Чумдыручы Яхъя Аллаһының пәйгамбәре булган (Лүк 1:76). Ул безнең эрага кадәр 1 гасырның азагында туган һәм безнең эраның 1 гасырында яшәгән. Аллаһы аңа Мәсих өчен юлны әзерләргә кушкан. Шуңа күрә Яхъя яһүдләргә, үз Аллаһыларына кире кайтсыннар өчен, Аллаһы хәбәрен вәгазьләгән (Марк 1:1—4; Лүк 1:13, 16, 17).

 Яхъя сөйләгән хәбәр эчкерсез кешеләргә Насара шәһәреннән булган Гайсә — вәгъдә ителгән Мәсих икәнен аңларга булышкан (Маттай 11:10). Яхъя кешеләрне, үз гөнаһларын танып, тәүбә итәргә чакырган, һәм кешеләр, тәүбә итүләрен күрсәтеп, суга чумдырылу үткән (Лүк 3:3—6). Яхъя күп кенә кешене суга чумдырган, шуңа күрә аны Чумдыручы Яхъя дип атаганнар. Ә иң мөһиме, ул Гайсәне суга чумдырган a (Марк 1:9).

Бу мәкаләдә

•  Чумдыручы Яхъяны нәрсә үзенчәлекле иткән?

•  Чумдыручы Яхъяның әти-әнисе кем булган?

•  Чумдыручы Яхъя ничек үлгән?

•  Чумдыручы Яхъя Гайсәне көндәш дип санаганмы?

•  Изге Язмаларда ничә Яхъя искә алына?

 Аның башкарачак эше турында алдан әйтелгән булган. Үзенең вәгазь эше белән Яхъя Йәһвәнең хәбәрчесе турында әйтелгән пәйгамбәрлекне үтәгән (Малахи 3:1; Маттай 3:1—3). Ул «Йәһвәгә яраклы халык әзерләргә» тиеш булган, ягъни ул үз милләттәшләрен — яһүдләрне — Йәһвәнең баш вәкиле Гайсә Мәсихнең хәбәрен кабул итәргә әзерләгән (Лүк 1:17).

 Үзенчәлекле пәйгамбәр. Гайсә болай дигән: «Хатын-кыздан туган кешеләр арасында Чумдыручы Яхъядан бөегрәк һичкем булмады, әмма күкләр Патшалыгында иң кечесе дә аңардан бөегрәк» (Маттай 11:11). Яхъя пәйгамбәр генә түгел, алдан әйтелгән «хәбәрче» дә булган. Шуңа күрә Яхъяга кадәр яшәгән Аллаһының һәр хезмәтчесеннән ул «бөегрәк» булган. Әмма ул күкләр Патшалыгында булмаячак b. Чөнки бу тугры пәйгамбәр Гайсә күктәге тормышка юл ачканчыга кадәр үлгән булган (Еврейләргә 10:19, 20). Яхъя җирдә, Аллаһы Патшалыгы җир өстеннән идарә иткәндә, яшәячәк. Аның җирдәге Оҗмахта мәңге яшәргә өмете бар (Зәбур 37:29; Лүк 23:43).

 Аның әтисенең исеме — Зәкәрия, ә әнисенең исеме Илисәбәт булган. Әтисе яһүдләрнең рухание булган. Яхъяның тууы могҗизалы булган, чөнки, әнисе «балага уза алмаганлыктан», аларның балалары булмаган. Шуны да әйтергә кирәк: Зәкәрия дә, Илисәбәт тә, «икесе дә инде олы яшьтә» булган (Лүк 1:5—7, 13).

 Һируд Антипа патша Яхъяның башын чабарга кушкан. Ул моны хатыны Һирудиянең теләге буенча эшләгән. Һирудия Яхъяны нәфрәт иткән, чөнки Яхъя, үзен яһүд дип санаган Һирудка, аның Һирудиягә өйләнүе яһүдләр законын боза дигән (Маттай 14:1—12; Марк 6:16—19.

 Яхъя Гайсәне көндәш дип санамаган. Моңа Изге Язмалардан дәлилләр күрәбез (Яхъя 3:25—30). Яхъя шуны таныган: ул Мәсихкә көндәш түгел, ул аның өчен юл әзерләргә килгән. Яхъя болай дигән: «Мин... ул Исраил халкына ачык билгеле булсын өчен, суга чумдырырга килдем». Шуннан соң болай дип өстәгән: «Мин... аның Аллаһы Улы булуына шаһитлек бирдем» (Яхъя 1:26—34). Шуңа күрә Яхъя Гайсәнең уңышлы хезмәтен күреп бик сөенгән.