Mahungu Ya Ku Tsakisa Ya Ku Tsaliwa Hi Luka 7:1-50
7 Nkama a nga gama ku khuluma ni vanhu, a nghene Kapernawume.
2 A ku ni murhangeli mun’wani wa masonchwa,* lweyi a a ni mutirhi lweyi a a mu rhandza, lweyi a a vabya hintamu naswona a a li kusuhi ni ku fa.+
3 Nkama a nga twa ndhuma ya Yesu, a rhumele madoda man’wani ya Vayuda ka yena ma ya mu kombela swaku a ta hanyisa mutirhi wa yena.
4 Ma fike ma mu kombela swinene ma ku: “I munhu wamunene, hi kombela u mu pfuna,
5 hikusa wa li rhandza lixaka la hina naswona a hi yakele ni sinagoga.”*
6 Kutani Yesu a famba na vona. Kambe loko a nge se fika muntini, murhangeli wa masonchwa se a a rhumele vanghanu va yena leswaku va ya mu byela va ku: “Hosi, u nga tikarhati; no va mani mina swaku u nghena kaya ka mina?+
7 Hi leswo swi nga yendla ni tivona ni nga faneleki ku ta ka wena. Vula rito, kutani mutirhi wa mina a ta hanya.
8 Hikusa hambi mina ni nyikiwe matimba naswona ni ni masonchwa lawa ma nga hansi ka mina. Loko ni byela lin’we ni ku: ‘Famba!’ la famba, kasi loko ni byela lelin’wani ni ku: ‘Tani!’ la ta, ni loko ni byela mutirhi wa mina ni ku: ‘Yendla leswi!’ wa swi yendla.”
9 Nkama Yesu a nga twa swilo leswi, a hlamala kutani a ndzuluka a txuvuka xitshungu lexi a xi mu landzela a ku: “Na mi byela: Hambi aIsrayele a ni kumanga munhu ni mun’we lweyi a nga ni lipfumelo lalikulu la ku fana ni leli.”+
10 Nkama lava a va rhumiwile va nga tlhela kaya, va kume mutirhi na a hanyile.+
11 Loko se ku hundze nkamanyana a ye ka doropa leli vitaniwaka Nayini ni vadjondzisiwa va yena, ni xitshungu xaxikulu xi fambe na yena.
12 Nkama a nga fika kusuhi ni nyanghwa wa doropa, a tlhangane ni vanhu lava a va ya ku lahleni ka mufi lweyi a ko va yena ntsena ka mamani wa yena.+ Kasi mamani wa yena a a feliwe hi nuna. A a heleketiwa hi vanhu va vanyingi va doropa lelo.
13 Nkama Hosi yi nga mu vona, yi mu twele wusiwana+ kutani yi ku: “U nga rili.”+
14 Kutani yi tshinela yi khumba xibedwani,* kutani lava nga rhwala mufi va nyima. Se yi ku: “Djaha, pfuka!”+
15 Se djaha li pfuka li tshama li sungula ku vulavula; kutani Yesu a li tlhelisa ka mamani wa lona.+
16 Vanhu hinkwavu va chava hintamu kutani va sungula ku dzunisa Xikwembu va ku: “Ku humelele muprofeta wamukulu xikarhi ka hina.”+ Va tlhela va ku: “Xikwembu xi khumbuke vanhu va xona.”+
17 Ndhuma ya yena yayinene yi tiviwe ka tiko hinkwalu la Yudiya ni ka tindhawu leti nga kusuhi na lona.
18 Vadjondzisiwa va Yohani va mu byele timhaka leti hinkwatu.+
19 Kutani Yohani a vitana vadjondzisiwa va yena vambirhi, a va rhuma ka Hosi leswaku va ya yi vutisa va ku: “Hi wena Lweyi a Taka+ kumbe hi fanele hi nyimela mun’wanyani?”
20 Va fike va mu vutisa va ku: “Yohani Mutsakamisi a hi rhume ku ta ku vutisa leswi: ‘Hi wena Lweyi a Taka kumbe hi fanele hi nyimela mun’wanyani?’”
21 Hi nkama wolowo a hanyise vanhu va vanyingi lava a va vabya,+ lava a va ni madimoni ni lava a va ni mavabyi ya ku chavisa swinene, a tlhela a hanyisa ni lava nga fa matihlo.
22 Yesu a va hlamula a ku: “Fambani mi ya byela Yohani leswi mi nga swi twa ni ku swi vona: Lava nga fa matihlo va vona,+ lava khwitaka va famba, va mavabyi ya nhlokonho* va hanyisiwa naswona lava nga fa tindleve va twa,+ lava nga fa va pfuxiwa, ni swisiwana swi byeliwa mahungu ya ku tsakisa.+
23 Wa tsaka lweyi a kalaka a nga kanakani nchumu* hi mina.”+
24 Nkama lava va nga rhumiwa hi Yohani va nga famba, Yesu a sungule ku byela vanhu hi ta Yohani a ku: “A mi ya vona yini amananga? A lihlanga leli tsekatsekisiwaka hi moya?+
25 Kasi a mi ya vona yini? A mi ya vona munhu lweyi a nga yambala mpahla ya ku durha?+ Phela lava yambalaka timpahla ta ku durha ni ku hanya wutomi la kahle swinene va kumeka ka tiyindlo ta tihosi.
26 Kasi a mi ya vona yini? A muprofeta? Phela na mi byela swaku Yohani i wa lisima swinene ku tlula ni muprofeta.+
27 Lweyi hi yena ku nga tsaliwa hi ta yena nkama va nga ku: ‘Phela ni rhuma mutirheli wa mina swaku a rhanga,* a ya ku lunghiselela ndlela na u nge se fika.’+
28 Na mi byela leswaku ka vanhu hinkwavu lava nga tshama va hanya a nga kona lweyi a nga mukulu ka Yohani, kambe lweyi a nga mutsongo ka Mfumu wa Xikwembu i mukulu ka yena.”+
29 (Loko vanhu hinkwavu ni vahakelisi va rhesa* va twa leswi, va vula leswaku Xikwembu xi lulamile, hikusa a va tsakamisiwe hi ntsakamiso wa Yohani.+
30 Kambe Vafarisi ni lava a va li tintivi ta Nawu a va nga swi lavi ku yendla leswi Xikwembu a xi swi lava+ hikusa a va nga tsakamisiwanga hi Yohani.)
31 “Ni nga va fanisa na mani vanhu va nkama lowu?* Va fana na mani ke?+
32 Va fana ni swivanani leswi tshamaka bazara, swi khulumaka ni vanghanu va swona swi ku: ‘Hi mi chayele tinsimu,* kambe a mi txinanga; hi yimbelele tinsimu ta swirilo, kambe a mi rilanga.’
33 Hi ku fana, Yohani Mutsakamisi a tile a nga dli pawu hambi ku phuza vhinyu,+ kambe n’wina mi te: ‘A ni dimoni.’
34 N’wana wa munhu a tile na a dla a tlhela a phuza, kambe n’wina mi li: ‘Phela i munhu wa magolo* naswona i xidakwa, funtshi i munghanu wa vahakelisi va rhesa ni vadjohi!’+
35 Kambe wutlharhi li kombisiwa li lulamile* hi mintirho* ya lona.”+
36 Mufarisi mun’wani lweyi a a vitaniwa Simoni a a tshamela ku mu kombela swaku a ta dla na yena. Se a nghena ndlwini ka Mufarisi yelweyo a tshama* mezeni.
37 Kutani loko wansati lweyi a a tiviwa na a li mudjohi ka doropa lolelo a twa swaku Yesu a le ku dleni* kaya ka Mufarisi, a te ni xibolhelani* xa alabaxtru lexi a xi ni mafurha ya ku nun’hwela.+
38 A fike a khizama ka minkondzo ya yena a sungula ku rila, mihloti ya yena yi tsakamisa minkondzo ya Yesu, se a yi limpa hi misisi ya yena. A tlhele a bejara* minkondzo ya yena, a yi tota mafurha ya ku nun’hwela.
39 Nkama Mufarisi lweyi a a rhambe Yesu a nga vona leswi, a vulavule hi mbilwini a ku: “Loko wanuna lweyi a a li muprofeta hikakunene, a a ta swi tiva swaku i wansati wa ku tshamisa ku yini lweyi a mu khumbaka. A a ta swi tiva swaku i mudjohi.”+
40 Kambe Yesu a ku: “Simoni, ku ni leswi ni lavaka ku ku byela swona.” Yena a ku: “Ni byeli Mudjondzisi!”
41 “A ku ni vavanuna vambirhi lava a va devha munhu lweyi a lombisaka male; mun’we a a devha 500 wa tidenari,* kambe lweyi mun’wani a a devha 50 wa tidenari.
42 Leswi havambirhi a va nga na xa ku mu hakela hi xona, lweyi a nga va lomba male a va rivalele swikweneti swa vona. Se, i mani ka vona lweyi a nga ta mu rhandza hintamu ke?”
43 Simoni a hlamula a ku: “Ni pimisa swaku hi lweyi a a mu devha male ya yinyingi.” Yesu a ku: “Vhela u tiyisile.”
44 Se a txuvuka wansati kutani a byela Simoni a ku: “Wa mu vona wansati lweyi? Nkama ni nga nghena ndlwini ka wena a wu ni nyikanga mati ya ku hlamba minkondzo. Kambe wansati lweyi a tsakamise minkondzo ya mina hi mihloti ya yena a tlhela a yi limpa hi misisi ya yena.
45 A wu ni bejaranga, kambe ku sukela ni nga nghena ndlwini ka wena wansati lweyi a bejare minkondzo ya mina.
46 A wu ni chelanga mafurha ka nhloko, kambe wansati lweyi a ni chele mafurha ya ku nun’hwela ka minkondzo.
47 Hi mhaka leyo na ku byela swaku hambi leswi wansati lweyi a nga yendla swidjoho swa swinyingi,* swidjoho swa yena swi rivaleliwile+ hikusa a kombise lirhandzu lalikulu. Kambe lweyi a rivaleliwaka swaswitsongo ni lirhandzu la yena i litsongo.”
48 Se a byela wansati a ku: “Swidjoho swa wena swi rivaleliwile.”+
49 Lava a va tshame* na yena mezeni va sungula ku vulavula hi xivona va ku: “I mani wanuna lweyi wa ku kota ni ku rivalela swidjoho?”+
50 Se a byela wansati a ku: “Lipfumelo la wena li ku ponisile;+ famba hi ku rhula.”
Tinhlamunselu ta le hansi
^ Lweyi a rhangelaka 100 wa masonchwa.
^ I ndhawu leyi Vayuda a va kumana ka yona swaku va khongela va tlhela va lerha matsalwa.
^ Kumbe: “xibedwani xa ku tlakula mufi”.
^ Kumbe: “lepra”. Ku nga muxaka wa mavabyi ya ku bola xikhumba.
^ Hi Xigriki: “khunguvanyeki”.
^ Hi Xigriki: “ka kara la wena”.
^ Kumbe: “impoxtu; tinemba”.
^ Kumbe: “nguva leyi.”
^ Hi Xigriki: “hi mi chayele xitiringo”.
^ Kumbe: “makolo”.
^ Kumbe: “vana va”.
^ Kumbe: “li lweliwa”.
^ Kumbe: “vurhama”.
^ Kumbe: “a vurhame”.
^ Kumbe: “mfuku ya”.
^ Kumbe: “n’quta; nyunta”.
^ Vona Xiyengetelo B14.
^ Kumbe: “swa swikulu”.
^ Hi Xigriki: “vurhame”.
