Loko vukhongeri byin’wana byi ku khomise tingana, swi nga ha ku tikela ku tshemba byin’wana ni byin’wana. Kambe tiyiseka leswaku vukhongeri lebyi u nga byi tshembaka byi kona. Loko a ri laha misaveni, Yesu u hlengelete ntlawa wa valandzeri lava tshembekeke kutani a va dyondzisa ku hanya hi milawu ya Xikwembu. Valandzeri va Kreste va xiviri—vanhu lava tirhaka hi matimba leswaku va hanya hi milawu ya Vukreste—va ha ri kona. Xana u nga va kuma kwihi?

Estelle, loyi a boxiweke eka xihloko lexi hundzeke u ri: “Ndzi dyondze Bibele loko ndzi sungula ku dyondza ni Timbhoni ta Yehovha. A swi ndzi tekelanga nkarhi wo leha ku twisisa Yohane 8:32, leyi nge: ‘Mi ta tiva ntiyiso, kutani ntiyiso wu ta mi ntshunxa.’”

Ray, loyi na yena a boxiweke eku sunguleni, u ri: “Hi ku dyondza Bibele ni Timbhoni ta Yehovha, ndzi dyondze leswaku Xikwembu a hi xona xi endlaka leswaku vanhu va xaniseka. A ndzi tsake swinene ku twa leswaku Xikwembu xi ni xivangelo lexinene xo pfumelela vubihi sweswi, xi tlhela xi tshembisa leswaku xi ta byi herisa ku nga ri khale.”

Swi le rivaleni leswaku swa tika ku endla leswinene loko vanhu vo tala va nga ri na mahanyelo lamanene. Kambe swa koteka. Vanhu vo tala va lava mpfuno wa leswaku va twisisa ni ku tirhisa Bibele. Hi yona mhaka leyi Timbhoni ta Yehovha ti fambisaka tidyondzo ta mahala ta le kaya ta Bibele ni vanhu va timiliyoni emisaveni hinkwayo. Vhiki ni vhiki, vanhu vo tala va le ku dyondzeni leswi hakunene Bibele yi swi dyondzisaka. Hikwalaho ka sweswo, va tshinela ekusuhi ni Muvumbi wa vona ni ku endla leswaku vutomi bya vona byi va lebyi tsakisaka. *

Nkarhi lowu taka loko u hlangana ni Timbhoni ta Yehovha, ha yini u nga ti vutisi leswaku ha yini ti tshemba vukhongeri bya tona? Kambisisa tidyondzo ta tona ni matimu ya tona. Kutani u tiendlela xiboho loko ku ri ni vukhongeri lebyi u nga byi tshembaka.