Yesu a vule swaku hi fanele hi hanyisana hi ku rhula ni vanhu van’wana. Kambe siku lin’wana a va byele leswi vapostolo va yena: “Mi nga pimisi swaku ni tise ku rhula amisaveni; a ni tisanga ku rhula kambe ni tise xipada. Hikusa ni tele ku ta pfuxa ku yavana xikarhi ka djaha ni papayi wa lona, ni le xikarhi ka ntombhi ni mamana wa yona, ni le xikarhi ka mamanyana ni n’wingi wa yena.” (Mat. 10:34, 35) Kasi a a lava ku vula yini hi marito lawa?

Yesu a a nga lavi ku hohlota mindjangu, kambe a a swi tiva swaku leswi a a swi djondzisa a swi ta yentxa swaku mindjangu yi nga ha twanani. Se, lweyi a lavaka ku va mulandzeli wa Yesu a tlhela a tsakamisiwa a fanele a swi tiva swaku swi nga yentxeka maxaka ya yena ma nga swi tsakeli. Minkama yin’wana, swi nga yentxeka lweyi a nga chada na yena kumbe maxaka ma nga nyimi na yena. Naswona leswo swi nga ha mu godolisa.

Bibele li li hi fanele hi ‘hanya hi ku rhula ni vanhu hinkwavu’. (Rom. 12:18) Kambe leswi hi swi djondzaka swi nga ha fana ni “xipada” ka mindjangu yin’wanyani. Leswo swi yentxeka loko ka ndjangu wa hina ku li ni munhu lweyi a kalaka a nga nyimi ni leswi hi swi djondzaka. Naswona, munhu yelweyo a ‘nyenya’ lweyi a djondzaka ntiyiso. —  Mat. 10:36.

Mukreste lweyi a tshamaka ni maxaka lawa ma nga ni wukhongeli la ku hambana, a fanele a langa swaku a ta tsakisa Yehovha kumbe a ta tsakisa maxaka ya yena. Hi xikombiso, maxaka ya yena ma nga ha mu sindzisa swaku a va kona ka mafexta ya wukhongeli kumbe makhesemusi. Se, hi nkama wolowo a fanele a langa lweyi a lavaka ku mu tsakisa. Yesu a te: “Lweyi a rhandzaka papayi wa yena kumbe mamana wa yena ku tlula mina, a nga faneleki ku va mudjondzisiwa wa mina”. (Mat. 10:37) Phela Yesu a a nga vuli swona swaku munhu lweyi a djondzaka ntiyiso a nga fanelanga a rhandza maxaka ya yena. Kambe a a lava ku hlaya swaku, ku rhandza Yehovha hi swona swi faneleke swi va swa lisima ka wutomi la yena. Loko xaka la hina leli kalaka li nga rhandzi Yehovha lo hi sindzisa ku tshika ku mu tirhela, hi fanele hi khumbuka swaku i swa lisima ku rhangisa Yehovha ku tlula maxaka.

I ntiyiso swaku swa vava ku nyenyiwa hi maxaka. Kambe vadjondzisiwa va Yesu va fanele va khumbuka leswi a nga swi vula loko a ku: “Lweyi a kalaka a nga rhwali mhandzi ya yena ya nxaniso a ni landzela, a nga faneleki ku va mudjondzisiwa wa mina.” (Mat. 10:38) Hi marito man’wana, Vakreste va swi tiva swaku loko va langa ku tirhela Yehovha va ta nyenyiwa hi maxaka. Kambe va swi tiva swaku loko va tama va va ni mahanyelo ya manene swi nga yentxeka maxaka ya vona ma navela ku djondza Bibele. —  1 Ped. 3:1, 2.