Muapostola Pawulo u tsalele Vakreste va le Tesalonika a ku: “Loko munhu a ala ku yingisa swilo leswi hi swi tsaleke epapileni leri, tshamani mi n’wi funghile.” (2 Tes. 3:14) Eku sunguleni a hi vula leswaku nkongomiso lowu wu tsaleriwe vakulu. Loko munhu a ya emahlweni a yi ba hi makatla milawu ya Bibele hambiloko a tsundzuxiwe hi ku phindhaphindha, vakulu a va nyikela mbulavulo wo lemukisa evandlheni. Endzhaku ka mbulavulo, vahuweleri a va tihambanisa ni munhu la funghiweke.

Hambiswiritano, matwisiselo lawa ma fanele ma antswisiwa. Swi le rivaleni leswaku ndzayo ya Pawulo yi vula goza leri Mukreste ha un’we a faneleke a ri teka eka swiyimo swo karhi. Kutani a swi bohi leswaku vakulu va nyikela mbulavulo wo lemukisa. Hikwalahokayini hi fanele hi endla ku cinca loku? Ehleketa hi leswi Pawulo a a vulavula ha swona loko a nyikela ndzayo leyi.

Pawulo u xiye leswaku van’wana evandlheni rero a va ‘famba hi ndlela leyi nga hlelekangiki.’ A va honisa ndzayo ya Matsalwa. Eka riendzo rakwe leri hundzeke, Pawulo u te: “Loko munhu a nga lavi ku tirha ni ku dya a nga dyi.” Kambe van’wana a va ha ala ku tirha leswaku va tiwundla hambileswi a va swi kota ku endla tano. Nakambe a va nghenelela eka timhaka ta van’wana. Vakreste a va fanele va va khoma njhani vanhu volavo lava nga hlelekangiki?—2 Tes. 3:​6, 10-12.

Pawulo u te: “Tshamani mi n’wi funghile.” Marito lawa ya Xigriki ma vula ku va ni vuxiyaxiya hi munhu yoloye. Pawulo u nyike vandlha hinkwaro nkongomiso lowu, ku nga ri vakulu ntsena. (2 Tes. 1:1; 3:6) Kutani Mukreste ha un’we loyi a voneke Mukreste un’wana a nga yingisi ndzayo ya le Matsalweni, a a ta hlawula ku “nga tihlanganisi na yena.”

Xana leswi swi vula leswaku munhu yoloye a a khomiwa ku fana ni munhu loyi a susiweke evandlheni? Nikatsongo, Pawulo u tlhele a ku: “Kambe n’wi tsundzuxeni hikuva i makwenu.” Kutani Vakreste a va ha tihlanganisa ni munhu loyi a funghiweke etinhlengeletanweni ta vandlha ni le nsin’wini kambe a va nga tihlanganisi na yena eswinkhubyanini kumbe va tihungasa na yena. Hikwalahokayini? Pawulo u te: “Leswaku a ta khomiwa hi tingana.” Leswi a funghiweke, Mukreste loyi a nga hlelekangiki a nga khomiwa hi tingana hikwalaho ka mahanyelo yakwe ivi a cinca tindlela takwe.—2 Tes. 3:​14, 15.

Namuntlha Vakreste va nga yi tirhisa njhani ndzayo leyi? Xo sungula, hi ta lava ku tiyisekisa leswaku mahanyelo yakwe lawa ku vulavuriwaka ha wona hakunene a ma ‘hlelekanga,’ hilaha Pawulo a vuleke hakona. A a nga vulavuli hi vanhu lava nga ni mavonelo lama hambaneke ni ya hina loko swi ta etimhakeni ta ripfalo kumbe leswi hi swi tsakelaka. Naswona a a nga vulavuli hi vanhu lava hi twiseke ku vava. Kambe hi ku kongoma, Pawulo a a vulavula hi vanhu lava hi vomu va hlawulaka ku nga yingisi ndzayo leyi twisisekaka leyi humaka eka Xikwembu.

Namuntlha loko hi xiya Mukrestekulorhi loyi a nga yingisiki, a hi ta endla xiboho xa ku va hi nga tihlanganisi na yena loko hi tihungasa kumbe loko hi titsakisa. Leswi xiboho lexi ku nga xa munhu hi yexe, a hi nge vulavuli hi xona ni vanhu lava nga riki swirho swa ndyangu wa hina. Kambe hi ta ya emahlweni hi ti hlanganisa ni munhu yoloye etidyondzweni ni le nsin’wini. Loko a cinca mahanyelo yakwe, hi ta tlhela hi tihlanganisa na yena.