LESWI MADOKODELA MA SWI VULAKA

Nhlokomhaka yin’wana leyi a yi tsariwe eka phephahungu ra Harvard Mental Health Letter yi te: “Ku khensa swi fambisana ni ntsako. Ku tlhela ku endla leswaku munhu a titwa a tsakile, a tsundzuka swilo leswinene, a va ni rihanyo lerinene, a kota ku tiyisela maxangu ni ku va ni vuxaka lebyinene ni vanhu van’wana.”

LESWI BIBELE YI SWI VULAKA

Bibele yi hi khutaza leswaku hi hlakulela mfanelo ya ku khensa. Muapostola Pawulo loyi a hi vekeleke xikombiso lexinene loko swi ta emhakeni leyi, u tsale a ku: “Tikombeni mi ri ni ku nkhensa.” Hi xikombiso, u ‘nkhense Xikwembu nkarhi hinkwawo,’ hikwalaho ka leswi vanhu vo tala a va amukela rungula rakwe. (Vakolosa 3:15; 1 Vatesalonika 2:13) Leswaku munhu a tshama a tsakile swi lava leswaku a va loyi a khensaka minkarhi hinkwayo. Ku endla tano, swi endla leswaku hi nga vi na mavondzo ni xikhomela, ku nga mikhuva leyi nga hi hetelaka ntsako ni ku endla leswaku vanhu va nga hi rhandzi.

Muvumbi wa hina u hi vekele xikombiso lexinene hi ku va la khensaka hambi ku ri eka vanhu lava ngo va ntshuri. Vaheveru 6:10 yi ri: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona.” Muvumbi wa hina u swi teka tanihi nchumu wo biha loko munhu a nga khensi.

“Tsakani minkarhi hinkwayo. Nkhensani mayelana ni hinkwaswo.”—1 Vatesalonika 5:16, 18.

VUYELO BYA KU KHENSA

Ku nga khathariseki leswaku hi nyikiwe nchumu wo karhi kumbe ku pfuniwa hi swilo swo karhi, loko hi khensa swi humba embilwini, swi endla leswaku munhu loyi a hi nyikeke nchumu wa kona kumbe ku hi pfuna a titwa a ri wa nkoka. Hambi ku ri vanhu lava hi nga va tiviki, va tsaka loko hi va khensa endzhaku ka loko va hi pfune hi swo karhi.

LESWI BIBELE YI SWI VULAKA

Yesu Kreste u te: “Hanyani hi ku nyika, kutani vanhu va ta mi nyika. Va ta chela eswifuveni swa n’wina mpimo lowunene, lowu gandliweke, lowu hlunguhliweke ni lowu khapakhapaka.” (Luka 6:38) Xiya xikombiso xa Rose, loyi a nga twiki wa le Vanuatu ku nga xihlala lexi kumekaka eSouth Pacific.

Rose a va kona eminhlanganweni ya Timbhoni ta Yehovha kambe a nga vuyeriwi ngopfu hileswi a nga ri tivi ririmi ra mavoko naswona evandlheni rero a ku nga ri na loyi a ri tivaka. Loko vatekani lava a va kota ku toloka ririmi ra mavoko va endzele vandlha rero, va xiye xiphiqo lexi kutani va sungule tlilasi yo dyondzisa ririmi ra mavoko. Rose u ma khensile matshalatshala wolawo. U te: “Ndzi tsakile leswi ndzi nga ni vanghana vo tala lava ndzi rhandzaka.” Vatekani lava va tsaka swinene loko va n’wi twa a khensa ni ku vona ndlela leyi a hlamulaka ha yona eminhlanganweni. Rose u tlhela a tlangela matshalatshala lawa van’wana va ma endleke yo dyondza ririmi ra mavoko leswaku va kota ku vulavula na yena.—Mintirho 20:35.

‘Loyi a nyikelaka ku nkhensa ku va xitlhavelo xakwe u vangamisa Xikwembu.’—Pisalema 50:23.

LESWI BIBELE YI SWI VULAKA

Leswi hi swi ehleketaka swi fambisana ni ndlela leyi hi titwaka ha yona. Davhida loko a khongela eka Xikwembu u te: “Ndzi anakanyisise hi ntirho wa wena hinkwawo; ndzi hambete ndzi anakanyisisa hi ntirho wa mavoko ya wena hi ku tirhandzela.” (Pisalema 143:5) Davhida a a khensa swi huma embilwini. Ku anakanyisisa hi mitirho ya Xikwembu hi swona leswi endleke leswaku a hlakulela mfanelo ya ku khensa, ku nga mukhuva lowu a wu sunguleke loko a ha ri ntsongo.—Pisalema 71:5, 17.

Bibele yi hi khutaza yi ku: ‘Swilo swin’wana ni swin’wana swa ntiyiso, leswi rhandzekaka, leswi ku vulavuriwaka kahle ha swona, swa vunene ni leswi dzunekaka, hambetani mi xiya swilo leswi.’ (Vafilipiya 4:8) Marito lama nge “hambetani mi xiya swilo leswi” ma kombisa leswaku hi fanele hi anakanyisisa, ku nga mukhuva lowu nga hi pfunaka leswaku hi va ni mfanelo ya ku khensa.

“Mbilu ya mina yi ta anakanyisisa hi swilo swa ku twisisa.”—Pisalema 49:3.