Megan: A ndzi tsakile loko ndzi ku vona eka Xitsundzuxo xa rifu ra Yesu Kreste vhiki leri hundzeke. * Xana u swi twisisile?

Shirley: Ndzi swi twile kambe ku vula ntiyiso, swin’wana a ndzi swi twisisanga. Ndzi tshame ndzi twa vanhu va vula leswaku va tlangela ku velekiwa ka Yesu hi Khisimusi ni ku tlangela ku pfuxiwa ka yena hi Paseka, kambe a ndzi si tshama ndzi twa vanhu va vula leswaku va tlangela rifu ra yena.

Megan: I ntiyiso, Khisimusi ni Paseka swi dume ngopfu emisaveni hinkwayo. Kambe Timbhoni ta Yehovha ti vona swi ri swa nkoka ku tsundzuka rifu ra Yesu. Loko u ri ni nkarhinyana, ndzi nga swi tsakela ku ku hlamusela swivangelo swa kona.

Shirley: Swi lulamile, hi nga bula.

Megan: Timbhoni ta Yehovha ti tsundzuka rifu ra Yesu hikuva u lerise valandzeri vakwe leswaku va endla tano. Xiya leswi endlekeke hi vusiku bya le mahlweni ka rifu ra Yesu. Xana u tshame u twa hi swakudya swo hlawuleka leswi a swi dyeke ni valandzeri vakwe vo tshembeka?

Shirley: Xana u vula Xilalelo xa Hosi?

Megan: U tiyisile, i Xilalelo xa Hosi. Hi vusiku byebyo, Yesu u nyike valandzeri va yena swiletelo leswi twisisekaka. Ndzi kombela u hlaya marito yakwe eka Luka 22:19.

Shirley: Hi swona. “Nakambe, a teka xinkwa, a nkhensa, a xi phema, ivi a va nyika xona, a ku: ‘Leswi swi vula miri wa mina lowu nga ta nyikeriwa hikwalaho ka n’wina. Tshamani mi ri karhi mi endla leswi leswaku mi ndzi tsundzuka.’”

Megan: Inkomu. Xiya swiletelo swa Yesu emakumu ka ndzimana leyi, yi ri: “Tshamani mi ri karhi mi endla leswi leswaku mi ndzi tsundzuka.” Loko a nga si va nyika swiletelo, Yesu u swi veke erivaleni leswi a va fanele va swi tsundzuka hi yena. U vule leswaku u ta nyikela vutomi bya yena hikwalaho ka valandzeri vakwe. U tlhele a vula leswi yelanaka ni mhaka leyi eka Matewu 20:28. U te: ‘N’wana wa munhu a nga telanga ku tirheriwa, kambe a tele ku tirhela ni ku nyikela moya-xiviri wakwe wu va nkutsulo wa lavo tala.’ Hi ku komisa, hi yo mhaka Timbhoni ta Yehovha ti hlanganaka kan’we hi lembe hi siku leri Yesu a feke ha rona, leswaku ti tsundzuka gandzelo ra nkutsulo leri Yesu a ri nyikeleke. Rifu ra yena ri ta ponisa vo tala lava n’wi yingisaka.

Shirley: Ndzi tshame ndzi twa vanhu va vula leswaku Yesu u hi ferile leswaku hi ta kuma vutomi. Kambe ku vula ntiyiso, a ndzi swi twisisi kahle.

Megan: A hi wena ntsena, mhaka ya nkutsulo wa Yesu yi dzikile swinene. Kambe i yin’wana ya timhaka leti tsakisaka leyi kumekaka eRitweni ra Xikwembu. Xana hi nga ya emahlweni?

Shirley: Swi lulamile.

 Megan: Ndza ha ku heta ku hlaya hi mhaka leyi ya nkutsulo, ndzi ta ringeta ku ku hlamusela yona.

Shirley: Hi swona.

Megan: Leswaku hi ta kota ku twisisa mhaka leyi ya nkutsulo, hi fanele hi rhanga hi twisisa xiyimo lexi Adamu na Evha va xi vangeke loko va dyoha le ntangeni wa Edeni. Ndzi kombela leswaku u hlaya Varhoma 6:23.

Shirley: Hi swona. Yi ri: “Hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.”

Megan: Inkomu. A hi kambisise ndzimana leyi. Xo sungula, xiya leswaku ndzimana leyi yi sungula hi marito lama nge: “Hakelo leyi tisiwaka hi xidyoho i rifu.” Lowu i wun’wana wa milawu yo sungula leyi Xikwembu xi yi vekeke eku tumbuluxiweni ka vanhu—hakelo ya xidyoho i rifu. I ntiyiso leswaku eku sunguleni vanhu a va nga ri vadyohi. Adamu na Evha a va hetisekile, naswona vana va vona a va ta velekiwa va ri tano. Leswi swi vula leswaku a va nga ta fa. Adamu na Evha ni vana va vona a va ta hanya hilaha ku nga heriki va tsakile. Kambe, hilaha hi tivaka hakona a swi vanga tano, a hi swona?

Shirley: Hi swona. Adamu na Evha va dye mbhandzu lowu yirisiweke.

Megan: I ntiyiso. Loko va tshike ku yingisa Xikwembu va xi dyoherile. Hi ndlela yoleyo va hlawule ku va vanhu lava nga hetisekangiki, va ve vadyohi. Xiboho xa Adamu na Evha xi vangele vanhu hinkwavo maxangu.

Shirley: U vula njhani?

Megan: I nge ndzi ku nyika xikombiso. Xana wa swi rhandza ku baka?

Shirley: Ina! Ndza swi rhandza.

Megan: A hi nge u ni pani leyintshwa yo baka xinkwa. Kambe swi nga endleka yi wa yi phateka u nga si yi tirhisa. Xana ku ta endleka yini hi swinkwa leswi u nga ta swi baka hi pani yoleyo? Xana a swi nge humi swi phatekile?

Shirley: Swi tano.

Megan: Hilaha ku fanaka, loko Adamu na Evha va hlawule ku nga yingisi Xikwembu va “phatekile” hikwalaho ka xidyoho ni ku nga hetiseki. Leswi va dyoheke va nga si va ni vana, vana va vona hinkwavo va tswariwe va “phatekile.” Hinkwavo va velekeriwe exidyohweni. Ebibeleni rito leri nge “xidyoho” ri tlhela ri vula xiyimo lexi munhu a velekiweke a ri eka xona. Leswi swi vula leswaku, hambileswi mina na wena a hi nga endlanga nchumu xo biha naswona a hi nga se velekiwa, kambe ku nga yingisi ka Adamu na Evha swi endle leswaku hi tikuma hi ri ekhombyeni ra ku nga hetiseki ni xidyoho leswi landzeriwaka hi rifu. Hilaha hi hlayeke ha kona eka Varhoma 6:23, hakelo ya xidyoho i rifu.

Shirley: Kambe leswi u swi vulaka a swi twali kahle. Hikwalaho ka yini vanhu hinkwavo va fanele va xaniseka hikwalaho ka xidyoho xa Adamu na Evha?

Megan: U tiyisile, swi tikomba swi nga twali. Kambe ku ni swo tala leswi u faneleke u swi tiva. Leswi Xikwembu xi nga ni vululami lebyi hetisekeke, xi endle leswaku Adamu na Evha va fela swidyoho swa vona kambe hina vana va vona hi nyikiwe ntshembo. Xikwembu xi endle lunghiselelo ra leswaku hi kota ku huma eka xiyimo lexi xo tika. Lunghiselelo ra kona ku ve gandzelo ra nkutsulo ra Yesu. A hi hlaye nakambe Varhoma 6:23. Endzhaku ko vula leswaku “hakelo leyi tisiwaka hi xidyoho i rifu,” ndzimana leyi yi tlhela yi ku: “Kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” Xisweswo rifu ra Yesu hi rona ri hi ponisaka eka xidyoho ni rifu. *

Megan: Ku ni swin’wana leswi ndzi rhandzaka ku ku komba swona eka ndzimana leyi.

Shirley: I yini?

 Megan: Xiya leswaku ndzimana leyi yi ri: “Nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” Loko ku ri leswaku Yesu u xanisekile, a nyikela vutomi bya yena hikwalaho ka hina, ha yini ndzimana leyi yi vula leswaku nkutsulo i “nyiko leyi nyikiwaka hi Xikwembu”? Ha yini yi nga vuli leswaku “nyiko leyi nyikiwaka hi Yesu?” *

Shirley: A ndzi swi tivi.

Megan: Xikwembu xi vumbe Adamu na Evha naswona va xi dyoherile loko va nga xi yingisi ensin’wini ya Edeni. Swi le rivaleni leswaku xi twe ku vava swinene loko vanhu vambirhi vo sungula va xi xandzukela. Kambe xi hatle xi lunghiselela xitshunxo. * Xi endle leswaku xin’wana xa swivumbiwa swa xona swa moya xi ta emisaveni xi ta hanya tanihi munhu la hetisekeke naswona xi nyikela hi vutomi bya xona byi va gandzelo ra nkutsulo. Hakunene lunghiselelo ra nkutsulo a ku ri nyiko leyi humaka eka Xikwembu. Nakambe ku ni ndlela yin’wana leyi ha yona nkutsulo wu nga nyiko leyi humaka eka Xikwembu. Xana u tshame u anakanya hi ndlela leyi Xikwembu xi titweke ha yona loko Yesu a dlayiwa?

Shirley: Doo! a ndzi nga si tshama ndzi swi anakanya.

Megan: Ndzi vona swilo swo tlanga swa vana laha handle. Swi vula leswaku u ni vana.

Shirley: Ina, ndzi ni vana vambirhi—xifanyetana ni xinhwanyatana.

Megan: Leswi u nga mutswari, anakanya ndlela leyi Tata wa Yesu wa le tilweni ku nga Yehovha Xikwembu a titweke ha yona hi siku leri Yesu a feke ha rona. Xana u titwe njhani loko a langute N’wana loyi a n’wi rhandzaka, a khomiwa, a hlekuriwa a tlhela a biwa hi swibakela? Xana Xikwembu xi titwe njhani loko N’wana wa xona a beleriwa emhandzini ni ku fa rifu ro vava swinene?

Shirley: A ndzi nga se tshama ndzi swi anakanya sweswo? U fanele a tshoveke mbilu.

Megan: I ntiyiso leswaku, a hi nge swi koti ku twisisa hi laha ku heleleke ndlela leyi Xikwembu xi titweke ha yona hi siku rolero. Kambe ha swi tiva leswaku wa ku twa ku vava, ni leswaku ha yini a pfumelele leswaku swi endleka. Mhaka ya kona yi hlamuseriwa kahle eka tsalwa leri tivekaka ngopfu, ra Yohane 3:16. Xana u nga swi tsakela ku ri hlaya?

Shirley: Ina. Ri ri: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”

Megan: Inkomu. Ndzi kombela u tlhela u languta eku sunguleni ka ndzimana leyi. Yi ri: “Xikwembu xi rhandze misava.” Xa nkoka i rirhandzu. I rirhandzu leri endleke leswaku Xikwembu xi rhumela N’wana wa xona leswaku a ta hi fela. Hakunene gandzelo ra nkutsulo i ndlela leyikulu swinene leyi hi kombisiweke ha yona rirhandzu. Hikwalaho, Timbhoni ta Yehovha ta hlangana lembe ni lembe leswaku ti tsundzuka siku leri Yesu a feke ha rona. Xana leswi se hi buleke ha swona swi ku pfunile?

Shirley: Ina, swi ndzi pfunile. Ndza khensa ku va u tinyike nkarhi wa ku ndzi hlamusela mhaka leyi.