XANA U TIVONA U TSAKILE? Loko swi ri tano, i yini lexi ku endlaka u tsaka? Xana i ndyangu, ntirho kumbe vukhongeri bya wena? Kumbexana ku na leswi u swi languteleke hi mahlongati leswi nga ta ku endla leswaku u tsaka, swo tanihi ku heta xikolo, ku kuma ntirho wa kahle kumbe ku xava movha.

Vanhu vo tala va tsaka loko va fikelela nchumu wo karhi lowu a va wu lava. Kambe, xana va tsaka nkarhi wo tanihi kwihi? Mikarhi yo tala ntsako wolowo a wu tlhaveriwi hi dyambu naswona sweswo swi va heta matimba.

Ku tsaka ku hlamuseriwa tanihi xiyimo xa ku va munhu a twa a ri eku tiphineni hi nkarhi wolowo, a ngo titwa a enerisekile ntsena kambe u tsakela vutomi swinene naswona hi ntumbuluko u twa onge xiyimo xexo xi nga ka xi nga cinci.

Nakambe tanihi leswi ntsako ku nga nchumu lowu hi wu lavaka nkarhi na nkarhi, a hi xikongomelo kumbe pakani kambe wu hlamuseriwa tanihi riendzo. Loko u ku: “Ndzi ta tsaka loko . . . ” swi fana ni loko u tibyela leswaku u ta tsaka hi nkarhi wo karhi.

Hi xikombiso, a hi pimanisi ku tsaka ni ku va ni rihanyo lerinene. Hinkwerhu ha swi lava ku va ni rihanyo lerinene. Kutani hi dya swakudya swa rihanyo, hi endla vutiolori ni ku hanya hi ndlela leyinene. Swi tano ni hi ku va ni ntsako. Swi lava leswaku hi hanya vutomi lebyinene lebyi fambisanaka ni milawu yo karhi leyinene.

I yini swin’wana leswi nga endlaka leswaku munhu a tsaka? Hambileswi swin’wana swi nga swa nkoka eka van’wana, leswi landzelaka na swona swi nga ku pfuna ku va ni ntsako:

• KU TSAKA HILESWI U NGA NA SWONA U TLHELA U HANANA

• KU VA NI RIHANYO LERINENE NI KU AMUKELA XIYIMO

• KU VA NI RIRHANDZU

• KU RIVALELA

• KU VA NI XIKONGOMELO HI VUTOMI

• KU VA NI NTSHEMBO

Buku ya vutlhari leyi xiximiwaka swinene yi ri: “Va tsaka lava pfumalaka xihoxo endleleni ya vona.” (Pisalema 119:1) Sweswi a hi kambisiseni ndlela yoleyo.