Xana hakunene Yehovha wa khathala hi hina kumbe u honisa swiphiqo swa vanhu emisaveni leyi? Nhlamulo ya Bibele ya xivutiso xexo ya hi chavelela. Hakunene Xikwembu xa khathala hi vanhu naswona xi lava leswaku hi tiphina hi vutomi. Siku ni siku xi pfumelela vanhu—hambi ku ri lava nga xi nkhensiki—leswaku va vuyeriwa hi vunene bya xona lebyikulu. Xiya marito ya muapostola Pawulo.—Hlaya Mintirho 14:16, 17.

Loko a vulavula ni vanhu va le mutini wa Listra lava a va nga ri vagandzeri va Xikwembu, Pawulo u te: “Eka switukulwana leswi hundzeke [Xikwembu] xi pfumelele matiko hinkwawo leswaku ma famba hi tindlela ta wona, hambileswi, hakunene, xi nga titshikangiki xi nga ri na vumbhoni bya leswaku xi endle leswinene, xi mi nyika timpfula ta le tilweni ni tinguva ta mihandzu, xi tata timbilu ta n’wina hi ku helela hi swakudya ni ku khana lokukulu.” Xana marito wolawo a ma vula yini eka vayingiseri va Pawulo?

Vanhu va le Listra a va ta wu twisisa hi ku olova ntiyiso wa marito ya Pawulo. A va rima naswona a va tshama endhawini leyi noneke leyi nga ni mati lama eneleke. Kambe hilaha Pawulo a va tsundzuxeke hakona, Xikwembu i Xihlovo xa mpfula ni tinguva ta mihandzu. Xisweswo, nkarhi na nkarhi loko va tshovela ntshovelo wo tala ni ku tiphina hi swakudya swo nandziha, a va vuyeriwa eka vunene bya Xikwembu.

Marito ya Pawulo lama yaka eka vanhu va le Listra ma hi dyondzisa tidyondzo ta nkoka to hlayanyana malunghana na Yehovha Xikwembu.

Yehovha u hi nyika ntshunxeko wo tihlawulela. Xiya leswaku Yehovha u pfumelele vanhu va matiko hinkwawo leswaku ‘va famba hi tindlela ta vona.’ Buku ya tinhlamuselo ta Bibele yi vula leswaku xiga lexi xi nga ha vula “ku endla hilaha va lavaka hakona” kumbe “ku endla hilaha va ehleketaka leswaku i swinene.” Yehovha a nga sindzisi munhu leswaku a n’wi gandzela. U hi nyike ntshunxeko wa ku tihlawulela—ku nga vuswikoti byo hlawula ndlela leyi hi lavaka ku hanya ha yona.—Deteronoma 30:19.

Yehovha u lava leswaku hi n’wi tiva. Pawulo u hlamusele leswaku a ‘nga titshikangi a nga ri na vumbhoni.’ Buku ya tinhlamuselo ta Bibele leyi tshahiweke eku sunguleni yi vula leswaku xivulwa lexi xi nga ha hundzuluxeriwa xi ku, “xi va kombise kahle vanhu leswaku i Xikwembu xa muxaka muni.” Ntumbuluko wa Xikwembu wu nyikela vumbhoni lebyi tiyeke eka “timfanelo ta xona leti nga vonakiki” ku katsa vunene bya xona, vutlhari, matimba ni rirhandzu. (Varhoma 1:20) Yehovha u hlavutele swo tala malunghana na yena eBibeleni. (2 Timotiya 3:16, 17) Xana a swi le rivaleni leswaku u lava hi n’wi tiva?

Yehovha u lava hi tsaka. Pawulo u vule leswaku u tata “timbilu ta [hina] hi ku helela hi swakudya ni ku khana lokukulu.” Hambi ku ri mudyohi loyi a nga pfumeriki leswaku Yehovha u kona a nga tiphina hi swakudya ivi a eneriseka embilwini yakwe ni ku tsaka. Hambiswiritano, Xikwembu xi lava leswaku hi tiphina hi ntsako wa xiviri wa hilaha ku nga heriki. Sweswo swi nga koteka ntsena loko hi dyondza ntiyiso malunghana na xona kutani hi wu tirhisa evuton’wini bya hina.—Pisalema 144:15; Matewu 5:3.

Hinkwerhu ka hina ha vuyeriwa eka vunene bya Yehovha siku ni siku. Ha yini u nga dyondzi leswi engetelekeke malunghana ni ndlela leyi u nga kombisaka ha yona ku nkhensa ka wena eka Xikwembu lexi tataka mbilu ya wena “hi ku helela hi swakudya ni ku khana lokukulu”?