Mikhuva Ya Wena Yi Kombisa Leswaku U Ta Va Ni Vumundzuku Bya Njhani?
Vanhu vo tala va tshemba leswaku ku ni matimba yo karhi lama nga vonakiki lama lawulaka vumundzuku bya vona. Sweswo swi endla leswaku va endla swilo leswi va ehleketaka ku swi ta va nyika vumundzuku lebyinene.
LESWI VO TALA VA SWI PFUMELAKA
VUNGOMA BYA TINYELETI: Vanhu van’wana va tshemba leswaku vumundzuku bya vona byi lawuriwa hi ndlela leyi tinyeleti a ti pakeke hayona loko va velekiwa. Va kambisisa tihoroskopu leswaku ti va byela vumundzuku ni ku va pfuna ku endla swiboho.
FENG SHUI: Van’wana va tshemba leswaku loko va aka tiyindlu ta vona hi ndlela yo karhi swi ta endla leswaku swilo swi va fambela kahle. Lo Wing, * loyi a tshamaka eHong Kong, u te: “Munhu loyi a nga ni vutshila bya feng shui, u ndzi byele leswaku loko ndzo veka muxaka wo karhi wa ribye endhawini yo karhi exitolo xa mina ri ta ndzi pfuna leswaku ndzi kuma mali yo tala.”
KU GANDZELA VAKOKWANA: Van’wana va tshemba leswaku va fanele va tsakisa vakokwa wa vona lava feke kumbe swikwembu swo hambanahambana leswaku swi ta va sirhelela ni ku va katekisa. Van, loyi a tshamaka eVietnam u te: “A ndzi tshemba leswaku loko ndzi gandzela vakokwana lava feke, mina ni vana va mina a hi ta tiphina hi vutomi sweswi ni ku va ni vumundzuku lebyinene.”
KU TSWARIWA NAKAMBE: Vo tala va pfumela leswaku loko munhu a fa, u tlhela a velekiwa. Va pfumela leswaku swilo leswinene kumbe swo biha leswi va humelelaka sweswi swi vangiwa hi swilo leswi va swi endleke khale.
Kambe vo tala va teka tidyondzo leti ku ri vukholwahava. Hambiswiritano, va endla mikhuva yo tanihi ku nyanga xandla, tihoroskopu ni makhadi yo vhumbha. Va ehleketa leswaku kumbexana mikhuva yoleyo yi nga va pfuna leswaku va tiva vumundzuku bya vona.
XANA MIKHUVA YOLEYO YA VA PFUNA VANHU?
Xana vanhu lava pfumelaka eka tidyondzo ni mikhuva yoleyo va hanya vutomi byo tsakisa ni ku va ni vumundzuku lebyinene?
Ehleketa hi ntokoto wa Hào, loyi a tshamaka eVietnam. U tirhise feng shui, vungoma bya tinyeleti ni ku gandzela vakokwana lava feke leswaku swi n’wi kongomisa. Xana swilo swi n’wi fambele kahle evuton’wini? Hào u te: “Ndzi lahlekeriwe hi mali yo tala, ndzi nghena hi nhloko eswikweletini, ndzi va ni timholovo endyangwini wa mina naswona a ndzi tshikilelekile swinene.”
Qiuming wa le Taiwan, na yena a a pfumela eka vungoma bya tinyeleti, ku tswariwa nakambe, feng shui ni ku gandzela vakokwana lava feke. Endzhaku ko kambisisa tidyondzo leti hi vukheta, u te: “Ndzi xiye leswaku tidyondzo ni mikhuva yoleyo swa kanetana naswona a swi twisiseki. Ndzi kume leswaku vungoma bya tinyeleti mikarhi yo tala a byi nga vuli ntiyiso. Loko swi ta emhakeni yo tswariwa nakambe, u nga swi lulamisa njhani swihoxo leswi u swi endleke khale kutani u antswisa loko u tlhela u tswariwa?”
“Ndzi xiye leswaku tidyondzo ni mikhuva yoleyo swa kanetana naswona a swi twisiseki.”—QIUMING, TAIWAN
Hilaha Hào, Qiuming ni van’wana vo tala va swi xiyeke hakona, vumundzuku bya hina a byi lawuriwi hi tinyeleti, vakokwana lava feke kumbe ku tswariwa nakambe. Xana leswi swi vula ku a hi nge swi koti ku endla leswaku hi va ni vumundzuku lebyinene?
Vo tala va tibyela leswaku ku dyondzeka ni ku va ni mali yo tala swi ta endla leswaku va va ni vumundzuku lebyinene. Byi ve byihi vuyelo eka van’wana lava hlawuleke ku endla tano?
^ par. 5 Eka nhlokomhaka leyi ni leti landzelaka, mavito man’wana ma cinciwile.
^ par. 16 Marito wolawo ma kumeka eBibeleni eka Vagalatiya 6:7. Mongo wa wona wu kumeka eka swivuriso leswi dumeke swa le Vuxeni leswi nge, byala makhalavatla, u ta kuma wona; byala tinyawa u ta kuma tona.
U Nga Ha Tsakela
XIHONDZO XO RINDZA
Vungoma Byo Tirhisa Swilo Swa Le Mpfhukeni Ni Ku Vhumbha Xana Swi Nga Hi Pfuna Ku Tiva Vumundzuku Bya Hina Hakunene?
Xana u nga swi tshemba leswi vavhumbhi va swi tirhisaka leswaku va vhumbha vumundzuku?
XIHONDZO XO RINDZA
Leswi Bibele Yi Swi Vulaka Hi Vutomi Ni Rifu
Xana ku ni swiphemu leswi salaka swi hanya loko hi file? Xana hi ni moya lowu nga fiki? Vafi va kwihi?
XIHONDZO XO RINDZA
