Ina, Bibele yi profete leswaku mahanyelo ya vanhu a ma ta nyanya ku biha emikarhini ya hina. Yi tlhele yi boxa leswaku ku cinca loku a ku ta endla leswaku vanhu vo tala va nga lavi ku hanya hi milawu leyi tlakukeke ya mahanyelo, leyi endlaka leswaku vanhu va kota ku hanyisana. a (2 Timotiya 3:1-5) Kambe Bibele yi tlhele yi vula leswaku a ku ta va ni vanhu van’wana lava a va nga ta hanya hi ndlela yo tano. Hi ku pfuniwa hi Xikwembu, a va ta tikarhatela ku papalata mahanyelo yo tano naswona a va ta ehleketa ni ku endla swilo hi ndlela ya xona.—Esaya 2:2, 3.

Eka nhlokomhaka leyi

•  I yini leswi Bibele yi swi profeteke mayelana ni ndlela leyi vanhu a va ta ehleketa ni ku endla swilo hayona emikarhini ya hina?

•  Xana mahanyelo ya vanhu lava lavaka leswi vuyerisaka vona vini a ma ta va khumba njhani van’wana?

•  Hikwalahokayini mahanyelo ya vanhu a ma ta nyanya ku biha?

•  Xana hi fanele hi endla yini hikwalaho ka ku cinca ka mahanyelo yo biha ya vanhu?

•  Xana mahanyelo ya vanhu hinkwavo ma ta nyanya ku biha?

•  Xana vanhu va ta hetelela va hanya hi ndlela yo biha lerova hinkwavo va tala hi madzolonga naswona va nga ha lawuleki?

 Bibele yi hlamusela mahanyelo yo biha lama a ma ta va lama tolovelekeke swinene naswona a ma ta vangiwa hileswi vanhu va lavaka leswi vuyerisaka vona vini. Vanhu a va ta va “lava nga tikhomiki,” “lava tirhandzaka” ni ku va “lava rhandzaka ku tiphina ku ri ni ku rhandza Xikwembu.”—2 Timotiya 3:2-4.

 Vuprofeta lebyi byi vula ntiyiso hikuva vanhu vo tala emikarhini ya hina va ehleketa hileswi nga ta vuyerisa vona vini, leswi nga ta va endla va tsaka kumbe ku titwa va enerisekile evuton’wini ku katsa ni swin’wana. Hilaha vuprofeta lebyi byi vuleke hakona, vanhu vo tala namuntlha va lava leswi vuyerisaka vona vini naswona sweswo swi ya swi nyanya. Vanhu vo tala va tirhandza swinene lerova a va ‘rhandzi vunene’ naswona a va koti ku vona leswinene eka van’wana. Leswi va nga “khensiki,” a va voni xivangelo xo tlangela swilo leswi va nga na swona kumbe leswi vanhu van’wana va va endlelaka swona.—2 Timotiya 3:2, 3.

 Vanhu lava lavaka leswi vuyerisaka vona vini va ni mahanyelo lama landzelaka lama Bibele yi vuleke leswaku ma ta vonaka emikarhini ya hina:

•   Makwanga. ‘Vanhu vo tala va rhandza mali’ naswona hakanyingi va tibyela leswaku muholo wa vona kumbe nhundzu hi swona leswi kombisaka leswaku va humelerile evuton’wini.—2 Timotiya 3:2.

•   Ku tikukumuxa. Vanhu vo tala va ‘tikurisa, va titlakusa’ naswona va ‘tikukumuxa.’ (2 Timotiya 3:2, 4) Vanhu vo tano va bombisa ni ku ndhundhuzela vuswikoti kumbe rifuwo ra vona hi ndlela leyi nga riki yinene.

•   Valumbeti. “Vasandzi” ni “valumbeti” va tate misava hinkwayo. (2 Timotiya 3:2, 3) Swiga leswi swi katsa vanhu lava rhuketelaka van’wana, va rhuketela Xikwembu kumbe va hembela vanhu van’wana.

•   Vanhu lava omeke tinhloko. Vanhu vo tala namuntlha a va ‘tshembekanga,’ a va ‘tiyimiselanga ku pfumelelana ni van’wana,’ i “vaxengi” naswona va ‘ome tinhloko.’ Leswi swi tikomba hileswi vanhu va alaka ku kanerisana, ku lulamisa timhaka kumbe ku xixima mintwanano leyi va nga tshama va yi endla.

•   Madzolonga. Vanhu vo tala namuntlha va “ni tihanyi,” leswi endlaka leswaku va va ni swifafa, va endla swilo swo chavisa kumbe ku va ni madzolonga.—2 Timotiya 3:3.

•   Ku andza ka vubihi. Yesu u profete hileswaku “rirhandzu ra vo tala ri ta hola,” leswi a swi ta vonaka enkarhini wa hina. (Matewu 24:12) U tlhele a profeta hi swilo leswi a swi ta endleka emisaveni hinkwayo swo fana ni “mpfilumpfilu.”—Luka 21:9.

•   Ku pfumaleka ka rirhandzu endyangwini. Leswi vo tala va nga “yingisiki vatswari” naswona va nga “riki na rirhandzu” swi endla leswaku swirho swo tala emindyangwini swi nga hlayiseki, swi xanisiwa ni ku khomiwa hi ndlela yo biha.—2 Timotiya 3:2, 3.

•   Vukanganyisi eka swa vukhongeri. Nhlayo ya vanhu “lava vonaka[ka] onge va gandzela Xikwembu” yi ya yi andza. (2 Timotiya 3:5) Ematshan’weni yo endla leswi Xikwembu xi swi rhandzaka, va landzelela varhangeri va vukhongeri lava va va byelaka leswi va swi lavaka.—2 Timotiya 4:3, 4.

 Leswi vanhu vo tala va lavaka leswi vuyerisaka vona vini, swi endla leswaku van’wana va va ni ntshikilelo wa miehleketo. (Eklesiasta 7:7) Hi xikombiso, van’wana lava rhandzaka mali va va khoma ku biha vanhu van’wana. Van’wana lava nga riki na rirhandzu va nga ha xanisa swirho swa mindyangu ya vona, leswi nga endlaka leswaku swi tshikileleka kumbe swi tidlaya. Vanhu lava xengaka vanhu van’wana kumbe va nga tshembeki eka vona, va siya xivati etimbilwini ta vona lexi nga tekaka nkarhi wo leha ku hola.

 Bibele yi hlamusela swivangelo leswi endlaka leswaku vanhu va tikhoma hi ndlela leyi:

•   Rirhandzu ra ntiyiso eka warikwenu ni le ka Xikwembu ri ya ri hunguteka. (Matewu 24:12) Hikwalaho ka sweswo, vanhu lava va tilavelaka swa vona vini va ya va andza.

•   Sathana Diyavulosi u hlongoriwe ematilweni kutani a lahleriwa laha misaveni. (Nhlavutelo 12:9, 12) Hi mpfhuka sweswo swi endleka, nkucetelo wa yena eka vanhu wo endla swilo leswi vuyerisaka vona vini wu andzile.—1 Yohane 5:19.

 Rito ra Xikwembu ri ri: “Fambela ekule ni vanhu vo tano.” (2 Timotiya 3:5) Leswi a swi vuli swona leswaku hi fanele hi tihambanisa ni vanhu van’wana. Ematshan’weni ya sweswo, hi fanele hi papalata ku endla xinghana ni vanhu lava endlaka swilo leswi vuyerisaka vona vini ni vanhu lava nga hanyiki hi milawu ya Xikwembu.—Yakobo 4:4.

 Doo! Bibele yi vule leswaku a ku ta va ni lava nga ni “nhlomulo ni lava konyaka hikwalaho ka swilo hinkwaswo leswi nyenyetsaka leswi endliwaka.” (Ezekiyele 9:4) A va ta swi bakanyela ekule ku lava leswi vuyerisaka vona vini kutani va hanya hi milawu ya Xikwembu. Ndlela leyi va vulavulaka hayona ni swiendlo swa vona a swi ta kombisa leswaku va hambanile ni vanhu lavan’wana. (Malakiya 3:16, 18) Hi xikombiso, a va ta tikarhatela ku kondletela ku rhula ni vanhu van’wana naswona a va ta papalata tinyimpi ni madzolonga.—Mikiya 4:3.

 Doo! A hi vanhu hinkwavo lava nga ta endla leswo biha. Ku ri na sweswo, ku nga ri khale Xikwembu xi ta lovisa vanhu lava nga tiyimiselangiki ku hanya hi milawu ya xona. (Pisalema 37:38) Xi ta simeka “misava leyintshwa” laha ku nga ta va ni vanhu vo rhula eka yona naswona va ta hanya hi ku rhula hilaha ku nga heriki. (2 Petro 3:13; Pisalema 37:11, 29) Ntshembo lowu a hi norho. Hambi sweswi, Bibele yi pfuna vanhu va cinca vutomi bya vona ivi va hanya hi ku fambisana ni milawu yo lulama ya Xikwembu.—Vaefesa 4:23, 24.