Ha Yini Timbhoni Ta Yehovha Ti Nga Tlangeli Khisimusi?

TLANGA

Tidyondzo leti hoxeke leti tolovelekeke

Mavunwa: Timbhoni ta Yehovha a ti tlangeli Khisimusi hikuva a ti pfumeli eka Yesu.

Ntiyiso: Hina hi Vakreste. Ha pfumela leswaku ku ponisiwa ku kumeka ntsena ha Yesu Kreste.—Mintirho 4:12.

Mavunwa: Mi hambanisa mindyangu hi ku dyondzisa swirho swa yona leswaku swi nga tlangeli Khisimusi.

Ntiyiso: Ha khathala swinene hi mindyangu naswona hi tirhisa Bibele ku pfuna mindyangu leswaku yi tiya.

Mavunwa: A mi katseki eka swiendlakalo swa Khisimusi swo tanihi ku nyika, ku rhula emisaveni ni ku komba vanhu musa.

Ntiyiso: Siku ni siku hi endla hilaha hi nga kotaka hakona leswaku hi hanana hi tlhela hi va ni ku rhula ni van’wana. (Swivuriso 11:25; Varhoma 12:18) Hi xikombiso, ndlela leyi hi khomaka minhlangano ya hina ha yona ni ku chumayela, swi fambisana ni ndzetelo wa Yesu lowu nge: “Mi amukele mahala, nyikani mahala.” (Matewu 10:8) Ku tlula kwalaho, hi teka Mfumo wa Xikwembu wu ri wona lowu nga ta tisa ku rhula emisaveni.—Matewu 10:7.

Ha yini Timbhoni ta Yehovha ti nga tlangeli Khisimusi?

Yesu u lerise leswaku hi tsundzuka rifu ra yena ku nga ri ku velekiwa ka yena.—Luka 22:19, 20.
Vaapostola ni vadyondzisiwa va Yesu va khale, a va yi tlangelanga Khisimusi. New Catholic Encyclopedia yi vula leswaku “ku tlangela siku ra ku velekiwa ka Yesu ku sunguriwe hi 243 [C.E.]” endzhaku ka malembe yo tlula dzana vaapostola vo hetelela va file.
A ku na vumbhoni bya leswaku Yesu u velekiwe hi December 25; siku ra ku velekiwa ka yena a ri tsariwanga eBibeleni.
Ha tshemba leswaku Xikwembu a xi yi tsakeli Khisimusi hikuva yi huma eka mikhuva ni mihivahivani ya vuhedeni.—2 Vakorinto 6:17.

Ha yini ku nga tlangeli Khisimusi ku ri mhaka ya nkoka swinene eka n’wina?

Vanhu vo tala va ha yi tlangela Khisimusi hambileswi va swi tivaka leswaku yi huma eka mikhuva ya vuhedeni naswona a yi sekeriwanga eBibeleni. Vanhu vo tano va nga ha vutisa va ku: Ha yini Vakreste va fanele va nga yi tlangeli? Ha yini mhaka ya ku nga yi tlangeli yi ri nkoka swinene eka vona?

Bibele yi hi khutaza leswaku hi tirhisa ‘matimba ya ku anakanya.’ (Varhoma 12:1, 2) Yi hi dyondzisa leswaku ntiyiso hi wu teka wu ri wa nkoka swinene. (Yohane 4:23, 24) I ntiyiso leswaku ha khathala hi ndlela leyi van’wana va hi tekaka ha yona kambe xa nkoka ngopfu eka hina i ku namarhela milawu ya Bibele hambiloko sweswo swi endla hi nga amukeleki eka vanhu.

A hi yi tlangeli Khisimusi kambe ha xi xixima xiboho xa munhu xa ku tihlawulela emhakeni leyi. A hi ngheneleli loko van’wana va hlawula ku tlangela Khisimusi.