LOKO u khomiwe hi vuvabyi lebyi xungetaka vutomi kumbe byi khome un’wana loyi u n’wi rhandzaka wa swi tiva leswaku swa tshikilela. Ku engetela kwalaho vuvabyi na byona byi nga endla leswaku u khunguvanyeka hi ku olova. Loko u ya eka madokodela, u nga ri na mali yo hakelela mirhi ya vutshunguri kumbe mirhi ya kona yi nga ku khomi kahle, swi nga ha ku chavisa u tlhela u tshikileleka. Ku ehleketa ngopfu hi vuvabyi swi nga ku vangela ntshikilelo.

I yini lexi nga hi pfunaka? Vo tala va xiye leswaku ku tshinela eka Xikwembu hi xikhongelo ni ku hlaya Bibele swa va chavelela. Xin’wana lexi nga ku pfunaka i ku va maxaka ni vanghana va ku kombisa rirhandzu.

Robert, loyi a nga ni malembe ya 58 u ri: “Loko u vabya, va na ni ripfumelo eka Xikwembu xi ta ku pfuna. Khongela eka Yehovha. Phofula ndlela leyi u titwaka ha yona. Kombela leswaku a ku nyika moya lowo kwetsima. N’wi kombele leswaku a ku pfuna u va ni langutelo lerinene hi vandyangu wa wena u va khutaza ni ku lehisa mbilu loko u ri karhi u hlakarhela.

Swa pfuna swinene loko vandyangu wa wena va ku seketela va nga ku lahleli mavoko. Siku ni siku a va ndzi fonela va ndzi vutisa leswaku, ‘U titwa njhani?’ A ndzi khutaza hi vanghana lava humaka etindhawini to hambanahambana. A va ndzi endla ndzi titwa ndzi antswa naswona sweswo swi ndzi pfune leswaku ndzi kota ku tiyisela.”

Loko u endzela munghana wa wena loyi a vabyaka xiya leswi Linda a swi vuleke: “Muvabyi swi nga n’wi tshikilela ngopfu ku khomiwa tanihi munhu la vabyaka naswona a nga swi rhandzi ku vulavula hi vuvabyi bya yena. Vulavulani hi swilo leswi a mi tolovele ku vulavula ha swona.”

Hambiloko u ri ni vuvabyi lebyi nga ni khombo u nga tiyiseka leswaku Xikwembu xi ta ku nyika matimba, xi ku chavelela hi ku tirhisa Matsalwa, vanghana ni vandyangu wa wena kutani u ta swi xiya leswaku vutomi i bya nkoka.