Sylvia loyi a tirhaka eka swa rihanyo u ri: “Ndzi ye ekholichini ni vanhu vo tala lava a va vula leswaku va le ka vukhongeri. Kambe a va ba xijumbana eka swikambelo naswona a va tirhisa swidzidziharisi. A va nga ri na mhaka ni vukhongeri.”

Wanuna loyi a vuriwaka Lionel u ri: “Lava ndzi tirhaka na vona va hemba hi ku vula leswaku va vabya va ri karhi va nga vabyi. Va le ka vukhongeri kambe a va swi tirhisi leswi va swi dyondzaka—ku fana ni fanichara leyi nga yo khavisa.”

Mahanyelo ya vanhu vo tala a ma kongomisiwi hi vukhongeri. Vanhu vo tala namuntlha va ni “xivumbeko xa ku tinyiketela loku nga ni vukwembu” kambe va tikomba va nga “tshembeki eka matimba ya kona.” (2 Timotiya 3:5) Varhangeri va vona va vukhongeri a va veki xikombiso lexinene, hambi ku ri vafundhisi a va wu nyiki ntlhambi wa vona ndzayo ya Matsalwa leyi lavekaka leswaku wu va ni mahanyelo lamanene. A swi hlamarisi leswi vo tala va tshembaka leswaku Xikwembu a xi khathali hi ndlela leyi va hanyaka ha yona.

Bibele yi kombisa leswaku Xikwembu xi ni mintlhaveko naswona mahanyelo ya hina i ya nkoka swinene eka xona. Loko Vaisrayele va khale va xandzukela Xikwembu, “a va xi twisa ku vava.” (Pisalema 78:40) Hambiswiritano, ku ni “ntsako lowukulu swinene etilweni” loko munhu a tshika hi ku helela mahanyelo yakwe yo biha. (Luka 15:7) Loko munhu a sungula ku tlangela timfanelo ta Tata wa hina la nga tilweni, rirhandzu rakwe eka Xikwembu ri ta ya ri kula, leswi n’wi susumetelaka ku rhandza leswi Xikwembu xi swi rhandzaka ni ku venga leswi xi swi vengaka.—Amosi 5:15.

Deseret News ya le Salt Lake City, eUtah, le U.S.A yi ri: “Timbhoni ta Yehovha ti pfuna vanhu leswaku va antswisa vuxaka bya vona bya ndyangu, leswaku va pfuna vanhu van’wana ni ku va vaaka-tiko lava tshembekaka.” Phepha-hungu ri engetele ri ku: “Swirho swa tona swi landzela milawu leyi tlakukeke ya mahanyelo. Swi tshemba leswaku ku dzaha, ku nwa ku tlula mpimo, ku tirhisa swidzidziharisi, ku gembula, ku endla timhaka ta masangu munhu a nga si mila ni meno ni vusodoma i swiendlo leswi nga onhaka vuxaka bya swona ni Xikwembu.”

Xana ku dyondza hi Xikwembu swi ti pfuna njhani Timbhoni? Sylvia loyi a tshahiweke eku sunguleni u ri: “Vukanganyisi byi tolovelekile eka swa rihanyo. A swi ta olova leswaku ndzi va na vukanganyisi. Kambe ku twisisa ndlela leyi Yehovha * a titwaka ha yona malunghana na byona swi ndzi pfune leswaku ndzi endla leswi lulameke. Sweswi ndzi tsakile naswona ndzi ni ku rhula ka mianakanyo.” Sylvia wa tshemba leswaku ku hanya hi ku pfumelelana ni milawu ya vukhongeri byakwe swi antswise vutomi byakwe.