1. I yini leswi Yesu a nga ta swi yendla ku nga li khale?

 HI HANYA ka masiku ya wugamu, lani swilo swi karhataka hintamu naswona minchumu yi tshamelaka ku txintxa. Ku nga li khale Yesu a ta yavanyisa munhu mun’wana ni mun’wana lweyi a hanyaka. Hi yona mhaka leyi a nga byela vadjondzisiwa va yena swaku a ku ta va xihi “xikombiso” xa nkama wa ku vuya ka yena ni “xa ku fika ka nkama wa wugamu.” (Mat. 24:3) Phela a wuprofeta leli hinkwalu li tsaliwe ka Matewu ndzima 24 na 25 ni ka Marka ndzima 13 na Luka ndzima 21.

2. Hi ta bula hi yini ka djondzo leyi naswona hi mhaka muni leswo swi li swa lisima?

² Yesu a vulavule hi 3 wa swifaniso leswi nga hi pfunaka ku va hi tilulamisela. Ku nga xifaniso xa tinyempfu ni timbuti, xa tintombhi ta ku tlhariha ni letiyani ta swiphunta, ku patsa ni xa titalenta. Nkama lowu hi kambelaka a xifaniso ha xin’we hi xin’we hi ta vona swaku a ndlela leyi hi vulavulaka hi yona, hi tikhomaka hi yona hi tlhela hi pimisa hi yona swi ta yi khumbisa ku yini ndlela leyi hi nga ta yavanyisiwaka hi yona. Kambe swoswi a hi sunguleni hi ku bula hi xifaniso xa ku sungula, xa tinyempfu ni timbuti.

TINYEMPFU NI TIMBUTI

3. I nkama muni lowu Yesu a nga ta yavanyisa vanhu?

³ Yesu a ta yavanyisa vanhu tanihi tinyempfu ni timbuti. (Mat. 25:31-46) A ta yendla leswo ka “nhlomulu wawukulu,” loko Armajedoni yi li kusuhi ni ku sungula. (Mat. 24:21) Kutani a ta yavanyisa a tinyempfu axikarhi ka timbuti hikusa a tinyempfu ti pfuna a vatotiwa kuva va yendla a ntirho wa ku chumayela.

4. Hi ku ya hi Esaya 11:3, 4 hi mhaka muni hi tiyiseka swaku Yesu a ta yavanyisa hi ndlela ya ku lulama? (Vona mufoto .)

 ⁴ A wuprofeta leli li nga ka buku la Esaya li kombisa leswaku Yehovha a lange Yesu leswaku a yavanyisa vanhu hi ndlela ya ku lulama. (Lerha Esaya 11:3, 4.) Yesu a ta yavanyisa vanhu hi ku ya hi leswi va swi yendlaka, leswi va swi pimisaka, leswi va swi vulavulaka ni leswi va va khomisaka xiswona vatotiwa. (Mat. 12:36, 37; 25:40) Wa swi tiva leswaku hi va seketelile ku fikela kwini vamakwerhu lava totiweke, ngopfungopfu loko swi ta ka ntirho wa ku chumayela. a Lava Yesu a nga ta vona swaku va va seketelile hi ku hiseka vamakwerhu lava, va ta yavanyisiwa tanihi vanhu va ku “lulama” naswona na va faneleka ku hanya a “wutomi la ku kala li nga heli” kola misaveni. (Mat. 25:46; Nhl. 7: 16, 17) Hikakunene i ntshembo wa ku tsakisa swinene lowu hina hinkwerhu hi wu nyimelaka! Loko hi tshama na hi tshembekile ka nhlomulu wawukulu ni loko se nhlomulu wawukulu wu ta hundza, swi ta yendla leswaku mavito ya hina ma tsaliwa ka “buku la wutomi.” — Nhl. 20:15.

5. Hi yini djondzo leyi hi yi kumaka ka xifaniso xa tinyempfu ni timbuti, naswona swi khumba mani?

⁵ Tshama na u tshembekile. Xifaniso xa Yesu lexi vulavulaka hi tinyempfu ni timbuti xi tirha ngopfu ka Vakreste lava tinyempfu tin’wani, lava nga ni ntshembo wa ku hanya lani misaveni aparadesini. Hikusa vona va fanele va tshama na va tshembekile ka ntlawa wawutsongo wa Vakreste lava va nga totiwa lowu wu vitaniwaka mutirhi wa ku tshembeka ni wa ku tlhariha, naswona va nga tama va va seketela hi ku tirha ka ntirho wa ku chumayela mahungu ya ku tsakisa. (Mat. 24:45) Kambe leswi swa tirha ni ka Vakreste lava va nga totiwa, hikusa na vona loko va ta yavanyisiwa, Yesu a ta txuvuka leswi va swi pimisaka, leswi va swi vulaka ni leswi va swi yendlaka. Hi mhaka yoleyo Yesu a nga gama a yendla swifaniso swimbirhi swin’wani leswi tirhaka ngopfu ka Vakreste lava nga totiwa leswi swi kumekaka ka Matewu ndzima 25. Swoswi a hi sunguleni hi ku bula hi xifaniso xa 10 wa tintombhi leti a ti nyimela a muteki.

TINTOMBHI TA KU TLHARIHA NI TA SWIPHUNTA

6. A 5 wa tintombhi ti swi kombise ku yini swaku a ti tlharihile? (Matewu 25:6-10)

⁶ Ka xifaniso xa tintombhi Yesu a vulavule hi 10 wa tintombhi leti a ti nyimela a muteki. (Mat. 25:1-4) Hinkwatu ka tona a ti nyimela leswaku loko muteki a fika a ti teka a famba na tona ka fexta. Kambe Yesu a tlhamusele leswaku a 5 wa tona a ti “tlharihile” se letin’wani ta 5 a ti li “swiphunta.” Letiyani ta ku tlhariha ti swi kombisile swaku ti tlharihile hi ku tshama na ti lunghekile. A ti ni mafurha ya ku yenela leswaku ti rindza a muteki a wusiku hinkwalu anze a fika. Ti te ni mafurha lawa a ma ta ti pfuna swaku hambiloko ko mphuma hintamu na a nga se fika a ti ta tama ti va ni mimotso ya tona na yi layithile. (Lerha Matewu 25:6-10.) Se a nkama muteki lwiyani a nga fika, a kuma letiyani ta 5 ta ku tlhariha na ti lunghekile, a ti tekile a famba na tona ka muchadu. Hi ku fana, a Vakreste lava va nga totiwa lava va tshamaka na va tshembekile, loko Yesu a ta vuya a ta va vona na va faneliwa hi ku kuma a hakelo ya vona ku nga ku va teka a famba na vona, a ya fuma na vona ka Mfumu wa yena wa le tilweni ku nga a Mfumu wa Xikwembu. b (Nhl. 7:1-3) Kambe a letiyani ta swiphunta ke, swi gamise ku yini?

7. I mpsini swi nga yendlekela a tintombhi letiya ta 5 ta swiphunta naswona hi mhaka muni?

⁷ Tintombhi ta ku tlhariha a ti li karhi ti nyimela a muteki, kambe le ta 5 ta swiphunta, ka mimotso ya tona a ti nga ha na a mafurha ya ku yenela.  Se ti sukile ti ya xava a mafurha leswaku ti chela ka mimotso ya tona, swaku ti kota ku tama ti nyimela a muteki. Kambe a nkama a muteki a nga fika a “tintombhi leti a ti tilunghiselile ti nghena na yena ka fexta la muchadu kutani xipfalu xi pfaliwa.” (Mat. 25:10) Se a nkama lowu tintombhi leti ta 5 ti nga vuya ti lave ku nghena, kambe muteki a te: “A ni mi tivi.” (Mat. 25:11, 12) Tintombhi letiya ta 5 ta swiphunta a ti nga lunghekelanga ku nyimela a muteki. Se vatotiwa ke, va nga djondza yini ka xikombiso lexi xa Yesu?

8-9. Vatotiwa va nga djondza yini ka xifaniso xa tintombhi? (Vona mufoto.)

⁸ Tshama na u pfule matihlo. Ku va Yesu a tirhisile a xifaniso lexiyani xa tintombhi, a a nga lavi ku vula swaku ku ta va ni ntlawa wa vatotiwa lava a va ta tshembeka ni ntlawa wun’wani wa lava a va nga ta tshembeka. Kambe, a a lava ku va pfuna leswaku va tiva xa ku xi yendla leswaku va tshama na va pfule matihlo ka masiku lawa ya wugamu. Naswona a a lava leswaku va twisisa swaku kuva va kuma a hakelo ya vona, a va fanele va tshama na va pfule a matihlo. (Yoh. 14:3, 4) Phela leswo swa tirha ni ka hina va ku a hi vatotiwa namuntlha! Ku nga na mhaka swaku hi ni ntshembo wa ku ya hanya atilweni, kumbe kola misaveni, hinkwerhu hi fanele hi swi nyika a lisima hinkwaswu leswi Yesu a nga swi vula ka xifaniso lexi. Loko hi yendla leswo hi ta swi kota ku tshama na hi pfule matihlo naswona leswo swi ta hi pfuna ku tiyisela anze magamu. — Mat. 24:13.

⁹ Ndzhaku ka ku va Yesu a tlhamusele xifaniso xa tintombhi letiyani, lexi kombisaka a lisima la ku va hi tshama na hi lunghekile hi tlhela hi tshama na hi pfule matihlo, a tlhele a tlhamusela a xifaniso xa titalenta lexi vulavulaka hi lisima la kuva hi va vanhu va ku hiseka hi tlhela hi tshama na hi khomekile hi ku yendla a mintirho ya ku hambanahambana.

TITALENTA

10. Vatirhi vambirhi va swi kombisise ku yini leswaku a va tshembeka? (Matewu 25:19-23)

¹⁰ Ka xifaniso xa Yesu xa titalenta a vulavule hi vatirhi vanharhu, vambirhi va ku tlhariha ni mun’we wa ku kala a nga tlharihanga. (Mat. 25:14-18) Vatirhi vambirhi va kombise leswaku va tlharihile  hikusa a va lava ku pfuna n’winyi wa vona kambe lweyi wa wunharhu a nga swi yendlanga leswo. Na n’winyi wa vona a nga se yendza a va siyele male leswaku va sala va yi tirhisa. Lava va vambirhi va yi tirhise hi wutlharhi hi ku yendla manegosiyu leswaku va pfuna n’winyi wa vona, hi mhaka leyo va kote ku phindhisa male leyo kambirhi. Leswo swi yendle leswaku loko n’winyi wa vona a vuya a tsaka hi vona, a va byela leswaku a va fanele va nghena, va tsaka na yena. (Lerha Matewu 25:19-23.) Se, a mutirhi lweyi wa wunharhu ke? A yendle yini hi male leyi a nga nyikiwa yona?

11. I mpsini leswi nga yendlekela mutirhi wa wunharhu naswona hi mhaka muni?

¹¹ Mutirhi lwiyani wa wunharhu lweyi a nga nyikiwa talenta yin’we a i li lolo. Hambileswi a patrão wa yena a a nyimela leswaku a sala a psalisa male liyani a nga mu siyela yona, yena a yo sala a yi tshukuveta hansi. Se loko a vuyile hi lomu a a yi kona a kume leswaku a mutirhi wa yena a a nga salanga a tirha nchumu ka leswi a nga mu nyika swona. Funtshi handle ka ku kombela rivalelo, mutirhi lwiyani a sungule ku tinyimelela a vula leswaku a patrão wa yena a a karhata swinene. Se ku game ku yendleka yini? A n’winyi wa mutirhi lwiyani a mu tekelile talenta liyani a nga mu siyela yona a tlhela a mu hlongola kaya ka yena. — Mat. 25:24, 26-30.

12. A vatirhi lavayani va vambirhi va ku tshembeka va nyimela vamani namuntlha?

¹² A vatirhi lavayani va vambirhi va ku tshembeka va fanekisela Vakreste lava nga totiwa lava tshamaka na va tshembekile. Hi mhaka ya ku tshembeka ka vona, Yesu a ta va rhamba leswaku va tsaka na yena va tlhela va kuma hakelo ya ku ya fuma na yena atilweni. (Mat. 25:21, 23; Nhl. 20:5b) Kasi a mutirhi lwiyani wa ku loloha wa ku tshukuveta a talenta, a ba ndleve vatotiwa ka mhaka ya ku karhi. A hi yi voneni.

13-14. Vatotiwa va nga djondza yini ka xikombiso xa titalenta? (Vona mufoto.)

¹³ Vana munhu lweyi a hisekaka hintamu. Ka xifaniso xa titalenta ni xa tintombhi, Yesu a a nga lavi ku vula swaku vatotiwa a va ta va ni wulolo, kambe a vule leswi a swi ta va yendlekela loko vona a vo kala va nga ha tshembeki funtshi va nga ha hiseki. Hikusa loko a vo yendla leswo a va nga ta swi kota ku va vanhu lava a a ta va “vitana ni  ku va langa” naswona a va nga ha ta nghena ka Mfumu wa matilo. — 2 Pe. 1:10.

¹⁴ Nkama Yesu a nga vulavula hi xikombiso xa tintombhi ni titalenta, a a lava ku pfuna vatotiwa leswaku va tama va tirha hi matimba ni ku tshama na va pfule matihlo. Nkama Yesu a nga vulavula hi swikombiso leswi, ku nga va leswaku Yesu a vule swilo swin’wani leswaku a basopisa vatotiwa? Ina! Hikusa Matewu 24:40, 41 yi swi vula kahle leswaku a ku ta va ni ku yavanyisiwa ka vatotiwa.

I VAMANI VA NGA TA TEKIWA?

15-16. Matewu 24:40, 41 yi swi kombisisa ku yini swaku vatotiwa va fanele va tshama na va pfule matihlo?

¹⁵ Na Yesu a nga se vulavula hi swifaniso leswi hi nga bula hi swona anze swoswi a rhange hi ku vulavula hi swilo leswi vatotiwa a va fanele va swi yendla leswaku va kuma hakelo ya vona. Yena a vulavule hi vavanuna vambirhi lava a va li masin’wini, ni vavasati vambirhi lava a va li ku sileni. Swi tikomba ka swiyimu hinkwaswu leswi swa swimbirhi vanhu lava a va yendla mintirho ya ku fana, kambe Yesu a vule leswaku a ku ta “tekiwa mun’we ku siyiwa lweyi mun’wani.” (Lerha Matewu 24:40, 41.) Naswona a tlhele a byela vadjondzisiwa va yena a ku: “Tshamani na mi pfulile matihlo, hikusa a mi li tivi siku leli Hosi ya n’wina yi nga ta ta hi lona.” (Mat. 24:42) Funtshi hambi hi nkama lowu Yesu a nga vulavula hi xifaniso lexiyani xa tintombhi a vule marito lama fanaka na a kombisa leswaku a va fanele va tshama na va rindzile. (Mat. 25:13) Leswo swi kombisa leswaku ku ni ku yelana ka swikombiso leswi swa swimbirhi hikusa i vatotiwa lava va tshembekaka ntsena lava nga ta kuma hakelo ya ku ya fuma na Yesu atilweni. — Yoh. 14:3.

¹⁶ Tshama na u pfule matihlo. Vatotiwa va fanele va tshama na va pfule matihlo va tlhela va va ni wunghanu la ku tiya na Yehovha, hikusa loko va nga yendli leswo a va nga ta tekiwa loko ku hlengeletiwa “lava va nga langiwa” leswaku va ya fuma na Yesu amatilweni. (Mat. 24:31) Na hina hi nga ni ntshembo wa ku hanya lani misaveni hi fanele hi tshama na hi pfule matihlo hi tlhela hi tiyisa wunghanu la hina na Yehovha, hikusa loko hi nga yendli leswo a hi nga ta yi kuma hakelo ya hina ya ku hanya hi masiku ni masiku lani misaveni.

17. Hi mhaka muni hi nga fanelanga hi karhateka loko Yehovha wa ha tama a langa van’wani swaku va va vatotiwa?

¹⁷ Ha tiyiseka leswaku Yehovha i Xikwembu lexi yavanyisaka hi ku lulama. Se leswo swi hi yendla hi nga karhateki loko ni ka masiku lawa ya wugamu a tama a langa van’wanyani leswaku va ya fuma na Yesu atilweni. c Wa swi khumbuka leswi Yesu a nga swi vula hi vatirhi lavayani va nga gamesa ku fika amasin’wini ka Matewu 20:1-16? Hambileswi ku nga ni lava nga rhanga va fika ni lava nga fika ku heleni ka siku, hinkwavu va kumile a hakelo ya ku fana. Swi hi ku fana ni vatotiwa lava va langiwaka. Hinkwavu va ta kuma hakelo ya ku ya fuma na Yesu atilweni loko va tshama na va tshembekile.

HI FANELE HI TSHAMA NA HI RINDZILE

18-19. Hi djondze yini ka nhlokomhaka leyi?

¹⁸ Hi djondze yini ku ta fikela swoswi? Hi djondze leswaku ka lava va nga ni ntshembo wa ku hanya lani misaveni hilani ku nga heliki, xifaniso xa tinyempfu ni timbuti xi va pfuna leswaku va tshama na va tshembekile ka Yehovha ku sukela swoswi va tlhela va tshembeka ka yena ka nhlomulu wawukulu. Naswona loko va tshama va tshembekile, ka nkama lowu taka Yesu a ta va yavanyisa tanihi tinyempfu a tlhela a va nyika “wutomi la ku kala li nga heli” lani misaveni. — Mat. 25:46.

¹⁹ Hi tlhele hi bula hi swifaniso swimbirhi leswi nga pfunaka vatotiwa leswaku va tshama na va tivonela.  Ku nga xifaniso xa 10 wa vanhwanyana, lani 5 wa vona a va tlharihile kambe lavan’wani va 5 a va li swiphunta. Xifaniso lexi xi pfune vatotiwa leswaku va tshama na va lunghekile va rindzela nkama lowu muteki a nga ta fika hi wona. Lavayani va ku tlhariha va tshame na va lunghekile va nyimela nkama lowu muteki a a ta fika hi wona, kambe lavayani va swiphunta a va nga lunghekanga, se nkama muteki a nga fika a nga va pfumelelanga kuva va nghena ka fexta la muchadu. Na hina namuntlha hi fanele hi tshama na hi lunghekile ku nga na mhaka swaku siku la Xikwembu li ta fika siku muni, anze Yesu a fika ni misava leyi yi helisiwa. Xin’wani hi vulavuli hi xifaniso xa titalenta, lani hi nga vulavula hi vatirhi lavayani vambirhi lava a va tirha hi ku hiseka. Vatirhi lavayani, nkama n’winyi wa vona a nga vuya a swi tsakelile leswi va nga swi yendla a tlhela a va hakela hi mhaka ya swona. Kambe lwiyani wa ku loloha a hlongoliwile hi mhaka wulolo la yena. Hi djondza yini ka leswo? Hi fanele hi tshama na hi khomekile ka ntirho wa Yehovha anze ku fika magamu ya misava leyi. Xin’wani hi nga xi vona hi leswi vatotiwa va nga swi yendlaka leswaku va tshama na va lunghekile ku tekiwa hi Yesu loko a ta fika leswaku va ya kuma hakelo ya vona atilweni. Phela vatotiwa lava ku tshembeka va swi nyimele hi ntsaku wawukulu swinene ku fika ka Yesu a va teka a famba na vona tilweni. Ndzhaku ka loko Armajedoni yi hundzile, va ta tikhorisa hi fexta la muchadu kole tilweni, ni Xinyempfani. — 2 Tes. 2:1; Nhl. 19:9.

20. Yehovha a ta va yendlela yini lava tshamaka na va rindzile?

²⁰ Hina lava hi tirhelaka Yehovha a hi chavi nchumu hambileswi hi swi tivaka swaku siku la ku Yehovha a yavanyisa vanhu hinkwavu lani misaveni li le kusuhi. Loko hi tshama na hi tshembekile Papayi wa hina Yehovha a ta hi nyika matimba yamakulu leswaku hi swi kota ku hlula swikarhatu hinkwaswu leswi hi kumanaka na swona anze magamu. (2 Ko. 4:7; Luk. 21:36) Se ku nga na mhaka leswaku hi vatotiwa kumbe hi ni ntshembo wa ku hanya lani misaveni, ka nkama lowu taka loko hi yingisa hinkwaswu leswi Yesu a nga swi vula swaku hi tshama na hi rindzile, Yehovha a ta tsaka hintamu naswona leswi Yehovha i nga Xikwembu xa timpsalu a ta tsala mavito ya hina ka “buku la wutomi.” — Dan. 12:1; Nhl. 3:5.