u hlaya swihloko leswi landzelaka, fananisa leswi u swi tivaka ni leswi Bibele yi swi vulaka. Tsundzuka marito ya Yesu malunghana ni ndlela leyi hi nga byi hambanisaka ha yona vukhongeri lebyi amukelekaka eka Xikwembu ni lebyi nga amukelekiki. U te: “Murhi lowunene wu tswala mihandzu leyo nandziha, ni murhi lowo biha wu tswala mihandzu leyo biha. Murhi lowunene a wu koti ku tswala mihandzu leyo biha, ni murhi wo biha a wu koti ku tswala mihandzu leyo nandziha.” (Matewu 7:17, 18, Bibele—Mahungu Lamanene) A hi kambisiseni mihandzu yinharhu ntsena leyinene, leyi Bibele yi vulaka leswaku i mihandzu ya “murhi lowunene.”