1. Lava endlaka xidyoho lexikulu va nga pfuniwa ku endla yini?

 EKA nhlokomhaka leyi hundzeke, hi vone ndlela leyi muapostola Pawulo a pfuneke vandlha ra le Korinto leswaku ri tlhantlha mhaka ya wanuna la endleke xidyoho lexikulu. Wanuna yoloye a nga hundzukanga naswona a a fanele a susiwa evandlheni. Hambiswiritano, hilaha tsalwa ra nhlokomhaka ri kombisaka hakona, van’wana lava endlaka swidyoho leswikulu va nga pfuniwa. Va nga pfuniwa leswaku va hundzuka. (Rhom. 2:4) Vakulu va nga va pfuna njhani leswaku va hundzuka?

2-3. Hi fanele hi endla yini loko hi tiva leswaku Mukreste u endle xidyoho lexikulu naswona hikwalahokayini?

² Loko vakulu va nga si pfuna mudyohi, va fanele va xi tiva kahle xiphiqo xakwe. Kutani hi fanele hi endla yini loko hi tiva leswaku Mukreste u endle xidyoho lexikulu lexi nga endlaka leswaku a susiwa evandlheni? Hi fanele hi khutaza mudyohi leswaku a ya kombela mpfuno eka vakulu.—Esa. 1:18; Mit. 20:28; 1 Pet. 5:2.

³ Ku ta endleka yini loko mudyohi a ala ku vulavula na vakulu? Hi ta ya eka vakulu hi ya va byela leswaku munhu yoloye a ta kuma mpfuno lowu a wu lavaka. Sweswo swi kombisa rirhandzu  hikuva a hi swi lavi ku lahlekeriwa hi makwerhu. Loko mudyohi a ya emahlweni ni xidyoho, u ta ya a onha vuxaka byakwe na Yehovha. A nga tlhela a onha ndhuma leyinene ya vandlha. Kutani hi xivindzi hi teka goza hileswi hi rhandzaka Yehovha ni mudyohi.—Ps. 27:14.

NDLELA LEYI VAKULU VA VA PFUNAKA HAYONA VANHU LAVA ENDLEKE XIDYOHO LEXIKULU

4. Hi xihi xikongomelo xa vakulu loko va hlangana ni munhu loyi a endleke xidyoho lexikulu?

⁴ Loko munhu evandlheni a endla xidyoho lexikulu, huvo ya vakulu yi hlawula vakulu vanharhu lava fanelekaka leswaku va vumba komiti. a Vavanuna lava va fanele va titsongahata. Hambileswi va nga ta ringeta ku pfuna mudyohi leswaku a hundzuka, va swi xiya leswaku a va nge n’wi sindzisi leswaku a cinca. (Det. 30:19) Vakulu va swi twisisa leswaku a hi vadyohi hinkwavo lava nga ta hundzuka hilaha Hosi Davhida a endleke hakona. (2 Sam. 12:13) Vadyohi van’wana va nga hlawula ku yi ba hi makatla ndzayo ya Yehovha. (Gen. 4:​6-8) Hambiswiritano, xikongomelo xa vakulu i ku pfuna mudyohi a hundzuka loko swi koteka. Hi yihi milawu leyi va kongomisaka loko va hlangana ni mudyohi?

5. Hi yihi ndzayo leyi vakulu va faneleke va yi tekela enhlokweni loko va hlangana ni mudyohi? (2 Timotiya 2:​24-26) (Nakambe vona xifaniso.)

⁵ Vakulu va teka mudyohi a ri nyimpfu ya risima leyi lahlekeke. (Luka 15:​4, 6) Hikwalaho, loko va hlangana ni mudyohi a va n’wi khahli kumbe ku n’wi holovela naswona loko va hlangana na yena a vo vutisa swivutiso ntsena ivi va kuma tinhlamulo. Ematshan’weni ya sweswo, va ta endla leswi boxiwaka eka 2 Timotiya 2:​24-26. (Yi hlaye.) Vakulu va fanele va olova ni ku va ni musa loko va tikarhatela ku fikelela mbilu ya mudyohi.

6. Vakulu va fanele va kambisisa yini va nga si hlangana ni mudyohi? (Varhoma 2:4)

⁶ Vakulu va kambisisa nkongomiso wa Yehovha. Va ringeta ku tekelela Yehovha loko va ri karhi va pfuna mudyohi, va tsundzuka marito ya Pawulo lama nge: “Xikwembu hi musa xi lava ku ku pfuna leswaku u hundzuka.” (Hlaya Varhoma 2:4.) Vakulu va fanele va tsundzuka leswaku i varisi lava kongomisiwaka hi Kreste. (Esa. 11:​3, 4; Mat. 18:​18-20) Loko komiti yi nga si hlangana ni mudyohi, yi ta kambisisa xikongomelo xa yona hi xikhongelo, ku nga ku pfuna mudyohi a hundzuka. Yi ta endla ndzavisiso eMatsalweni ni le ka mikandziyiso ya hina naswona yi ta  khongelela ku twisisa mudyohi ni xiyimo xakwe. Vakulu va ta kambisisa leswi va faneleke va swi tiva hi munhu yoloye leswi nga ha vaka swi endle a dyoha.—Swiv. 20:5.

7-8. Vakulu va nga ku tekelela njhani ku lehisa mbilu ka Yehovha loko va hlangana ni mudyohi?

⁷ Vakulu va tekelela ku lehisa mbilu ka Yehovha. Va yi tsundzuka ndlela leyi Yehovha a va pfuneke hayona vadyohi enkarhini lowu hundzeke. Hi xikombiso, Yehovha u n’wi lehisele mbilu Kayini, a n’wi byela leswi a swi ta n’wi endlekela loko a nga hundzuki nileswaku a a ta n’wi katekisa loko o yingisa. (Gen. 4:​6, 7) Yehovha u tsundzuxe Davhida hi ku tirhisa muprofeta Nathani loyi a tirhiseke xikombiso lexi khumbeke mbilu ya hosi. (2 Sam. 12:​1-7) Naswona Yehovha a a “tshamela ku rhumela” vaprofeta vakwe “hi ku phindhaphindha” eka tiko ra Israyele leri a ri nga yingisi. (Yer. 7:​24, 25) A nga yimelanga leswaku vanhu va yena va hundzuka ku ri kona a va pfunaka. Ku ri na sweswo, u ve wo sungula ku va khutaza ku hundzuka.

⁸ Vakulu va tekelela xikombiso xa Yehovha loko va ringeta ku pfuna lava endleke xidyoho lexikulu. Va va ‘lehisela mbilu’ hilaha 2 Timotiya 4:2 yi vulaka hakona. Loko nkulu a lava ku pfuna mudyohi leswaku a endla leswinene, mikarhi hinkwayo u fanele a va loyi a rhuleke naswona a lehisa mbilu. Loko nkulu a kwata kumbe a hela mbilu swi nga endla leswaku mudyohi a nga yi yingisi ndzayo yoleyo kumbe a ala ku hundzuka.

9-10. Vakulu va nga n’wi pfuna njhani mudyohi a ehleketisisa hi leswi endleke leswaku a dyoha?

⁹ Vakulu va ringeta ku kumisisa leswi endleke munhu a dyoha. Hi xikombiso, xana hakatsongotsongo vuxaka bya Mukreste yoloye na Yehovha byi sungule ku onhaka hileswi a honiseke dyondzo ya munhu hi yexe kumbe ntirho wa nsimu? Xana u tshike ku khongela eka Yehovha nkarhi ni nkarhi? Xana u pfumele ku lawuriwa hi ku navela ko biha? Xana u endle swiboho leswi nga riki swa vutlhari loko a hlawula vanghana kumbe vuhungasi? Xana swiboho sweswo swi yi khumbe njhani mbilu yakwe? Xana wa swi xiya leswaku swiboho ni swiendlo swakwe swi n’wi khumbe njhani Tata wakwe Yehovha?

¹⁰ Hi musa, vakulu va pfuna mudyohi leswaku a hundzuka hi ku n’wi vutisa swivutiso handle ko n’wi celacela. (Swiv. 20:5) Ku engetela kwalaho, va nga ha tirhisa swikombiso ku n’wi pfuna leswaku a ehleketa ni ku vona swiendlo swakwe leswi hoxeke hilaha Nathani a endleke hakona eka Davhida. Kumbexana loko va hlangana na yena ro sungula, mudyohi a nga sungula ku tivona nandzu hikwalaho ka xidyoho lexi a xi endleke naswona a nga ha hundzuka.

11. Yesu a a va khoma njhani vadyohi?

¹¹ Vakulu va tikarhatela ku tekelela Yesu. Yesu loyi a pfuxiweke u pfune Sawulo wa le Tarso hi ku n’wi vutisa xivutiso lexi khumbaka, a ku: “Sawulo, Sawulo, u ndzi xanisela yini?” Hi ku endla tano, Yesu u n’wi pfune leswaku a xiya swiendlo swakwe swo biha. (Mit. 9:​3-6) Kasi eka mhaka ya ‘wansati la vuriwaka Yezabele,’ Yesu u te: “Ndzi n’wi nyike nkarhi wo hundzuka.”—Nhlav. 2:​20, 21.

12-13. Vakulu va nga nyika mudyohi nkarhi wa ku hundzuka hi ndlela yihi? (Nakambe vona xifaniso.)

¹² Hi ku tekelela Yesu, vakulu a va hatliseli ku tibyela leswaku mudyohi a nge hundzuki. Hambileswi van’wana va hundzukaka loko komiti yi hlangana na vona ro sungula, van’wana va nga ha lava nkarhi lowu engetelekeke. Vakulu va nga ha hlangana ni mudyohi ku tlula kan’we. Kumbexana endzhaku ka loko va hlangane na yena ro sungula, Mukreste  loyi a dyoheke u ta sungula ku anakanyisisa hileswi va n’wi byeleke swona. A nga khongela eka Yehovha hi ku titsongahata. (Ps. 32:5; 38:18) Kutani loko va tlhela va hlangana na yena, mudyohi a nga ha va ni langutelo lerinene leri hambaneke ni leri a a ri na rona eku sunguleni.

¹³ Leswaku va pfuna mudyohi a hundzuka, vakulu va kombisa ntwelavusiwana ni musa. Va khongela ni ku va ni ntshembo wa leswaku Yehovha u ta katekisa matshalatshala ya vona ni leswaku Mukreste la dyoheke u ta tiehleketa kutani a hundzuka.—2 Tim. 2:​25, 26.

14. I mani loyi a dzunisiwaka loko mudyohi a hundzuka naswona hikwalahokayini?

¹⁴ Ku va ni ntsako lowukulu loko mudyohi a hundzuka! (Luka 15:​7, 10) I mani loyi a faneleke a dzunisiwa? Xana i vakulu? Tsundzuka leswi Pawulo a swi tsaleke hi vadyohi: “Kumbexana Xikwembu xi nga va endla va hundzuka.” (2 Tim. 2:25) I Yehovha ku nga ri munhu loyi a pfunaka Mukreste leswaku a cinca langutelo ni ndlela leyi a ehleketaka hayona. Pawulo u boxa yin’wana ya mihandzu leyinene ya ku hundzuka—ku susumetela mudyohi leswaku a wu tiva kahle ntiyiso, a pfuleka mianakanyo, ni ku n’wi pfuna a balekela mitlhamu ya Sathana.—2 Tim. 2:26.

15. Vakulu va nga ya emahlweni va n’wi pfuna njhani mudyohi la hundzukeke?

¹⁵ Loko mudyohi a hundzuka, komiti yi ta n’wi endlela maendzo ya vurisi leswaku yi n’wi pfuna a ya emahlweni a lwisana ni mitlhamu ya Sathana ni ku endlela milenge yakwe magondzo yo lulama. (Hev. 12:​12, 13) I ntiyiso leswaku vakulu a va byeli munhu leswi mudyohi a swi endleke. Kambe i yini leswi vandlha ri faneleke ri swi tiva?

‘TSHINYA VANHU EMAHLWENI KA TIMBHONI HINKWATO’

16. Hi ku ya hi 1 Timotiya 5:​20, hi tihi “timbhoni” leti Pawulo a a vulavula hi tona?

¹⁶ Hlaya 1 Timotiya 5:20. Pawulo u tsalele Timotiya nkulukulobye mayelana ni ndlela  yo pfuna “lava hanyaka hi xidyoho.” Xana a a vula yini? Kahlekahle a a nga vuli swona leswaku vandlha hinkwaro a ri ri “timbhoni.” Ku ri na sweswo, a a vulavula hi vanhu va nga ri vangani lava se a va tiva swidyoho swoleswo. Ku nga ha va ku ri lava swi voneke kumbe lava mudyohi a va byeleke. Hi vutlhari vakulu a va ta va byela leswaku mhaka yi tameriwile ni leswaku mudyohi u pfuniwile.

17. Loko xidyoho lexikulu xi tiveka evandlheni kumbe xi ta tiveka, i yini leswi faneleke swi tivisiwa naswona hikwalahokayini?

¹⁷ Mikarhi yin’wana swi nga endleka van’wana evandlheni se va swi tiva leswaku makwerhu wo karhi u endle xidyoho kumbe va ta hetelela va xi tivile xidyoho xexo. Eka xiyimo xo tano, “timbhoni” ti ta katsa vandlha hinkwaro. Kutani nkulu u ta tivisa vandlha leswaku makwerhu u soriwile. Hikwalahokayini? Pawulo u hlamula a ku: “Leswaku ni lavan’wana va ta chava” leswaku va nga dyohi.

18. Vakulu va ta swi tamela njhani swidyoho swa vantshwa lava khuvuriweke? (Nakambe vona xifaniso.)

¹⁸ Ku vuriwa yini hi vantshwa lava khuvuriweke lava nga ehansi ka malembe ya 18 lava endlaka xidyoho lexikulu? Huvo ya vakulu yi ta kombela vakulu vambirhi ku hlangana ni muntshwa yoloye ni vatswari vakwe lava nga Vakreste. b Vakulu va ta lavisisa leswi se vatswari va swi endleke leswaku va pfuna n’wana wa vona a hundzuka. Loko a ri ni langutelo lerinene naswona vatswari va n’wi pfuna, vakulu vambirhi va ta endla xiboho xo ka va nga yi yisi emahlweni mhaka yoleyo. Phela,  Xikwembu xi nyike vatswari vutihlamuleri byo tshinya vana va vona hi rirhandzu. (Det. 6:​6, 7; Swiv. 6:20; 22:6; Efe. 6:​2-4) Nkarhi ni nkarhi, vakulu va ta vutisa vatswari ku tiyiseka loko muntshwa yoloye a kuma mpfuno lowu a wu lavaka. Hambiswiritano, ku vuriwa yini loko muntshwa la khuvuriweke a ya emahlweni a endla xidyoho? Eka xiyimo xexo, komiti ya vakulu yi ta hlangana na yena swin’we ni vatswari vakwe lava nga Vakreste.

“YEHOVHA U NI NTWELAVUSIWANA LOWUKULU NI TINTSWALO”

19. Vakulu va tikarhatela ku tekelela Yehovha hi ndlela yihi loko va pfuna vadyohi?

¹⁹ Vakulu lava nga eka komiti va ni vutihlamuleri eka Yehovha byo endla leswaku vandlha ri tshama ri basile. (1 Kor. 5:7) Nakambe va lava leswaku vadyohi va hundzuka loko swi koteka. Leswaku va endla sweswo, vakulu va tshemba leswaku mudyohi u ta hundzuka. Hikwalahokayini? Hikuva va lava ku tekelela Yehovha loyi a nga “ni ntwelavusiwana lowukulu ni tintswalo.” (Yak. 5:11) Xiya ndlela leyi muapostola Yohane loyi a dyuhaleke a kombiseke sweswo hayona. U tsale a ku: “Vana vanga, ndzi mi tsalela swilo leswi leswaku mi nga endli xidyoho. Kambe, loko mani na mani o endla xidyoho, hi ni mupfuni loyi a nga na Tatana, ku nga Yesu Kreste, loyi a lulameke.”—1 Yoh. 2:1.

20. Hi ta bula hi yini eka nhlokomhaka yo hetelela ya tinhlokomhaka leti ta ntlhandlamano?

²⁰ Lexi twisaka ku vava, mikarhi yin’wana Mukreste a nga ha ala ku hundzuka. Loko a ala, u fanele a susiwa evandlheni. Vakulu va yi tamela njhani milandzu yoleyo? Hi ta tlhuvutsa mhaka yoleyo eka nhlokomhaka yo hetelela ya tinhlokomhaka leti ta ntlhandlamano.