Nhlawutelo ya Yohani 8:1-13
8 Loko Xinyempfani+ xi kwamula xa ku lema hi xona xa wu 7,+ ku miyeliwa ku ku zwee atilweni ku ringana kolumuyani ka 30 wa maminutu.
2 Se ni vona 7 wa tintsumi+ na ti nyimile phambheni ka Xikwembu, kutani ti nyikiwa 7 wa timhalamhala.*
3 Se ku fika ntsumi yin’wani yi nyima ka altari,+ na yi khome xibya xa swinun’hwelisu;* kutani yi nyikiwa swinun’hwelisu swa swiyinyingi+ swaku yi hisela Xikwembu ni swikhongelo swa vakwetsimi ka altari ya woru+ leyi a yi li phambheni ka xitshamu xa wuhosi.
4 A ximusi xa swinun’hwelisu leswi nga hisiwa hi ntsumi swi tuvikela phambheni ka Xikwembu xikan’we ni swikhongelo+ swa vakwetsimi.
5 Kambe hi ku hantlisa ntsumi yi teka xibya xa swinun’hwelisu yi xi tata hi ndzilu lowu taka hi ka altari, yi xi txukumetela amisaveni. Se ku twakala ku dzindza ka tilo, marito, ku hatima+ ni ku tsekatseka ka misava.
6 Kutani a 7 wa tintsumi leti nga khoma 7 wa timhalamhala+ ti ti lunghisela swaku ti ti chaya.
7 A ntsumi ya ku sungula yi chaya mhalamhala ya yona kutani ku va ni marhalala* ni ndzilu na swi patsiwe ni ngati, swi gama swi txukumeteliwa misaveni;+ se ku psha hafu yayitsongo* ya misava, ku psha ni hafu yayitsongo* ya minsinya naswona ku pshe ni byanyi hinkwalu.+
8 Ntsumi ya wumbirhi yi chaya mhalamhala ya yona. Kutani nchumu xa ku fana ni ntshava yayikulu leyi pfurhaka ndzilu xi txukumeteliwa lwandle.+ Se hafu yayitsongo* ya lwandle yi txintxa yi va ngati;+
9 naswona ku fa hafu yayitsongo ya leswi hanyaka alwandle,+ ni hafu yayitsongo ya switimela swa mati swi tshovekela.
10 Se ntsumi ya wunharhu yi chaya mhalamhala ya yona. Kutani nyeleti yayikulu leyi pfurhaka ku fana ni xa ku voninga hi xona, yi wa hi le tilweni, yi wela henhla ka hafu yayitsongo ya minambu ni ka swihlovo swa mati.+
11 Vito la nyeleti yoleyo i Ku Bava.* Kutani hafu yayitsongo ya mati yi txintxa yi bava, se ku fa vanhu va vanyingi hi mati wolawo, hikusa a ma txintxiwe ma bava hintamu.+
12 Se ntsumi ya wu 4 yi chaya mhalamhala ya yona. Kutani hafu yayitsongo* ya dlambu,+ ya n’weti ni ya tinyeleti yi timeka, leswaku hafu yayitsongo ya swona yi txintxa yi va munyama,+ ni leswaku hafu yayitsongo ya siku yi nga tlhaviki; swi yendlekisa swoleswo ni hi wusiku la kona.
13 Kutani ni txuvuka, ni twa gama* leli hahaka henhla li huwelela li ku: “Khombo, khombo, khombo+ ka lava tshamaka misaveni hi mhaka ya timhalamhala tinharhu leti nga kusuhi ni ku chayiwa hi tintsumi!”+
Tinhlamunselu ta le hansi
^ Ku nga minchumu ya ku hambiwa hi limhondzo kumbe nsimbi. Yi chaya ku fananyana ni mavhuvhuzela.
^ Vona Ntlhamuselo.
^ Hi Xigriki: “1/3” (xikhemu xin’we ka swinharhu).
^ Hi Xigriki: “1/3” (xikhemu xin’we ka swinharhu).
^ Kumbe: “marhalani”.
^ Hi Xigriki: “1/3” (xikhemu xin’we ka swinharhu).
^ Lani a rito leli nge “ku bava” li kombetela ka swinsinyani swa ku bava hintamu swi tlhela swi va ni vhenenu, (naswona li vitaniwa absintu).
^ Hi Xigriki: “1/3” (xikhemu xin’we ka swinharhu).
^ Ku nga muxaka wa xinyanyani.
