Malunghana ni ku dlayiwa ka Yesu swin’we ni swigevenga swimbirhi etimhandzini ta nxaniso, rungula leri kumekaka eka Evhangheli ri ri: ‘Vayuda va kombele Pilato leswaku ku tshoviwa milenge ya vona kutani mintsumbu yi susiwa.’—Yohane 19:31.

Nawu wa Xiyuda a wu vula leswaku ntsumbu wa xigevenga, lowu a wu ta hayekiwa emhandzini endzhaku ka loko xi dlayiwile ‘wu nga tshuki wu tshama vusiku hinkwabyo emhandzini.’ (Deteronoma 21:22, 23) Vayuda a va tirhisa nawu lowu Varhoma a va wu tirhisa eka vanhu lava va va dlayeke hi ku va hayeka emhandzini. Ku tshova milenge ya vavanuna lava a swi ta endla leswaku va hatla va fa, kutani va lahliwa Savata yi nga si sungula nimadyambu.

Eka swiendlakalo swo tala swa ku dlayiwa ka vanhu, munhu loyi a voniweke nandzu a a beleriwa mavoko ni milenge emhandzini hi swipikiri. Loko mhandzi yi yimisiwile, a a ta siyiwa a hayekiwile a ri karhi a twa ku vava swinene, miri wakwe wu ri karhi wu tikela swipikiri leswi a beleriweke ha swona. Leswaku munhu yoloye a kota ku hefemula a a fanele a sima hi swipikiri leswi a beleriweke ha swona. Loko marhambu ya milenge yakwe ma tshoveka, a a nga ha ta swi kota ku endla tano. Leswi a a tsandzeka ku hefemula a swi endla leswaku a hatla a fa.

Xipelupelu i tlhari leri Davhida a ri tirhiseke ku dlaya Goliyadi lowa xihontlovila. Swi nga endleka leswaku Davhida u dyondze ku tirhisa tlhari leri a ha ri mufana loko a ri karhi a risa.—1 Samuwele 17:40-50.

Xifaniso xa xipelupelu xi kumeka eka swifaniso swa vutshila swa le Egipta ni swa le Asiriya swa le minkarhini ya ku tsariwa ka Bibele. Tlhari leri a ri ri ni xikhwama xa dzovo kumbe lapi leri rhungeleriweke eka tintambhu timbirhi. Mutirhisi wa xipelupelu a a ta hoxa ribye ra xirhendzevutana leri anameke ku sukela eka 5 ku ya eka 7,5 wa tisentimitara exikhwameni xexo naswona ri tika kwalomu ka 250 wa tigiramu. A a ta ndzulukisa xipelupelu ehenhla ka nhloko yakwe kutani a tshika ntambhu yin’we leswaku ribye ri ta kota ku tsutsuma hi rivilo lerikulu naswona ri kongome laha a lavaka ri ya kona.

Vayimburi va le Vuxa-xikarhi va kume maribye yo tala lawa a ma tirhisiwa eka xipelupelu etinyimpini ta khale. Swi nga ha endleka leswaku masocha lawa a ma ri ni vutshila a ma ndzulukisa maribye hi rivilo leri endlaka 160 ku ya eka 240 wa tikhilomitara hi awara. Swidyondzi a swi pfumelelani na yona mhaka ya leswaku xipelupelu a xi aname ku ringana ni vurha kambe xipelupelu a ku ri tlhari leri nga ni khombo.—Vaavanyisi 20:16.