Vanhu lava nga ni vutihlamuleri va tshembeka. Loko va nyikiwe ntirho va wu endla kahle va tlhela va wu hetisisa hi nkarhi.

N’wana a nga dyondza ku va ni vutihlamuleri hambiloko a ha ri ntsongo. Hi ku ya hi buku leyi nge, Parenting Without Borders, “loko vana va ri ni lembe ni tin’hweti tinharhu va endla leswi vatswari va va byelaka swona kambe loko se va ri ni lembe ni tin’hweti ta tsevu va lava ku endla xin’wana ni xin’wana lexi vatswari va xi endlaka. Hi ku ya hi mindhavuko yo tala loko vana va ri ni malembe ya ntlhanu ku ya eka nkombo, vatswari va vona va sungula ku va dyondzisa ndlela leyi va nga pfunaka ha yona ekaya. Hambiloko va ri vatsongo vana va nga swi kota ku endla mitirho yo tala hi ndlela leyinene.”

Etindhawini tin’wana, vantshwa vo tala va rhurha ekaya leswaku va ya ti hanyela vutomi bya vona kambe loko swi nga va fambeli kahle va tlhelela eka vatswari va vona. Hakanyingi leswi swi vangiwa hileswi vantshwa vo tala va nga dyondzisiwangiki ku tirhisa mali hi vutlhari, ku khathalela ndyangu kumbe ku va ni vutihlamuleri.

Hikwalaho i swinene ku dyondzisa vana va wena ku va ni vutihlamuleri sweswi leswaku va ta tiva leswi va faneleke ku swi endla loko se va kurile. Buku leyi nge, How to Raise an Adult yi ri: “Mhunti yi biwa ya ha ri ni mahika, dyondzisa vana va wena va ha ri vatsongo leswaku loko se va kurile va tiva leswi va faneleke ku swi endla.”

Va nyike mitirho leyi va faneleke va yi endla.

NSINYA WA NAWU WA LE BIBELENI: “Ku ni vuyelo lebyinene eka ku tikarhata ka muxaka wun’wana ni wun’wana.”—Swivuriso 14:23.

Vana va swi rhandza ku pfuna vatswari va vona eka mitirho yin’wana ni yin’wana leyi va yi endlaka. Leswi va swi tsakelaka ku tirha namba u va nyika mitirho leyi va nga yi endlaka ekaya.

Vatswari van’wana a va swi lavi ku endla tano. Va vula leswaku a va lavi ku nyika vana va vona mitirho ekaya hikuva va ni mitirho yo tala exikolweni kutani a va lavi ku va engetela ndzhwalo.

 Vana lava nga ni mitirho ekaya hi vona lava pasaka exikolweni hikuva yi va dyondzisa ku endla mitirho kukondza va yi heta. Buku leyi nge, Parenting Without Borders yi vula leswaku, “Loko hi sivela vana va hina loko va lava ku hi pfuna loko va ha ri vatsongo va ta hetelela va anakanya leswaku ku pfuna van’wana a hi swa nkoka . . . Va nga ha hetelela va anakanya leswaku va ta dya va tshamile.”

Hilaha buku leyi yi vulaka hakona, loko vana va endla mitirho ya le kaya va dyondza ku pfuna van’wana ku nga ri ku va ni vutianakanyi. Loko vana va endla mitirho ya le kaya swi va endla va titwa va ri va nkoka endyangwini naswona va swi twisisa leswaku hi leswi va faneleke ku swi endla.

Va pfune va twisisa leswaku loko va endla swihoxo ku ta va ni vuyelo byo biha.

NSINYA WA NAWU WA LE BIBELENI: “Yingisa xitsundzuxo u tlhela u amukela ndzayo, leswaku u ta tlhariha eka vumundzuku bya wena.”—Swivuriso 19:20.

Loko n’wana wa wena a onhele un’wana swilo swakwe, u nga n’wi yimeleli eka leswi endlekeke. Vana swa va olovela ku amukela swihoxo leswi va swi endleke, hikwalaho kombela ku rivaleriwa u tlhela u riha leswi va swi onheke.

Loko vana va amukela swihoxo swa vona swi ta va dyondzisa

• leswaku va tshembeka va tlhela va amukela swihoxo swa vona

• leswaku va nga kombi van’wana hi rintiho

• leswaku va nga tiyimeleli

• leswaku va kombela ku rivaleriwa loko swi fanerile