LUCIA WA KHWITA. Loko aha li ntsongwana, a khomiwe hi mavabyi lama womisaka swirho ni lama tlulelanaka hi kuwolova. Loko a li ni 16 wa malembe, mulungu wa yena amu byele leswi: “Xikwembu xi womise nenge wa wena leswaku xiku khatisa hileswi awungamu yingisi u tlhela ungamu hloniphi mamana wa wena.” Hambileswi se kuhundzaka malembe yotala leswo swi yendlekile, Lucia angayi rivali ndlela leyi marito lawa mamu tshoveke mbilu ha yona.

LOKO DAMARIS A BYELIWE LESWAKU A NI KANKRU KA BYONGO, b’ava wa yena amu vutisile: “Uyo yendla yini leswaku Xikwembu xiza xiku khatisa hi ndlela leyi? Phela kuza u humeleliwa hi leswi, xi kona ungaxi yendla.” Marito lawa ama fana ni banga leli tlhomiweke ambilwini ya yena.

Se i khale vanhu va pimisa leswaku mavabyi i xikhatiso xa Xikwembu. Buku leli vulavulaka hi mindhavuku ni mikhuva ya tindhawu leti kuvulavuliwaka hi tona aBibeleni li kombisa leswaku ankameni wa Yesu vanhu vanyingi ava kholwa leswaku “mavabyi aku li xikhatiso xa Xikwembu hi mhaka ya swidjoho swa muvabyi kumbe swa maxaka ya yena.” Hikuya hi buku Medieval Medicine and the Plague, hambi ndzhaku ka madzana ya malembe Yesu a file, “vanhu van’wana avaha kholwa leswaku Xikwembu axi tisa mintungu leswaku xi khatisa vanhu hi swidjoho swa vona.” Kambe xivutiso lexi tlakukaka hi lexi: Xana timiliyoni ta vanhu lava feke hikolaho ka ntungu lowu hlaseleke Ewuropa kolomuya ka va1500 aku li xikhatiso xa Xikwembu ka vanhu lava ava yendla swilo swobiha? Kumbe va fe hi mhaka ya xitsongwatsongwana lexi tluleleke vanhu votala, hilaha minkambisiso ya vadokodela yi vuleke ha kona? Mhaka ya kufana ni leyi yi yendla vanhu va tivutisa leswi: Xana Xikwembu xi tirhisa mavabyi leswaku xi khatisa vanhu hi swidjoho swa vona? *

ANAKANYISISA HI LESWI: Hayini Yesu a hanyise vanhu loko kuli leswaku mavabyi ni kuhlupheka i swikhatiso swa Xikwembu leswi hi faneleke hiswi kuma hi mhaka ya swidjoho swa hina? Xana a alwisana ni kurhandza ka Xikwembu? Xana a alava kuvula leswaku Xiwembu axi lulamanga? (Matewu 4:23, 24) Hilaha hi tivaka ha kona, ‘masiku hinkwawu [Yesu] aayendla leswitsakisaka Tatana wa yena’ naswona ‘aatirha hilaha Tatana amuleleteke hakona.’ — Yohane 8:29; 14:31.

Bibele liswi veka rivaleni leswaku Yehovha i Xikwembu ‘lexingaliki ni wuhomboloki’. (Deteronoma 32:4) Hi xikombiso, Xikwembu axingata vanga mhangu ka xihahampfhuka xokarhi ivi xi dlaya vanhu vanyingi lavangaliki na nandzu leswaku xi khatisa munhu mun’we ntsena. Loko a vulavula hi kululama ka Xikwembu, Abrahama, nandza wotshembeka wa Yehovha, a vule leswaku Xikwembu axinge tshuki xi pimisa ‘kulovisa lweyi wa kululama xikan’we ni lweyi wa kubiha.’ (Genesa 18:23, 25) Bibele li tlhela li vula leswi: “Xikwembu axiyendli hilaha kubiheke”; Axi yendli “hilaha kungalulamangiki”. — Yobo 34:10-12.

Kuhlupheka ka hina ahi xikhatiso xa Xikwembu hi mhaka ya xidjoho xokarhi lexi hixi yendleke. Yesu aswi veke rivaleni leswo loko yena ni vadjondzisiwa va yena va vone wanuna lweyi a psaliweke na a fe matihlo. “Vajondzisiwa va yena vamuvutisa vaku: ‘Mujondzisi, i xijoho xa mani lexiyendleke lesvaku munhu lweyi apsaliwa na angavoni: “I xa yena kumbe i xa vapsali va yena ke?”’ Yesu ahlamula aku: ‘akujohanga yena, kumbe vapsali va yena, kambe apsaliwe na afile mahlo lesvaku mintirho ya Xikwembu yitavoneka ha yena.’” — Yohane 9:1-3.

Vadjondzisiwa va hlamalisiwe hi nhlamulo leyi Yesu ava nyikeke yona tani hileswi ankameni wolowo vanhu ava li ni mavonelo lama hoxeke hi vanhu lava psaliwaka  valimalile. Hi kupfula matihlo ya wanuna lwiyana, Yesu aswi veke rivaleni leswaku mavonelo lawa ama li kona ama hoxile ni leswaku kuhlupheka ahi xikhatiso xa Xikwembu. (Yohane 9:6, 7) Lava va langutanaka ni mavabyi ya kukarhata swinene vanga chaveleleka hi kutiva leswaku Xikwembu ahi xona xi vangaka mavabyi ya vona.

Matsalwa mahi tiyisa

• “Hikuva Xikwembu xingakala xingaringiwi hi lesvobiha na svona, xona hi xoxe, axiringi munhu ni mun’we.” (YAKOBO 1:13) Kunene, “lesvobiha” swofana ni mavabyi, kuvaviseka ni lifu, swinga ni malembe yotala swili karhi swi hlasela vanhu, swita helisiwa kungali khale.

• Yesu Kreste ‘ahanyise hinkwavu lavavabzaka’. (MATEWU 8:16) Hi kuhanyisa lava vabyaka, Yesu a kombise leswi Mfumu wa Xikwembu wungantaswi yendlela vanhu hinkwavo.

• “Xikwembu xitasula mihloti hinkwayo matihlweni ya vona, ni rifu aringahatava kona; hambi mali mahlomulu kumbe kurila kumbe kuvaviseka asvingahatava kona, hikuva lesvosungula se svihundzile.” — NHLAVUTELO 21:3-5.

Hayini hina vanhu hi hlupheka? Se kuhundza malembe vanhu vati yendla xivutiso lexi. Loko kuli leswaku kuhlupheka aku vangiwi hi Xikwembu, kuvangiwa hi mani? Tinhlamulo ta swivutiso leswi hitati kuma ka nhlokomhaka leyi landzelaka.