Xifumi na Lazaro i swimunhuhatwa leswi nga eka xitori lexi vuriweke hi Yesu loko a ri karhi a dyondzisa. (Luka 16:19-31) Eka xitori xexo, vavanuna lava a va yimela mitlawa yimbirhi: (1) varhangeri va vukhongeri bya Xiyuda lava a va ri ni manyunyu hi nkarhi wa Yesu ni (2) swisiwana leswi anguleke kahle eka leswi Yesu a a swi dyondzisa.

Eka nhlokomhaka leyi

•  Yesu u vule yini hi xifumi na Lazaro?

•  Xana xitori lexi xi endlekile hakunene?

•  Xana xitori lexi xi seketela dyondzo ya ndzilo wa tihele?

•  Xana xi vula yini xitori xa xifumi na Lazaro?

 Eka Luka ndzima 16, Yesu u hlamusele vavanuna vambirhi lava tokoteke ku cinca lokukulu evuton’wini bya vona.

 Hi lowu nkatsakanyo wa xitori lexi vuriweke hi Yesu: Wanuna wa xifumi a a hanya emafurheni. A ku ri ni xisiwana lexi vito ra xona a ku ri Lazaro lexi a xi vekiwe egedeni ya xifumi; a xi tshemba leswaku xi ta nyikiwa mahlanhla lama waka etafuleni ra xifumi. Hi ku famba ka nkarhi, Lazaro u file naswona tintsumi ti n’wi teke ti n’wi yisa etlhelo ka Abrahama. Xifumi na xona xi file kutani xi lahliwa. Eka xitori lexi, vavanuna lavambirhi va hlamuseriwa onge ku ni leswi va kotaka ku swi endla endzhaku ka loko va file. Wanuna wa xifumi loyi a feke, a a ri eku xanisiweni endzilweni wa tihele naswona u kombele Abrahama leswaku a rhumela Lazaro a ya peta rintiho rakwe ematini kutani a n’wi timula ririmi hi swimatana. Abrahama u ale xikombelo xa xifumi kutani a vula leswaku vavanuna lava se swiyimo swa vona swi cincile naswona ku ni riwa lerikulu exikarhi ka vona leri swi nga kotekiki ku ri tsemakanya.

 Doo! Lexi ko va xikombiso lexi Yesu a xi tirhiseke leswaku a dyondzisa dyondzo yo karhi. Swidyondzeki swin’wana swi pfumerile leswaku lexi a ko va xikombiso. Hi xikombiso, nhlokomhaka ya le ka Bibele ya Luther ya 1912 yi vule leswaku lexi i xikombiso. Jerusalem Bible ya Khatoliki, eka nhlamuselo ya le hansi yi vule leswaku lexi i “xikombiso lexi taka tanihi xitori kambe a xi kombeteli eka munhu loyi a tshameke a hanya.”

 Xana Yesu a a dyondzisa hileswi endlekaka endzhaku ka rifu? Xana a a vula leswaku vanhu va xanisiwa endzilweni wa tihele loko va fa nileswaku Abrahama na Lazaro a va ri etilweni? Ku ni swivangelo swo hlayanyana leswi kombisaka ku a swi tano.

 Hi xikombiso:

•   Loko xifumi a xi ri eku xanisekeni endzilweni wa xiviri lowu hisaka swinene, xana ndzilo a wu nga ta hisa mati lama nga erintihweni ra Lazaro ma hela?

•   Hambiloko mati wolawo a ma nga tshwanga ma hela, xana thonsi ra mati a ri ta swi kota ku timula wanuna loyi a nga eku xanisekeni endzilweni wa xiviri?

•   Xana a swi ta kotekisa ku yini leswaku Abrahama a va a ri etilweni, ku ve Yesu u swi veke erivaleni leswaku ku sukela hi nkarhi lowu a vuleke xikombiso xexo a ku nga ri na munhu loyi a tlhandlukeleke etilweni?—Yohane 3:13.

 Doo! Hambileswi xitori lexi xi nga endlekangiki hi xiviri, van’wana va vula leswaku leswi swi kombisa ku vanhu lavanene va ya etilweni kasi lavo biha va ya xanisiwa endzilweni wa tihele. a

 Xana sweswo swa twala? Doo!

 Dyondzo ya tihele a yi fambisani nileswi Bibele yi swi vulaka mayelana ni xiyimo xa vafi. Hi xikombiso, a yi vuli ku vanhu lavanene lava feke va le ku tiphineni etilweni kumbe lavo biha va le ku xanisiweni endzilweni wa tihele. Ku ri na sweswo, Bibele yi swi veka erivaleni leswaku: “Lava hanyaka va swi tiva leswaku va ta fa, kambe lava feke a va tivi nchumu.”—Eklesiasta 9:5.

 Xitori lexi xi kombisa leswaku swiyimo swa mitlawa yimbirhi ya vanhu a swi ta cinca ku nga ri khale.

 Wanuna wa xifumi u yimela varhangeri va vukhongeri bya Xiyuda “lava a va rhandza mali.” (Luka 16:14) A va n’wi yingisela Yesu loko a vulavula kambe a va kaneta leswi a swi dyondzisa. Varhangeri lava va vukhongeri a va va vonela ebodlheleni vanhu lava tekiwaka va ri va xiyimo xa le hansi.—Yohane 7:49.

 Lazaro a yimela vanhu lava tekiwaka va ri va xiyimo xa le hansi lava amukeleke dyondzo ya Yesu naswona a va vengiwa hi varhangeri va vukhongeri bya Xiyuda.

 Ku cinca loku ka swiyimo ku endleke eka mitlawa leyi hayimbirhi ka yona.

•   Varhangeri lava va vukhongeri bya Xiyuda a va ehleketa leswaku va tsakeriwa hi Xikwembu. Kambe a swi fana niloko va file loko Xikwembu xi nga va amukeli ku katsa ni vugandzeri bya vona hileswi va nga swi amukelangiki leswi Yesu a a swi dyondzisa. Nakambe leswi Yesu ni valandzeri vakwe a va swi dyondzisa, a swi fana ni nxupulo eka vona.—Matewu 23:29, 30; Mitirho 5:29-33.

•   Vanhu lava a va tekiwa va ri va xiyimo xa le hansi lava varhangeri va vukhongeri a va va vonela ebodlheleni, sweswi se a va tsakeriwa. Vo tala va amukele dyondzo ya le Bibeleni leyi Yesu a a yi dyondzisa naswona va vuyeriwile eka yona. Sweswi a va ri ni lunghelo ra ku tsakeriwa hi Xikwembu hilaha ku nga heriki.—Yohane 17:3.